އަހުމަދު އާބާދު، އިންޑިއާ (މެއި 30) - ދުނިޔޭގެ އެންމެ ބޮޑު ފްރެންޗައިސް ކްރިކެޓް ލީގު، އިންޑިއަން ޕްރިމިއާ ލީގު (އައިޕީއެލް)ގެ ފައިނަލް މެޗުގައި ރޭ ފަހު ދެ ބޯޅައިގައި ރަވިންދުރަ ޖަދޭޖާ ދެއްކި ތަފާތު ހިތްވަރާ އެކު ފަސް ވިކެޓުން އެންމެ ފަހުގެ ޗެމްޕިއަން ގުޖުރާތު ޓައިޓަންސް ބަލިކޮށް، ޗެންނާއީ ސުޕަ ކިންގްސް އިން ފަސް ވަނަ ފަހަރަށް މުބާރާތުގެ ތަށި އުފުލާލައި ރެކޯޑާ ހަމަކޮށްފި އެވެ.
މީގެ ކުރިން މުބާރާތުގެ އެންމެ ކާމިޔާބު ޓީމުގެ ރެކޯޑް އޮތީ ފަސް ތަށި ހޯދި މުމްބާއީ އިންޑިއަންސް އަތުގަ އެވެ. ރޭގެ ފައިނަލުގައި ޑަކްވޯތު ލެވިސް މެތަޑް އިން ބަލައިގެން ފަސް ވިކެޓުން މޮޅުވެ، ޗެންނާއީ އަށް ތަށި ލިބުމާ އެކު، އެ ޓީމު ވަނީ 10 ފައިނަލް ކުޅެގެން ފަސް ފައިނަލުން މޮޅުވެ، މުބާރާތުގެ އެންމެ ކާމިޔާބު ޓީމުގެ ރެކޯޑްގައި އަމިއްލަ ނަން ވެސް ހިއްސާކޮށްފަ އެވެ.
ރޭގެ ފައިނަލަކީ އާދިއްތަ ދުވަހުގެރޭ ކުޅެން ތާވަލުކުރި ފައިނަލެއް ނަމަވެސް ވިއްސާރައިގެ ސަބަބުން މެޗު ޖެހުނީ ފަސް ކުރާށެވެ. ވިއްސާރައިގެ ސަބަބުން ރޭ ވެސް މެޗު ނުކުޅެވޭ ހާލަތަށް ދިޔަނަމަ ތަށި ލިބޭނީ ގުޖުރާތަށެވެ. އެއީ ލީގު ބުރުގެ ޕޮއިންޓް ސިސްޓަމަށް ބަލައިގެން، ގަވާއިދުގައި އޮތް ގޮތަށް ކުރިއަށްދިއުމުގެ ގޮތުންނެވެ.
އަހުމަދުއާބާދުގެ ސަރުދާރު ޕަޓޭލް ސްޓޭޑިއަމްގައި ރޭ 80،000 އަށް ވުރެ ގިނަ ސަޕޯޓަރުންގެ ކުރިމަތީގައި ކުޅުނު ފައިނަލް މެޗުގައި ޓޮސް ދިމާވުމުން ޗެންނާއީ އިން ނިންމީ ފީލްޑް ކުރާށެވެ. ގުޖުރާތުން އެންމެ ފުރަތަމަ ކުޅެން އެރި، ރިދިމަން ސާހާ އާއި މި ވަގުތު އެންމެ ފޯމުގައި ހުރި ޝުބްމަން ގިލްގެ ޕާޓްނަޝިޕުން ފެށީ ރަނގަޅަށެވެ. އެ ގޮތުން ސާހާ ނުބައިވީ 39 ބޯޅައިން 54 ލަނޑު ކުރި ފަހުންނެވެ. އެހެން ނަމަވެސް ގިލް އަށް މިއީ އެންމެ ރަނގަޅު މެޗެއް ނޫނެވެ. އޭނާ ނުބައިވީ 20 ބޯޅައިން 39 ލަނޑު ހެދި ފަހުންނެވެ. ގުޖުރާތު ޓީމަށް އެންމެ ރަނގަޅު ކުޅުމެއް ދެއްކީ، 47 ބޯޅައިން 96 ލަނޑު ހެދި ސައި ސުދަރްސަން އެވެ.
ރޭގެ މެޗުގެ ތެރެއިން ޗެންނާއީގެ ރަވިންދުރަ ޖަދޭޖާ ބޯޅަ ފޮނުވާލަނީ.--- ފޮޓޯ: އޭއެފްޕީ
މި އިނިންގްސްގައި 20 އޯވަރުގެ ތެރޭގައި ގުޖުރާތުން ވަނީ ހަތަރު ކުޅުންތެރިން ނުބައިވެގެން 214 ލަނޑު ހަދައިފަ އެވެ.
ވިއްސާރައިގެ ސަބަބުން ޑަކްވޯތު ލެވިސް މެތަޑަށް ބަލައިގެން، 15 އޯވަރަށް ބަލައިގެން ޓާގެޓް ވަނީ 171 ލަނޑަށް ކުޑަކޮށްފަ އެވެ. ޗެންނާއީ ޓީމުން އޯޕަނިން ބެޓްސްމަނުންގެ ގޮތުގައި ކުޅެން އެރި، ރުތުރާޖު ގައިކްވާޑް އާއި ޑެވޯން ކޮންވޭ ވަނީ ރަނގަޅު ކުޅުމެއް ދައްކައިފަ އެވެ. އެ ގޮތުން، ރުތުރާޖް ވަނީ 26 ލަނޑު ހަދައިފަ އެވެ. އަދި ކޮންވޭ ވަނީ 25 ބޯޅައިން 47 ލަނޑު ހަދައިފަ އެވެ.
ދުނިޔޭގެ އެންމެ ބޮޑު ކްރިކެޓް ސްޓޭޑިއަމްގައި ރޭ ކުޅުނު ފައިނަލް މެޗުގައި، ޗެންނާއީ ޕްރެޝަރަށް ދިޔައީ އެ ޓީމުގެ ކެޕްޓަން އަދި ލެޖެންޑަރީ ކްރިކެޓް ތަރި، މަހިންދުރަ ސިންގް ދޯނީ އަށް އެއްވެސް ލަނޑެއް ނުޖެހި ނުބައިވުމުންނެވެ. އެކަމަކު، ދޯނީ ނުބައިވުމުން ދެން ކުޅެން އެރި، ޖަދޭޖާ ވަނީ ތަފާތު ދައްކައިފަ އެވެ. ޖަދޭޖާ ނުބައިނުވެ މެޗު ނިންމާލިއިރު، ފަހު ދެ ބޯޅައިން 10 ލަނޑު ހެދީ އެއް ބޯޅަ ހަޔަކަށް އަދި އަނެއް ބޯޅަ ހަތަރަކަށް ޖަހައިގެންނެވެ. މިއީ، އައިޕީއެލް ތާރީހުގައި ވެސް ހާއްސަ ވަގުތެެކެވެ.
"އަހަންނަށް އެރިއިރު ވެސް އޮތީ މެޗުގެ އޮއެވަރާ މެދު ވިސްނާލެވިފައި. އެ ގޮތުން ކޮންމެ ބޯޅައެއް ވެސް ބާރަށް ޖެހޭތޯ ބެލީ، ކޮންމެ ކަމެއް ވެސް ވެދާނެ ކަމުގެ ޔަގީންކަމާ އެކު ބޯޅައިގައި ޖެހީ، މި އޮތީ އެ ވިސްނުމުގެ އިނާމް ލިބިފައި،" މެޗަށް ފަހު ޖަދޭޖާ އުފަލުން ހުރެ ބުންޏެވެ.
ގުޖުރާތުގެ ކެޕްޓަން، ހާޑިކް ޕާންޑްޔާ ބުނީ ތަށި ދިފާއުކުރެވޭތޯ ޓީމެއްގެ ގޮތުގައި ކުރެވުނު މަސައްކަތާ މެދު ހިތްހަމަޖެހޭ ކަމަށާއި ޗެންނާއީ އަށް ތަށި ލިބުނީ ފަހު ވަގުތާ ހަމައަށް ތަޖުރިބާގެ ބޭނުންހިފައިގެން ކުރި ހިތްވަރުން ކަމަށެެވެ.
