މާލެ ވޯޓާ އެންޑް ސެވެރޭޖް ކޮމްޕެނީ (އެމްޑަބްލިއުއެސްސީ) ގެ ޗެއާމަންގެ މަގާމުގައި ހުންނެވި އަހްމަދު މައުސޫމް އެ މަގާމުން އިސްތިއުފާދެއްވައިފި އެވެ.
މައުސޫމް އިސްތިއުފާދެއްވާފައިވަނީ ވެރިކަން ކުރާ މައި ޕާޓީގެ އެމްޑީޕީ ދޫކޮށް އެ ޕާޓީގެ ރައީސްގެ މަގާމުގައި ހުންނެވި މުހައްމަދު ނަޝީދު އަލަށް އުފައްދަވާފައިވާ ދަ ޑިމޮކްރެޓްސް އާ ގުޅިވަޑައިގަތުމަށްފަހުގަ އެވެ.
"އެމްޑަބްލިއުއެސްސީ ގައި އަޅުގަނޑު ހުރީ އެމްޑީޕީގެ މެންބަރަކަށްވާތީ ލިބުނު ސްލޮޓެއްގައި. އަޅުގަނޑު އެމްޑީޕީއާ ގުޅުނު އަސާސްތައް މިހާރު ގެއްލިފައިވާކަމަށް ގަބޫލުކުރެވޭތީ އަޅުގަނޑު އެމްޑީޕީ އިން ވަކިވީ. މިހާރު އަޅުގަނޑު އެހެން ޕްލެޓްފޯމަކަށް އަރައިފިން. އެހެންވީމާ އެމްޑީޕީގެ މެންބަރަކަށް ވީތީ ލިބުނު މަގާމު ދޫކޮށްލުމަކީ އެންމެ ރަނގަޅު ގޮތް ކަމަށް ގަބޫލުކުރަނީ" މައުސޫމް ވިދާޅުވި އެވެ.
މައުސޫމް މިހެން ވިދާޅުވެފައިވާއިރު، އެމްޑީޕީގެ ރައީސް އަދި ދަ ޑިމޮކްރެޓްސް އުފައްދަވަން މަސައްކަތް ކުރައްވަމުން ގެންދަވާ ނަޝީދު ވަނީ ޑިމޮކްރެޓްސްއާ ގުޅެމުންދާ ސިޔާސީ މަގާމުތަކުގައި ތިބި މީހުން ވަކިކުރަމުން ދާތީ އެކަމާމެދު ނުރުހުން ފާޅުކުރައްވާފަ އެވެ.
ސަރުކާރުން މިއަދު ވަނީ ޑިމޮކްރެޓްސްއާ ގުޅެމުންދާ، ސަރުކާރުގެސިޔާސީ މަގާމުތަކުގައި ތިބި ބައެއް މީހުން މަގާމުން ވަކިކޮށްފަ އެވެ.
އެކަމާ ގުޅިގެން ސުވާލުކުރުމުން ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ، ސިޔާސީ މަގާމުތަކުން ވަކިކުރަމުންދަނީ އެމްޑީޕީގެ ސްލޮޓުތަކުގައި އެ މަގާމުތަކަށް އައްޔަނުކުރި ފަރާތްތައް އެ ޕާޓީން ވަކިވުމުން ކަމަށެވެ. އަދި އެ ފަރާތްތައް މަގާމުން ވަކިކުރަމުން ދަނީ އެމްޑީޕީއިން އެދިގެން ކަމަށް ވެސް މިއުވާން ވިދާޅުވި އެވެ.
މައުސޫމް ފެން ކުންފުނީގެ ޗެއާމަން ކަމަށް އައްޔަންކުރީ މި ސަރުކާރު ވެރިކަމަށް އައިފަހުން 2019 ގަ އެވެ. އެމްޑީޕީގެ ގައުމީ މަޖިލީހުގައި މަކުނުދޫ ދާއިރާ ތަމްސީލް ކުރައްވާ އެ ދާއިރާގެ ރައީސްގެ މަގާމުގައިވެސް ހުންނެވި މައުސޫމަކީ ސިޔާސީ މަސްރަހުގައި ނަޝީދުގެ އަރިސް ބޭފުޅެއްގެ ގޮތުގައި ފާހަގަކުރެވޭ ބޭފުޅެކެވެ.
