ދ. މީދޫ މަސްދޯޏެއްގައި ބަންގްލަދޭޝްގެ މުހައްމަދު ޝާހީން ކިޔާ މީހަކަށް ވަޅިން ހަމަލާދީ މަރާލި މައްސަލައިގައި ދައުވާކޮށްފައިވާ އެ ގައުމުގެ މުހައްމަދު މަސްއޫދު ދައުވާއަށް ޖަވާބުދާރީވުން މިއަދުގެ އަޑުއެހުމުގައި ވެސް ކުރިއަށް ގެންދެވޭ ގޮތް ނުވެ އަޑުއެހުން ނިންމާލައިފި އެވެ.
މާޗު 7، 2021 ވަނަ ދުވަހުގެ ދަންވަރު 3:45 ހާއިރު ދ.މީދޫ "ޖިހާދު" ދޯނި މަސްބޭނުމަށް ކ. ގުރައިދޫ މަސްބޮޔަށް ދިއުމަށް ދުއްވަމުން ދަނިކޮށް، އެ ދޯނީގައި މަސައްކަތްކުރަމުން ދިޔަ ޝާހިން އަށް ވަޅިން ހަމަލާ ދިނުމުން ލިބުނު ޒަހަމްތަކަށް ފަރުވާދެމުންދަނިކޮށް އޭނާ ވަނީ މަރުވެފަ އެވެ.
އެ މައްސަލައިގައި މެއި 5، 2021 ގައި ދައުވާކޮށްފައި ވަނީ އޭނާއާ އެކު އެ ދޯނީގައި މަސައްކަތް ކުރި ބަންގްލަދޭޝްގެ މުހައްމަދު މަސްއޫދުގެ މައްޗަށެވެ. މުހައްމަދުގެ މައްޗަށް ގަސްދުގައި މީހަކު މެރުމުގެ ދައުވާ އުފުލާފައިވާއިރު، އޭނާ ހުރީ ޝަރީއަތް ނިމެންދެން މާފުށީ ޖަލުގައި ބަންދުކޮށްފަ އެވެ.
އޭގެ ފަހުން މިދިޔަ ދެ އަހަރު ދުވަހު މައްސަލާގައި ބޭއްވުނީ އެންމެ އަޑުއެހުމެކެވެ. އޭގެ ފަހުން މި މަސް ތެރޭ އަޑުއެހުމެއް ބޭއްވީ ކްރިމިނަލް ކޯޓަށް އަލަށް އައްޔަންކުރި ގާޒީ އިބްރާހީމް އިހުސާން މި މައްސަލައާ ހަވާލުވުމުންނެވެ.
މިއަދު ހެނދުނު 11:00 ޖަހާއިރު ފަށަން އޮތް އަޑުއެހުން ތިރީހަކަށް މިނެޓު ލަހުން އަޑުއެހުން ފެށުނީ ދައުލަތުން މަސްއޫދަށް ހަމަޖައްސާފައިވާ ދިފާއީ ވަކީލު އަޑުއެހުމަށް ވަނުން ލަސްވެގެންނެވެ. އެހެންވެ އަޑުއެހުން ފަށާފައި ވެސް ގާޒީ ފުރަތަމަ ސާފު ކުރީ އެ ކަމެވެ.
ބަންޑާރަ ނައިބުގެ އޮފީހުން މަސްއޫދަށް ހަމަޖެއްސި ވަކީލު އަހުމަދު ޝިފާއު ވިދާޅުވީ މަސްއޫދު އަމިއްލައަށް ވަކީލަކު ހޯދުމަށް ފަހު އެ ވަކީލަކާ އެކު ކުރިއަށް ގެންދާތާ ދުވަސްތަކެއް ވެއްޖެ ކަމަށެވެ. އަދި މިއަދުގެ އަޑުއެހުމުގައި ބައިވެރިވާނީ އެ ވަކީލު ކަމަށް ހީކޮށްގެން ހުރުމުން އޭނާ ހުރީ ތައްޔާރުވެގެން ނޫން ކަމަށެވެ.
ގާޒީ ދެން ވިދާޅުވީ އެ ވަކީލު އަދިވެސް ކޯޓަށް ވަކީލު ފޯމު ހުށަހަޅާފައި ނެތުމުން ކޯޓުގެ އިދާރާއިން ބަލަމުން ދިޔައީ އަދިވެސް ވަކީލަކީ ޝިފާއު ކަމަށެވެ. އަދި އެ ވަކީލަށް ގުޅުމުން ވެސް އަޑުއެހުމުގައި ބައިވެރިވާނީ ޝިފާއު ކަމަށް އަންގާ ކަން ގާޒީ ފާހަގަ ކުރެއްވި އެވެ.
ދައުވާކޮށްފައިވާ މަސްއޫދުގެ ފަރާތުން ސާފުކުރުމުން އޭނާ ބުނީ އަމިއްލަ ވަކީލަކާ އެކު ކުރިއަށް ދާން ބޭނުންވާ ކަމަށެވެ. އަދި, ވީހާވެސް އަވަހަށް ކޯޓަށް ވަކީލު ފޯމު ހުށަހަޅައިގެން ގެންދަން އެ ވަކީލު ގާތުގައި އެދޭނެ ކަމަށް ވެސް ބުންޏެވެ.
ގާޒީ އިހުސާން ވިދާޅުވީ ދައުލަތުން ވަކީލަކު ހަމަޖައްސަން ޖެހޭ ހާލަތަކީ ވަކީލަކު ހަމަޖެއްސުމުގެ މާލީ ގާބިލިއްޔަތު ކަން ނެތުން ކަމަށާއި، އަމިއްލައަށް ވަކީލަކު ހަމަޖައްސަން ބޭނުންވާ ކަމަށް ބުނާނީ މާލީ ގާބިިލިއްޔަތުކަން އޮތުމުން ކަމަށް ޝަރީއަތުން ދެކޭ ކަމަށެވެ.
އެހެންކަމުން މިހާތަނަށް މައްސަލައިގެ އަޑުއެހުންތަކުގައި ބައިވެރިވާ ދައުލަތުން ހަމަޖައްސާފައިވާ ދިފާއީ ވަކީލު ކުރިއަށް އޮތް ތަނުގައި މަސައްކަތް ކުރަން ނުޖެހޭނެ ކަމަށް ގާޒީ އެންގެވި އެވެ. އަދި މި މައްސަލައިން އެ ވަކީލު ދުރަށް ޖެހިފައިވާ ކަން ބަންޑާރަ ނައިބުގެ އޮފީހަށް އަންގަވަން ވެސް ގާޒީ އެންގެވި އެވެ.
މީގެ އިތުރަށް މިދިޔަ ދެ އަހަރު ދުވަހު މައްސަލަ ކުރިއަށް ނުގޮސް ހުއްޓިފައި އޮތީ މައްސަލަ ހަވާލުކުރި ސެކްޝަންގައި ގާޒީއަކު ނެތުމުން ކަން ވެސް ގާޒީ ސާފުކޮށްދެއްވި އެވެ. މައްސަލަ ލަސްވެފައި އޮތުމުގައި، ދައުލަތުން ހަމަޖެއްސި ވަކީލުގެ އިހުމާލެއް ނެތް ކަމަށް ވެސް ގާޒީ ވިދާޅުވި އެވެ.
ދައުލަތުން މަސްއޫދުގެ މައްޗަށް ކުރި ދައުވާގައިވާ ގޮތުން ޝާހީނަށް ހަމަލާ ދިނީ މުހައްމަދުގެ އަތުގައި އޮތް، ތިލައިގައި ހަ އިންޗު ހުރި ކަޅުކުލައިގެ މުއްގަނޑުލީ ވަޅިއަކުނެވެ. އަދި ހަމަލާ ދީފައި ވަނީ ޝާހީންގެ ކަނާތް ފަރާތު އަރިކަށްޓަށެވެ. އެހެން ނަމަވެސް، އޭނާއަށް ހަމަލާދިން ސަބަބެއް އަދި އެނގިފައި ނުވެ އެވެ.
ޝާހީން މަރުވި ހާދިސާ ހިނގީ، ދޯނީގައި އޮތް ވަލެއް އެއްގަމަށް ބޭލުމާ ގުޅިގެން އަމަލު ކުރި ގޮތަކުން އެ ދެ މީހުންގެ މެދުގައި ހިނގި ޒުވާބެއް ފަހުން ހޫނުވެގެންނެވެ. ތަހުގީގުގައި މުހައްމަދު ދިފާއުވެ ބުނެފައި ވަނީ އެކަން ކުރެވުނީ އޮޅިގެން ކަމަށެވެ.
