މާލެއިން ހުޅުމާލެއަށް ދާ ހައިވޭގައި މިރޭ ދަންވަރު ހިނގި އެކްސިޑެންޓެއްގައި 43 އަހަރުގެ ދިވެއްސަކު މަރުވެއްޖެ އެވެ.
އެ އެކްސިޑެންޓުގައި މަރުވީ ގ. އާވާޒް، ހަސަން ފައިސަލް ކަމަށް ފުލުހުން ބުންޏެވެ.
ސައިކަލެެއް ޕިކަޕެއްގައި ޖެހި ހިނގި އެ އެކްސިޑެންޓު ރިޕޯޓު ފުލުހުންނަށް ކޮށްފައި ވަނީ މިރޭ 12:04 ހާއިރު އެވެ.
"ސައިކަލް ދުއްވަން އިން 43 އަހަރުގެ ދިވެހި ފިރިހެން މީހާ ޓްރީޓޮޕް ހޮސްޕިޓަލަށް ގެންދިޔަ އިރު ވެސް ނިޔާވެފައިވާ ކަމަށް ހޮސްޕިޓަލުން ފުލުހުންނަށް މައުލޫމާތު ދީފައިވޭ،" ފުލުހުން ބުންޏެވެ.
މަންޒަރު ފެނުނު ބައެއް މީހުން "އަދަދު" ނޫހަށް ކިޔައި ދިން ގޮތުގައި އެކްސިޑެންޓުގައި ނިޔާވި މީހާގެ ހަށިގަނޑަށް ވަރަށް ބޮޑަށް ގެއްލުން ލިބި، ބޯފަޅައިގެން ގޮސް، ގިނަ އަދަދެއްގެ ލޭ އޮހޮރިފައިވެ އެވެ.
މި މައްސަލަ ފުލުހުން ދަނީ ތަހުގީގު ކުރަމުންނެވެ.
ހުޅުމާލޭ ފޭސް ދޭއްގައި ސައިކަލެއް ކާރެއްގައި ޖެހި ހިނގި އެކްސިޑެންޓުގައި އަނިޔާވި ޒުވާނަކަށް ހޮސްޕިޓަލްގައި ފަރުވާ ދެމުން ދަނިކޮށް މި މަހުގެ 12 ވަނަ ދުވަހު ވަނީ މަރުވެފަ އެވެ.
