އަންނަ އަހަރު ގަތަރުގައި ބާއްވާ 23 އަހަރުން ދަށުގެ އޭޝިއަން ކަޕްގެ ކޮލިފައިންގައި ރާއްޖެ އާއި އިންޑިއާ، ޗައިނާ އަދި ޔޫއޭއީ އެއް ގްރޫޕެއްގައި ވާދަކުރަން ޖެހިއްޖެ އެވެ.
އަންނަ ސެޕްޓެމްބަރު މަހު 6-12 އަށް ޗައިނާގައި ކުރިއަށްދާ ކޮލިފައިން މެޗުތަކުގައި ރާއްޖޭގެ 23 އަހަރުން ދަށުގެ ޓީމު ވާދަކުރާއިރު، މި ގްރޫޕުން އެއް ވަނަ އަށް އަންނަ އަހަރު އޭޕްރީލް މަހު ގަތަރުގައި ބާއްވާ އޭޝިއާގެ 23 އަހަރުން ދަށުގެ މުބާރާތުން ފުރުސަތު ލިބޭނެ އެވެ.
މީގެ އިތުރުން، ކޮންމެ ގްރޫޕެއްގެ ދެ ވަނަ އަށް ދާ ޓީމަކަށް ވެސް އަންނަ އަހަރު ގަތަރުގައި ބާއްވާ އޭޝިއާ 23 އަހަރުން ދަށުގެ މުބާރާތަށް ދިއުމުގެ ފުރުސަތެއް އޮންނާނެ އެވެ. އެއީ ހުރިހާ ގްރޫޕެއްގެ ދެ ވަނަ ޓީމުތަކުގެ ތެރެއިން އެންމެ ރަނގަޅު ނަތީޖާ ނެރޭ ހަތަރު ޓީމުގެ ތެރޭގައި ހިމެނިގެންނެވެ.
ރާއްޖޭގެ ޒުވާން ޓީމުން، ޗައިނާގައި ކުޅޭ ކޮލިފައިން މެޗުތަކުގެ ޝެޑިއުލަށް ބަލާއިރު، ރާއްޖޭން ސެޕްޓެމްބަރު ހަ ވަނަ ދުވަހު އިންޑިއާއާ ބައްދަލުކުރާނެ އެވެ. އޭގެ ތިން ދުވަސް ފަހުން، ސެޕްޓެމްބަރު ނުވަ ވަނަ ދުވަހު ޔޫއޭއީއާ ކުޅުމަށް ފަހު 12 ވަނަ ދުވަހު ޗައިނާއާ ބައްދަލުކުރާނެ އެވެ.
އާންމު ގޮތެއްގައި، 23 އަހަރުން ދަށުގެ ގައުމީ ޓީމަށް ވެސް ކޯޗުކޮށްދެނީ ސީނިއާ ގައުމީ ޓީމުގެ ކޯޗެވެ. ރާއްޖޭގެ ސީނިއާ ގައުމީ ޓީމުގެ ކޯޗަކަށް މި ވަގުތު ހުރީ އިޓަލީގެ ފްރެންޗެސްކޯ މޮރިއޭރޯ އެވެ.
މޮރިއޭރޯގެ ކޯޗުކަމުގައި މި ވަގުތު ރާއްޖޭން ތައްޔާރުވަމުން އަންނަނީ އަންނަ މަހުގެ 21 އިން ޖުލައި 4 އަށް އިންޑިއާގެ ބެންގަލޫރުގައި ބާއްވާ ސާފް ޗެމްޕިއަންޝިޕް ފުޓްބޯޅަ މުބާރާތަށެވެ. ސާފް ޗެމްޕިއަންޝިޕަށް ޕްރެކްޓިސް ކުރަމުން އަންނަ 30 ކުޅުންތެރިންގެ ޕްރިލިމިނަރީ ސްކޮޑުގައި 23 އަހަރުން ދަށުގެ ކުޅުންތެރިން ހިމެނެ އެވެ.
ރާއްޖޭން އެންމެ ފަހުން އޭޝިއާގެ 23 އަހަރުން ދަށުގެ މުބާރާތުގެ ކޮލިފައިންގައި ކުޅުނީ 2021 ވަނަ އަހަރު އެވެ. އެއީ ބަހްރޭނާއި އިރާގާއި ރާއްޖެ އަދި އަފްގާނިސްތާން އެއް ގްރޫޕެއްގައި އޮތް ފަހަރެކެވެ. އެކަމަކު، އަފްގާނިސްތާން މުބާރާތުން ނަން ނެގުމުން، ރާއްޖޭން ކުޅުނީ ބަހްރޭނާއި އިރާގާ ދެކޮޅަށެވެ. އިރާގުން 4-0 އިން ރާއްޖެ ބަލިކުރިއިރު، ބަހްރޭނުން ރާއްޖޭގެ މައްޗަށް ކުރިހޯދީ 3-0 އިންނެވެ.
