ކުރީގެ ރައީސް މައުމޫން އަބްދުލް ގައްޔޫމް އިސްވެ އުފެއްދެވި މޯލްޑިވްސް ރިފޯމް މޫވްމަންޓު (އެމްއާރުއެމް), އިލެކްޝަންސް ކޮމިޝަން (އީސީ) އިން އުވާލައިފި އެވެ.
"އަދަދު" ނޫހަށް ޔަގީން ކުރެވިފައިވާ ގޮތުގައި އެމްއާރުއެމް އުވާލާފައިވަނީ އެ ޕާޓީއަށް 3,000 މެމްބަރުން ހަމަނުކުރެވިގެންނެވެ. މިކަމާ ގުޅިގެން އިލެކްޝަންސް ކޮމިޝަނުގެ ބަހެއް ހޯދުމަށް ކުރި މަސައްކަތް މިހާތަނަށް ކާމިޔާބު ވެފައި ނުވެ އެވެ.
މިދިޔަ ޖޫން މަހުގެ ތެރޭގައި ވެސް 3000 މެންބަރުން ހަމަނުވެގެން އެމްއާރްއެމް ޕާޓީ އުވާލާނެ ކަމުގެ ނޯޓިސް އޮތީ ދީފަ އެވެ. އެކަމަކު ނޯޓިސް ދިނުމާ ގުޅިގެން އެމްއާރްއެމުން ވަނީ މެންބަރުން ހަމަކޮށްފަ އެވެ.
ނަމަވެސް, އެންމެ ފަހުން އިލެކްޝަންސް ކޮމިޝަނުން އާންމު ކުރި ތަފާސް ހިސާބުތަކުން ދައްކާ ގޮތުގައި އެ ޕާޓީގައި އޭރު ތިބީ އެންމެ 2,900 މެންބަރުންނެވެ.
ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގެންނެވި ކޯލިޝަނުގައި އެމްއާރުއެމް ހިމެނެ އެވެ. އެ ޕާޓީގެ ސްލޮޓުގައި ތިއްބެވި ދެ ބޭފުޅަކު ސަރުކާރުގެ ދެ ވުޒާރާއެއްގެ މިނިސްޓަރުންގެ ގޮތުގައި އެބަތިއްބެވި އެވެ. އެއީ ހެރިޓޭޖު މިނިސްޓަރުގެ ގޮތުގައި ހުންނެވި މައުމޫންގެ ދަރިކަނބަލުން ޔުމްނާ މައުމޫން އާއި ހަޔާ އެޑިއުކޭޝަން މިނިސްޓަރު ޑރ. އިބްރާހިމް ހަސަން އެވެ.
އެ ޕާޓީ އުވާލަން ނިންމާފައިވާއިރު، އެ ޕާޓީގެ އިސްކޮށް ތިއްބެވި 11 މެންބަރަކު ވަނީ މި ފަހުން އިސްތިއުފާ ދީފަ އެވެ.
އެމްއާރުއެމް އުވާލާފައި މިވަނީ ސެޕްޓެމްބަރުގައި އޮންނަ ރިޔާސީ އިންތިހާބާ ގުޅޭގޮތުން އެ ޕާޓީން ގޮތެއް ނިންމާފައި ނުވަނީހެވެ. ކޯލިޝަންގެ ދައުވަތު ރައީސް ސޯލިހު ވެސް ދެއްވާފައިވާއިރު އެ ޕާޓީން ގެންދަނީ ސިޔާސީ އެހެން ބައެއް ޕާޓީތަކާ އެކު ވެސް މަޝްވަރާ ކުރަމުންނެވެ. އަދި, އެމްއާރުއެމްގެ ރައީސްގެ މަގާމުގައި ހުންނެވި ފާރިސް މައުމޫން ވަކިން ވާދަކުރައްވާނެ ކަމުގެ އިޝާރާތެއް ވެސް ވަނީ ދެއްވާފަ އެވެ.
އެމްއާރްއެމްގެ ތާރީހު
ސިޔާސީ ޕާޓީ އުފައްދަން ދިން ހުއްދަ އާއެކު ރައީސް މައުމޫން އެންމެ ފުރަތަމަ ހެއްދެވީ ދިވެހި ރައްޔިތުންގެ ޕާޓީ (ޑީއާރުޕީ) އެވެ. އެ ޕާޓީގެ ތެރޭގައި ދެ ފެކްޝަނެއް އުފެދި، މައްސަލަ ހައްލު ނުވެ ދިގުލައިގެން ދިއުމާ ގުޅިގެން އެމަނިކުފާނު ޕާޓީން ވަކިވެވަޑައިގެން ދެން އުފެއްދެވީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އެވެ.
އެހެންނަމަވެސް، ކޮއްކޯފުޅު އަބްދުالله ޔާމީން ވެރިކަމަށް ވަޑައިގެން ޕީޕީއެމްގެ ކޮންޓްރޯލް އެމަނިކުފާނު ނެންގެވުމުން މައުމޫނަށް ޖެހިވަޑައިގަތީ އެ ޕާޓީ ވެސް ދޫކުރައްވައި އެހެން ސިޔާސީ ހަރަކާތެއް ފައްޓަވާށެވެ. އެ މަސައްކަތުގެ ތެރެއިން އުފަންވީ އެމްއާރުއެމް އެވެ.
އޭގެ ފަހުން 2019 ވަނަ އަހަރުގެ ރިޔާސީ އިންތިހާބަށް މައުމޫން މަސައްކަތް ކުރެއްވީ "މައުމޫން ރީފޯމް މޫވްމަންޓް"ގެ ނަމުގައި ހެދި ސިޔާސީ ހަރަކާތެއްގަ އެވެ. އެ ހަރަކާތް ޕާޓީއަކަށް ބަދަލު ކުރާނެ ކަން އިއުލާނުކުރީ ޖަނަވަރީ 31، 2019 ގަ އެވެ.
