އާޓިފިޝަލް އިންޓެލިޖެންސް (އޭއައި) ގެ އެހީތެރިކަމާއެކު ސްކޭމްކޮށްލުން ފަސޭހަވެފައިވާ މިންވަރު، އެމެރިކާގެ ޓީވީ ޝޯ ސިކްސްޓީ މިނަޓްސްގައި ދައްކާލައިފި އެވެ.
ސިކްސްޓީ މިނަޓްސްގެ އެންމެ ފަހު އެޕިސޯޑްގައި ވަނީ ޓެކްނޮލޮޖީ އާއި އޭއައިގެ އެހީގައި ކުރަމުންދާ ޑިޖިޓަލް ސްކޭމްތަކަށް އަލި އަޅުވާލައިފަ އެވެ. އެގޮތުން މިފަދަ ސްކޭމްތަކުގައި ޖެހި ގެއްލުން ލިބިފައިވާ ފަރާތްތަކުގެ އިތުރުން މިފަދަ ކަންކަން މެދުވެރިކުރުމަށް މަސައްކަތްކުރާ ފަރާތެއްގެ އިންޓަވިއު ވަނީ ގެނެސްދީފަ އެވެ.
ޑިޖިޓަލް ސްކޭމްތަށް މަސައްކަތްކުރާ ގޮތާއި ގުޅޭގޮތުން ވާހަކަދައްކާފައިވަނީ ޑޭޓާ ޕްރޮޓެކްޝަން ފާމް "ސޯޝަލް ޕްރޫފް ސެކިއުރިޓީ" ގެ ސީއީއޯ އަދި އެތިކަލް ހެކަރެއް ކަމަށްވާ ރޭޗަލް ޓޮބެކް އެވެ. ޝޯގައި ޓޮބެކް ވަނީ އަދުގެ ޓެކްނޮލޮޖީ އާއި އޭއައި ބޭނުންކޮށްގެން ސްކޭމް ކުރުމަށް ފަސޭހަވެފައިވާ މިންވަރު ދައްކާލައިފަ އެވެ.
އެގޮތުން ޓޮބެކް ވަނީ ޝޯ ހުށަހަޅައިދޭ ފަރާތެއް ކަމަށްވާ ޝެރިން އަލްފޮންސީގެ ނަމުގައި، ޝޯގައި މަސައްކަތް ކުރާ އެހެން މުވައްޒަފަކަށް ގުޅާފަ އެވެ. އެ މުވައްޒަފު ފޯނު ރިންގުވާން ފެށުމުން ފޯނަށް ބަލާލި ވަގުތު ސްކްރީނުގައި އިނީވެސް ޝެރިންގެ ނަމެވެ. މިއީ "ސްޕޫފިން ޓޫލް" އެއް ބޭނުންކޮށްގެން ޓޮބެކްކޮށްފައިވާ މަސައްކަތެކެވެ.
ނަމަވެސް އެކަން ނޭނގޭ މުވައްޒަފު އެއްވެސް ޖެހިލުމެއް ނެތި ފޯނަށް ޖަވާބުދިނެވެ. ޖަވާބުދިނުމުން އަޑު އިވުނީ ޝެރިންގެ އަޑެވެ. ޝެރިންގެ އަޑުން އެދުނީ އޭނާގެ ޕާސްޕޯޓް ނަންބަރު ކިޔަލާދިނުމަށެވެ.
އެ އަޑަކީ ވެސް ޓޮބެކްގެ މަސައްކަތެވެ. ޓޮބެކް ޝެރިންގެ އަޑު "ކްލޯން" ކޮށްފައިވަނީ އޭއައި ޓޫލެއް ބޭނުންކޮށްގެނެވެ. އެ ޓޫލްއިން، މީހެއްގެ އަޑުގެ ސާމްޕަލްތަކެއް ދިނުމުން އެމީހެއްގެ އަސްލު އަދި ސާފު އަޑު ޖެނެރޭޓްކޮށްދެ އެވެ.
އެހެންކަމުން އެއްވެސް ޝައްކެއް ކުރުމެއް ނެތި މުވައްޒަފު ފޯނުގައި ހުރެ ޝެރިންގެ ޕާސްޕޯޓް ނަންބަރު ހޯދާލުމަށް ފަހު ކިޔައިލައިފި އެވެ. ޓޮބެކް ބޭނުންވާ މައުލޫމާތު ހޯދުމަށް ފަހު ފޯނު ކޯލު ނިންމާލި އެވެ.
މިކަން ހިނގުމަށް ފަހު ޓޮބެކް، ޝެރިން އަދި ސްކޭމްވި މުވައްޒަފު އެލިޒަބަތް އެއް މޭޒަކަށް އެރި އެވެ. ޓޮބެކް ގެ ލެޕްޓޮޕުން އެވަގުތު ވަނީ އޭނާ އެލިޒަބަތްއަށް ގުޅައިގެން ބޭނުންކުރި އަޑު ޕްލޭ ކޮށްލައިފަ އެވެ.
އެލިޒަބަތްއަށް ލިބުނު ފޯން ކޯލަކީ އަސްލު ޝެރިންއެއް ނޫންކަން އޭނާއަށް އެނގުނީ އެހިސާބުންނެވެ. އެވަގުތު ޓޮބެކް މިފަދަ ސްކޭމްތަކާއި ބެހޭގޮތުން ކޮންމެސް ވަރަކަށް ވާހަކަދައްކާލި އެވެ.
ޓޮބެކް ބުނީ އޭނާ އެލިޒަބަތްގެ ފޯނު ނަންބަރު ހޯދީ އިންޓަނެޓުން ކަމަށެވެ. އަދި ޝެރިންގެ އަޑު "ކްލޯން" ކުރުމަށް އޭނާ ބޭނުންކުރި ބައެއް ކްލިޕްތައް ދައްކާލި އެވެ.
ޓޮބެކް ބުނީ މިފަދަ ސްކޭމްތަކަށް އެތައް ބަޔަކު ހެއްލިގެންދާ ކަމަށާއި ޓެކްނޮލޮޖީ ކުރި އަރައިގެން ދިޔުމުގެ ސަބަބުން އޮޅުވާލުންތައް ދެނެގަތުމަށް އުދަނގޫވާ ކަމަށެވެ. އޭނާ ބުނީ ބައެއް ހާލަތްތަކުގައި ސްކޭމަރުން އެމީހުން ނުދަންނަ މީހުންނަށް ވެސް ގުޅާ ކަމަށާއި ނަމަވެސް މިފަދަ ހާލަތުގައި އެއީ ވަކި މީހަކާ ގުޅުމެއް އޮންނަ މީހެއްކަން ދެނަހުރެ، އެމީހާއަށް ވާކަމަށެވެ.
ބައެއް ދިރާސާތަކުން ދައްކާގޮތުގައި މިޒަމާނުގައި ގެއަށް ވަދެ ވައްކަން ކުރުމަށް ވުރެ "ޑިޖިޓަލް ވައްކަން" ކުރުމުގެ ފުރުސަތު ބޮޑެވެ. އެފްބީއައިގެ ރިޕޯޓަކުން ދައްކާގޮތުގައި އޮންލައިން ސްކޭމްތަކާއި ޑިޖިޓަލް ފްރޯޑްތަކުގައި އެމެރިކާގެ ރައްޔިތުންގެ އަތުން 10 ބިލިއަން ޑޮލަރު މިދިޔަ އަހަރު ގެއްލިފައިވެ އެވެ.
ރާއްޖޭގައި ވެސް މިފަދަ ސްކޭމް ކުރުންތައް ދަނީ އިތުރުވަމުންނެވެ. އެގޮތުން މުއައްސަސާތަކުގެ ނަމުގައި އާންމުންނަށް ގުޅާ ޒާތީ މައުލޫމާތު ހޯދުމަށް މަސައްކަތްކުރެ އެވެ. އޭގެ އިތުރުން ރައްޓެހިންނާއި އާއިލާ މީހުންގެ ނަމުގައި މެސެޖުތައް ފޮނުވުމުގެ އިތުރުން ތަފާތު ލިންކުތައް މެދުވެރިކޮށް ޑިޖިޓަލް ވައްކަންކުރުން ވަނީ އިންތިހާއަށް އިތުރުވެފަ އެވެ. މިފަދަ ކަންކަމަށް އާންމުން ހޭލުންތެރިކުރުމަށް ކަމާބެހޭ އިދާރާތަކުން އަންނަނީ މަސައްކަތްކުރަމުންނެވެ.
