އެފްއޭއެމް އިން ސާފް ޗެމްޕިއަންޝިޕް ފުޓްބޯޅަ މުބާރާތަށް އެންމެ ފުރަތަމަ އިއުލާނުކުރި 40 ކުޅުންތެރިންގެ ސްކޮޑުން، 10 ކުޅުންތެރިން ބާކީވެ، 30 ކުޅުންތެރިންނާ އެކު ރޭ ޕްރެކްޓިސްތައް ފަށައިފި އެވެ.

އަންނަ މަހު 23 ވަނަ ދުވަހު އިންޑިއާގެ ބެންގަލޫރުގައި ފެށުމަށް ހަމަޖެހިފައިވާ ސާފް ޗެމްޕިއަންޝިޕަށް އެކުލަވާލި 40 ކުޅުންތެރިންގެ ޕްރިލިމިނަރީ ސްކޮޑު އިއުލާންކުރީ މިދިޔަ ހަފްތާގަަ އެވެ. ނަމަަވެސް އިއްޔެ ޕްރެކްޓިސް ފެށީ 10 ކުޅުންތެރިން ބާކީކޮށްފަ އެވެ. "އަދަދު" އަށް އެނގިފައިވާ ގޮތުގައި އޭގެ ތެރެއިން ގިނަ ކުޅުންތެރިން ޓީމާ ނުގުޅުނީ އަމިއްލަ ސަބަބުތަކެއް ހުރުމުންނެވެ.

ބާކީވި 10 ކުޅުންތެރިންގެ ތެރޭގައި އީގަލްސްގައި މޮޅު ކުޅުމެއް ދައްކަމުން އަންނަ އެ ޓީމްގެ ކެޕްޓަން އަހުމަދު ރިޒުވާން (ރިޒޭ)ގެ އިތުރުން ދެން ހިމެނެނީ އީގަލްސްގެ އަހުމަދު ހަސަން (އައްމަޑޭ)، މާޒިޔާ ސްޕޯޓްސް އެންޑް ރެކްރިއޭޝަންގެ ހަސަން ނަޒީމް (ޗޯޓު)، ޔުނައިޓެޑް ވިކްޓަރީގެ ޝިފާން ހަސަން (ޝިފާންޓެ)، ކްލަބު ގްރީން ސްޓްރީޓްސްގެ އަންސަރު އިބްރާހީމް (އަންކޮ) އާއި މުހައްމަދު ޖައިލަމް (އޮގީ)، ބުރު ސްޕޯޓްސް ކްލަބުގެ ފާރޫގު އިސްމާއީލް، މުހައްމަދު ސާއިފް، ސުޕަ ޔުނައިޓެޑް ސްޕޯޓްސްގެ ވިޝާހު އަބްދުލް މަޖީދުގެ އިތުރުން ކްލަބު ވެލެންސިއާގެ އަބްދުﷲ ޔާމީން (ޔާނު) އެވެ.

މި ފަހަރުގެ ސްކޮޑުން މުޅިން އަލަށް ޖާގަ ހޯދި ފާހަގަކޮށްލެވޭ ކުޅުންތެރިންގެ ތެރޭގައި ޔުނައިޓެޑް ވިކްޓަރީ އަށް ކުޅޭ 17 އަހަރުގެ ފޯވާޑް، ޝަނާން ރަޝީދު، ސަސްގެ އަހުމަދު އައިހަމް (ފަތޯ) އަދި ބުރުގެ އިބްރާހީމް އުސާމާ ހިމެނެ އެވެ.

ގައުމީ ޓީމުން އަންނަ މަހުގެ ފަސް ވަނަ ދުވަހާ ހަމައަށް ޕްރެކްޓިސް ކުރާނީ މާލޭގަ އެވެ. އޭގެ ފަހުން ޖޫން ފަސް ވަނަ ދުވަހު ޖަޕާނަށް ފުރާނެ އެވެ. ޖަޕާންގައި ތަމްރީން ހެދުމަށް ފަހު ސާފް ޗެމްޕިއަންޝިޕަށް އިންޑިއާއަށް ފުރާނީ ޖަޕާން މަގުންނެވެ.

މި ފަހަރުގެ ސާފް ޗެމްޕިއަންޝިޕަކީ ސާފް ސަރަހައްދުން ބޭރުގެ ދެ ޓީމެއް ހިމަނަައިގެން ކުޅޭ ފުރަތަމަ މުބާރާތެވެ. މި ގޮތުން ސާފުން ދައުވަތު ދީގެން ކުވެއިތު އާއި ލެބަނަން މި ފަހަރުގެ މުބާރާތުގައި ވާދަކުރާނެ އެވެ.

ރާއްޖެ ހިމެނެނީ ލެބަނަން، ބޫޓާން އަދި ބަންގްލަދޭޝްއާ އެކު ގްރޫޕް ބީގަ އެވެ. ގްރޫޕް އޭގައި ހިމެނެނީ އިންޑިއާ، ކުވެއިތު، ނޭޕާލް އަދި ޕާކިސްތާން އެވެ.

ސާފް ޗެމްޕިއަންޝިޕަށް ނެގި 30 ކުޅުންތެރިންގެ ސްކޮޑު:

މާޒިޔާ ސްޕޯޓްސް އެންޑް ރެކްރިއޭޝަން:

ސަމޫހު އަލީ (ސަަމުއްޓެ)، އަހުމަދު ނޫމާން (ހެލްމެޓް)، ހުސެއިން ސިފާއު (ކުރޯ)، އިބްރާހިމް އައިސަމް، ހައިޝަމް ހަސަން (ބިޑި)، ހަސަން ރާއިފް (ހަންނަ)، ހުސެއިން ނިހާން (ނިހާޓް)، ހަސަން ޝިފާޒް (ޑުންގާ)، ހަމްޒާ މުހައްމަދު (ހަމްޕު)، ހުސެއިން ޝަރީފް (ހުސެން)، ނާއިޒް ހަސަން (ދާދު)، މުހައްމަދު އިރުފާން (އިރޭ)، އަލީ ފާސިރު (ސެންޓޭ)، މުހައްމަދު ފައިސަލް

ކުލަބު އީގަލްސް:

މުހައްމަދު ޝަފީއު (ޗެކް)، އިބްރާހިމް މަހުދީ ހުސެއިން (ފޭދޫ އިއްބެ)، ނިޝާމް މުހައްމަދު ރަަޝީދު (ޕޮގްބާ)، ހުމެއިދު ހުސެއިން

ސުޕަ ޔުނައިޓެޑް ސްޕޯޓްސް:

މުހައްމަދު ސަހާއު (ބޭލް)، އަހުމަދު އައިހަމް (އައިހު)، މުހައްމަދު ނިޒާމް (ޕީކޭ)، އަހުނަފް ރަޝީދު (އަހުއްކޮ)

ބުރު ސްޕޯޓްސް ކްލަބް:

އިބްރާހިމް އުސާމާ، މުހައްމަދު ނާއިމް، ޝައިހާން އަލީ

ޔުނައިޓެޑް ވިކްޓަރީ:

އަހުމަދު ބައްސާމް މުހައްމަދު ނައީމް (ބައްކު)، އަލީ ނާޖިހު (ނާޖީ)، ޝަނާން ރަޝާދު

ކުލަބު ވެލެންސިއާ:

އިބްރާހިމް ވަހީދު ހަސަން (އިއްބެ)

ޓީސީ ސްޕޯޓްސް ކުލަބު:

އަހުމަދު މާއިޝް ރަޝީދު (މާއި)