މިލާން (މެއި 14) - އިޓާލިއަން ލީގުގައި ރޭ ސްޕެޒިއާ އަތުން 2-0 އިން ބަލިވެ، އޭސީ މިލާނަށް ލީގުގެ ގަދަ ހަތަރެއް ލިބުމުގެ ފުރުސަތު ކުޑަވެފައިވާއިރު، ސަސުއޯލޯގެ މައްޗަށް 4-2 އިން ކުރިހޯދައި އިންޓަ މިލާން ލީގުގެ ތިން ވަަނަ އަށް ޖެހިލައިފި އެވެ.
ލީގުގެ ތިން ވަނަ އަށް އިންޓަ އެރީ ދެ ވަނައިގައި އޮތް ޔުވެންޓަސް އަށް ވުރެ އެއް މެޗު އިތުރަށް ކުޅެގެން އެ ޓީމާ އެއްވަރަށް ޕޮއިންޓް ހޯދައިގެންނެވެ. ޔުވެންޓަސް އަށް 34 މެޗުން 66 ޕޮއިންޓް ލިބިފައިވާއިރު، އިންޓަ އިން 66 ޕޮއިންޓް ހަމަކުރީ 35 މެޗު ކުޅެގެންނެވެ. ރޭގެ ނަތީޖާއާ އެކު މިލާން ވަނީ 35 މެޗު ކުޅެގެން 61 ޕޮއިންޓް ހޯދައިފަ އެވެ. މި ވަގުތު އެ ޓީމު އޮތީ ލީގުގެ ފަސް ވަނައިގަ އެވެ.
ޗެމްޕިއަންސް ލީގުގެ ސެމީ ފައިނަލްގެ ފުރަތަމަ ލެގުގައި މިދިޔަ ބުދަ ދުވަހުގެރޭ މިލާންގެ ހޯމް މެޗުގައި އިންޓަ ވަނީ 2-0 އިން މޮޅުވެފަ އެވެ. މި ދެ ޓީމު ކުޅޭ ދެ ވަނަ ލެގު މެޗަށް އެކަށީގެންވާ ބްރޭކެއް ދޭން ލީގު މެޗު ކުޅެފައިވަނީ ރޭގަ އެވެ.
ރެލިގޭޝަނުގައި އޮތް ސްޕެޒިއާ އިން ރޭ މިލާން ބަލިކުރި ދެ ގޯލު ވެސް ޖެހީ މެޗުގެ ފަހު 15 މިނިޓްގެ ތެރޭގަ އެވެ. ލީގުގެ 18 ވަނައިގައި އޮތް ސްޕެޒިއާ އަށް 75 ވަނަ މިނިޓްގައި ލީޑުނަގައިދިނީ ޕްރެޒެމީސްލާފް ވިސްނިއޭވްސްކީ އެވެ. ލީޑުނަގައިދިންތާ 10 މިނިޓް ފަހުން، ސްޕެޒިއާ އިން ވަނީ ދެ ވަނަ ގޯލެއް ޖަހައިފަ އެވެ. މި ލަނޑަކީ ހިލޭ ޖެހުމަކުން ސަލްވަޓޯ އެސްޕޮސީޓޯ ޖެހި ގޯލެކެވެ.
މި މެޗަށް ފަހު މިލާންގެ ކޯޗު ސްޓެފާނޯ ޕިއޯލީ ބުނީ މިލާން ކުޅުންތެރިންގެ ފޯކަސް މާ ބޮޑަށް ހުރީ ޗެމްޕިއަންސް ލީގުގެ މެޗަށް ކަމަށާއި، އެހެންވެ، މެޗުގެ ފަހު ކޮޅުގައި ވަރުބަލިކަން އިހުސާސްވި ވަގުތުގައި އަތުން މެޗު ގެއްލުނީ ކަމަށެެވެ.
ސަސުއޯލޯ ކޮޅަށް އިންޓަ އިން ޖެހި ހަތަރު ގޯލުގެ ތެރެއިން ދެ ލަނޑު ޖެހީ ފަހަކަށް އައިސް ފޯމަކަށް އެޅެމުން އަންނަ ރޮމެއޫ ލުކާކޫ އެވެ. އަނެއް ދެ ގޯލަކީ ސަސުއޯލޯގެ ރުއާން އަތުން ބައިކޮޅަށް ވަން ގޯލެއްގެ އިތުރުން އިންޓަގެ ލަޓާރޯ މާޓީނޭޒް ޖެހި ގޯލެކެވެ.
މެޗު ފަށައިގެން ސަސުއޯލޯގެ ޑޮމެނިކޯ ބެރާޑީ އެ ޓީމަށް ޖަހައިދިން ގޯލެއް ވީޑިއޯ އެސިސްޓަންޓް ރެފްރީ (ވީއޭއާރް) އިން ނިންމީ ބަލައިނުގަންނާށެެވެ. އިންޓަ އިން ތިން ގޯލުގެ ލީޑެއް ނެގި ފަހުން ސަސުއޯލޯގެ ދެ ގޯލު ޖެހީ މަތިއުސް ހެންރީކޭ އާއި ޑާވިޑޭ ފްރަޓޭސީ އެވެ.
