ކަސްޓަމަރުންނަށް އިތުރު ރައްކާތެރިކަމެއް ހޯދައިދިނުމުގެ ގޮތުން ބީއެމްއެލް މޯބައިލް ބޭންކިން ލޮގިންއަށް ޓޫފެކްޓާ އޮތެންޓިކޭޝަން މިއަދު ތައާރަފްކޮށްފި އެވެ.
ބީއެމްއެލް އިން ބުނީ އެ އަޕްޓޭޑާއެކު، ލޮގިންވާ ފަރާތަކީ ރަޖިސްޓްރީވެފައިވާ ކަސްޓަމަރުކަން ޔަގީން ކުރުމަށް ޓަކައި އިތުރު ސެކިއުރިޓީ ލެޔާއެއް އިތުރުކުރެވިގެންދާނެ ކަމަށެވެ.
އެގޮތުން އެޕު އަޕްޑޭޓު ކުރުމާއެކު، މޯބައިލް ބޭންކިން އެޕަށް ލޮގިންވުމަށް ފަހު، ލޮގިންވުމުގެ ދެވަނަ މަރުހަލާއެއްގެ ގޮތުގައި އޯޓީޕީ (ވަން ޓައިމް ޕާސްވޯޑް) ޖަހަންޖެހޭނެ އެވެ. ރަޖިސްޓްރީކޮށްފައިވާ މޯބައިލް ނަންބަރު ނުވަތަ އޮތެންޓިކޭޓާ އެޕު މެދުވެރިކޮށް ވެސް އޯޓީޕީ ޖެނެރޭޓް ކުރެވޭނެ ކަމަށް ބީއެމްއެލުން ބުނެ އެވެ.
އެ ހިދުމަތް ތައާރަފު ކުރުމާއެކު މޮބައިލް ބޭންކިންގެ ޕާސްވޯޑު އެހެން މީހަކަށް ލިބިފައި އޮތަސް، އޯޓީޕީ ނުޖަހައި ދެން އެޕްލިކޭޝަނަކަށް ލޮގިންއެއް ނުވެވޭނެ އެވެ.
ބީއެމްއެލްގެ އިންޓަނެޓު ބޭންކިންއާއި މޮބައިލް ބޭންކިންގެ ސެކިއުރިޓީ އިތުރަށް ވަރުގަދަ ކުރުމުގެ މަސައްކަތް އެ ބޭންކުން އިތުރު ކޮށްފައިވަނީ އޮޅުވާލައިގެންނާއި އެކިގޮތްގޮތުން މީސްމީހުންގެ އެކައުންޓުތަކުން ވައްކަންކޮށް ފޭރެމުންދާ މިންވަރު އިތުރުވުމާ ގުޅިގެންނެވެ.
މިބަދަލާ ގުޅޭގޮތުން ބީއެމްއެލްގެ އޮފިޝަލަކު ވިދާޅުވީ ސްކޭމްތައް ހިންގާ ފަރާތްތަކުން އެމީހުންގެ އުކުޅުތައް އެކި ދުވަސްވަރު އެކި ގޮތްގޮތަށް ބަދަލަކުރަމުން އަންނަ ކަމަށާއި ކަސްޓަމަރުންގެ ރައްކާތެރިކަން ކަށަވަރުކުރުމަށް ބޭންކުން މެދު ނުކެނޑި ދަނީ މަސައްކަތްތައް ކުރަމުން ކަމަށެވެ.
"އެގޮތުން މާޗު 2023 ގައި، ބޭންކުންވަނީ ހުރިހާ ސްކޭންޓުޕޭ މުއާމަލާތްތަކަށް ވަން ޓައިމް ޕާސްވޯޑް (އޯޓީޕީ) ބޭނުންކުރަންޖެހޭ ގޮތަށް ހަމަޖައްސައި، އިންޓަނެޓް އަދި މޯބައިލް ބޭންކިންއަށް ލޮގިންވާ ކޮންމެ ފަހަރަކު އެލާޓްސް ދާގޮތަށް ހަމަޖައްސާފައި،" އޭނާ ވިދާޅުވި އެވެ.
އޭގެއިތުރުން ވެސް އެ ބޭންކުން ވަނީ އޮތެންޓިކޭޓާ އެޕުތައް މެދުވެރިކޮށް އޯޓީޕީ ޖެނެރޭޓްކުރެވޭ ގޮތް ހަމަޖައްސައި، ޑިފޯލްޓް އޯޓީޕީ ޗެނެލެއްގެ ގޮތުން އީމެއިލް މެދުކަނޑާލައި އިންޓަނެޓް އަދި މޯބައިލް ބޭންކިން މެދުވެރިކޮށް ކުރާ ހުރިހާ މުއާމަލާތްތަކަށް ޕުޝް ނޮޓިފިކޭޝަން ފޮނުވަންފަށާފަ އެވެ.
ބީއެމްއެލުން ބުނީ މިވަގުތު އަދި ޓޫފެކްޓާ އޮތެންޓިކޭޝަންގެ ހިދުމަތް ލިބޭނީ ހަމައެކަނި މޮބައިލް ބޭންކިންއަށް ކަމަށާއި މި ފެށޭ ހަފްތާ ތެރޭގައި އެ ހިދުމަތް އިންޓަނެޓް ބޭންކިންއަށް ވެސް ލިބިގެންދާނެ ކަމަށެވެ.
ކަސްޓަމަރުންގެ ޒާތީ މައުލޫމާތު އެހެން ފަރާތަކާ ހިއްސާނުކުރުމަށާއި ދޭތެރެ ދޭތެރެއިން ޕާސްވޯޑް ބަދަލުކުރުމާއި ވަރުގަދަ ޕާސްވޯޑެއް ބޭނުންކުރުމަށް ބީއެމްއެލްއިން އިލްތިމާސްކުރެ އެވެ.
