މިލާން (މެއި 7) - އިޓާލިއަން ލީގުގައި ރޭ ކުޅުނު މެޗުތަކުން އޭސީ މިލާނާއި އިންޓަ މިލާނުން ގަދަ ހަތަރެއްގެ ރޭހުގައި ކުރިއަށްދާން މުހިންމު މޮޅެއް ހޯދައިފި އެވެ.
އެ ގޮތުން، ރޯމާ އަތުން އިންޓަ 2-0 އިން މޮޅުވިއިރު، ލާޒިއޯގެ މައްޗަށް މިލާނުން ކުރިހޯދީ 2-0 އިންނެވެ. މި ދެ ޓީމުން ދެން ކުރިމަތިލާނީ އަންނަ ބުދަ ދުވަހުގެރޭ ކުޅޭ ޗެމްޕިއަންސް ލީގުގެ ސެމީ ފައިނަލުގެ ފުރަތަމަ ލެގަށެވެ.
ލީގުގެ އެއް ވަނައިގައި އޮތީ 33 އަހަރު ތެރޭ ފުރަތަމަ ފަހަރަށް ޗެމްޕިއަންކަން ޔަގީންކޮށްފައި އޮތް ނަޕޯލީ އެވެ. ނަޕޯލީ އަށް 33 މެޗުން 80 ޕޮއިންޓް ލިބިފައިވާއިރު، ދެ ވަނައިގައި އޮތް ލާޒިއޯ އަށް ވަނީ 34 މެޗުން 64 ޕޮއިންޓް ލިބިފަ އެވެ. ތިން ވަނައިގައި އޮތް ޔުވެންޓަސްގެ އޮތީ 33 މެޗުން 63 ޕޮއިންޓް އެވެ. ހަތަރެއްގައި އޮތް އިންޓަ އިން ވަނީ 34 މެޗުން 63 ޕޮއިންޓް ހޯދައިފަ އެވެ. އަދި މިލާނުން ވެސް ވަނީ ރޭގެ މޮޅާ އެކު، 34 މެޗުން 61 ޕޮއިންޓް ހޯދައިފަ އެވެ.
ހޯސޭ މޮރީނިއޯ ކޯޗުކޮށްދޭ ރޯމާ ދަނޑުގައި އެ ޓީމަށް ލީޑުނަގައިދޭން ލޮރެންޒޯ ޕެލެގްރީނީ ޖެހި ބޯޅަ ކީޕަރު އަންދްރޭ އޮނާނާ އަތުގައި ޖެހިފައިވަނީ ކޯނަރަކަށް ބޭރުވެފަ އެވެ. އިންޓަ އިން ލީޑުނެގީ މެޗުގެ 33 ވަނަ މިނިޓްގައި ޑެންޒެލް ޑަމްފްރީސް ނަގައިިދިން ހުރަހަކުން ފެޑެރީކޯ ޑި މާކޯ ޖެހި ގޯލުންނެވެ.
ރޯމާ ޑިފެންޑަރުން ހެދި ގޯހެއްގެ ފައިދާނަގައި، ލަޓާރޯ މާޓިނޭޒް ހުސްކޮށްލާފައި ދިން ބޯޅައަކުން ރޮމެލޫ ލުކާކޫ ވަނީ މެޗުގެ 74 ވަނަ މިނިޓްގައި އިންޓަގެ ދެ ވަނަ ގޯލު ޖަހައިފަ އެވެ. އޭގެ ފަހުން، އިންޓަ އަށް ތިން ވަނަ ގޯލެއް ޖަހައިދޭން ލަޓާރޯ ޖެހި ބޯޅަ އަމާޒުވީ ގޯލުގެ ހުރަސްދަނޑިއަށެވެ.
އަމިއްލަ ދަނޑުގައި ކުޅުނު މިލާނަށް ރޭގެ މެޗު ފަށައިގެން ދިމާވި އެންމެ ބޮޑު މައްސަލަ އަކީ މި ވަގުތު ރަނގަޅު ފޯމެއްގައި ހުރި ޕޯޗުގީސް ވިންގް، ރަފައެލް ލެއާއޯ އަށް އަނިޔާވެގެން މެޗުގެ 10 ވަނަ މިނިޓާ ހަމައިން ބަދަލުކުރަން ޖެހުމެވެ. އޭގެ ހަ މިނިޓް ފަހުން، އޭރިއާތެރެއިން އޮލިވިއޭ ޖިރޫޑް ދިން ބޯޅައަކުން އިސްމާއިލް ބެނަސޭރު ވަނީ މިލާނަށް ލީޑުނަގައިދީފަ އެވެ.
މެޗުގެ 29 ވަނަ މިނިޓްގައި މިލާނުން ވަނީ ދެ ވަނަ ގޯލު ޖަހައިފަ އެވެ. މިއީ އިންޑިވިޖުއަލީ ބަލާއިރު މިލާނުގެ ފުލްބެކް، ތެއޯ ހެނާންޑޭޒްގެ މޮޅު ގޯލެކެވެ. އަމިއްލަ ހާފުގެ ތެރެއިން ބޯޅަ ހިފައިގެން ގޮސް، ލާޒިއޯ ހާފުގެ ތެރެއިން އޭރިއާބޭރުން ތެއޯ ޖެހި ބޯޅަ އަމާޒުވީ ގޯލުގެ މަތީ ކަނަށެވެ.
