ކުދި އަދި މެދުފަންތީގެ ވިޔަފާރިތަކަށް މާލީ އެހީތެރިކަން ހޯދުމަށްޓަކައި ލޯނަށް ހުށަހަޅާ ޕޯޓަލް އަޕްގްރޭޑް ކުރުމަށްފަހު ލޯނަށް އެދި ހުށަހެޅުމުގެ ފުރުސަތު އަލުން ހުޅުވާލައިފި އެވެ.
އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އިން ޕޯޓަލް އަޕްގްރޭޑު ކުރުމަށްޓަކައި ދެ ލޯނު ފިޔަވައި އެހެން ލޯނުތަކަށް އެދި ހުށަހެޅުމުގެ ފުރުސަތު މެދުކަނޑާލީ މިދިޔަ ޑިސެމްބަރު މަހެވެ. އޭރު ހުށަހެޅުމުގެ ފުރުސަތު ހުޅުވާލާފައި އޮތީ ދަނޑުވެރިކަމަށް ހާއްސަކޮށް ދޫކުރާ ލޯނާއި، ކަނޑުފަޅު ނަފާ ލޯނަށް އެކަންޏެވެ.
ނަމަވެސް, އެސްއެމްއީ ޕޯޓަލް އަޕްގްރޭޑްކޮށް މިއަދު އިފްތިތާހު ކުރުމާއެކު ދެން އެހެނިހެން ލޯނުތަކަށް ވެސް އެދެވޭނެ އެވެ. އެގޮތުން ވިޔަފާރި ތަރައްގީ, ހަރުމުދާ, ވިޔަފާރި އެހީ އަދި ރަށުފަތުރު ލޯނުތަކަށް އެދި ހުށަހެޅޭނެ ކަމަށް އެސްޑީއެފްސީން ބުނެ އެވެ.
އެ ކޯޕަރޭޝަނުން ބުނީ, އަޕްގްރޭޑު ކުރި އެސްއެމްއީ ޕޯޓަލުން ލޯނަށް އެދި ހުށަހެޅުމުގެ އިތުރުން ލޯނުގެ އެކި މަރުހަލާތަކުގެ އަޕްޑޭޓު ބެލުމާއި, ޕޯޓަލް މެދުވެރިކޮށް ފަސޭހަކަމާއެކު ލޯނާ ގުޅޭ އެކި ކަންކަމުގައި އެހީތެރިކަން ލިބޭނެ ކަމަށެވެ. އެގޮތުން, އެޕޮއިންޓްމަންޓު ހަމަޖެއްސުމާއި, މައުލޫމާތު ސާފުކުރުުމާއި އެއްތަނަކުން ލޯނާ ގުޅޭ ހުރިހާ ލިޔެކިއުންތަކާއި ކަސްޓަމަރުންގެ މައުލޫމާތު ބެލެހެއްޓޭނެ ކަމަށް ވެސް އެސްޑީއެފްސީން ބުނެ އެވެ.
އެސްޑީއެފްސީން އިތުރަށް ބުނީ އާ ޕޯޓަލުގައި ކަސްޓަމަރު ހިޔާރުކުރާ އެންމެ އެކަށޭނެ ލޯނެއް ދެނެގަތުމަށް އެހީތެރިވެދޭ ލޯން ޕްރޮޑަކްޓް ވިޒާޑެއް ގާއިމްކުކޮށް, ޕޯޓަލްގެ ނެވިގޭޝަން ފަސޭހަ ކުރުމަށް ސާޗް ފީޗާއެއް ވެސް ތައާރަފުކޮށްފައިވާ ކަމަށެވެ.
އެސްޑީއެފްސީން މިއަދު ނެރުނު ބަޔާނުގައި ބުނީ ނޮވެމްބަރު 8, 2020 އިން ފެށިގެން މުޅިން އޮންލައިންކޮށް ލޯނަށް އެދި ހުށަހަޅާ ރާއްޖޭގެ ފުރަތަމަ މާލީ އިދާރާއަށް އެ ކޯޕަރޭޝަން ވެގެން ދިއުމާއެކު މިދިޔަ މާޗު މަހުގެ ނިޔަލަށް 1387 ލޯނު އެޕްރޫވްކޮށްފައިވާ ކަމަށެވެ. އަދި އެއީ 1.67 ބިލިއަން ރުފިޔާ ކަމަށް ވެސް އެ ކުންފުނިން ބުނެ އެވެ.
އެސްޑީއެފްސީއަކީ ލުއި އިންޓްރެސްޓް ރޭޓެއްގައި ކުދި އަދި މެދުފަންތީގެ ވިޔަފާރިތަކަށް މާލީ އެހީތެރިކަން ފޯރުކޮށްދިނުމަށް ސަރުކާރުން އުފައްދާފައިވާ ކުންފުންޏެކެވެ. އެތަނުން ލޯނުު ދޫކުރާ ދާއިރާތަކުގެ ތެރޭގައި ހިމެނެނީ، ފަށާ ވިޔަފާރި، ވިޔަފާރި ތަރައްގީ، ހަރުމުދާ، ދަނޑުވެރި ނަފާ އަދި ވިޔަފާރި އެހީގެ އިތުރުން ރަށު ފަތުރު އެވެ.
