ރައިޕޫރް، އިންޑިއާ (އެޕްރީލް 26) - އިންޑިއާގެ މެދުތެރޭގައި އޮންނަ ޗައްޓިސްގަރް ސްޓޭޓުގައި މާއޯއިސްޓުން ދިން ހަމަލާއެއްގައި 10 ފުލުހަކާއި އެ މީހުން ޑްރައިވަރު މަރުވެއްޖެ އެވެ.
އެ ހަމަލާ ދިނީ މަގުމަތީގައި އައިއީޑީއެއް ހަރުކޮށްގެންނެވެ. ފުލުހުންގެ ވެހިކަލް ގޮސް އައިއީޑީގައި ޖެހުމުން ބޮޑު ގޮވުމެއް ގޮވި އެވެ. އެކަމުގެ ތުހުމަތު ކުރެވެނީ މާއޯއިސްޓުންނަށެވެ.
މާއޯއިސްޓު ހަނގުރާމަވެރިން އިންޑިއާގަައި އުޅެނީ ފެށީ 1960 ގެ އަހަރުތަކުގަ އެވެ. އެހެން ނަމަވެސް، ފަހަކަށް އައިސް އެ މީހުންގެ ހަމަލާތައް ވަނީ ވަރަށް ބޮޑަށް މަދުވެފަ އެވެ.
ބުދަ ދުވަހުގެ ހަމަލާއަކީ ފާއިތުވި ދެ އަހަރުގެ ތެރޭގައި ސެކިއުރިޓީ ފައުޖުތަކަށް އަމާޒުކޮށް ދިން އެންމެ ބޮޑު ހަމަލާ އެވެ. ބޮޑު ވަޒީރު ނަރެންދްރަ މޯދީ ވަނީ މަރުވި މީހުންގެ އާއިލާތަކަށް ތައުޒިޔާ ދަންނަވައިފަ އެވެ.
ޗައްޓިސްގަރް ސްޓޭޓުގެ ޗީފް މިނިސްޓަރު ބުޕޭޝް ބާގެލް ވިދާޅުވީ އެ ސްޓޭޓުގެ ސެކިއުރިޓީ ދެ ގުނަ ވަރުގަދަ ކުރަން ފިޔަވަޅުތައް އަޅުއްވާނެ ކަމަށެވެ.
ހަމަލާގެ ޒިންމާ އެއްވެސް ގްރޫޕަކުން އުފުލާފައެއް ނުވެ އެވެ. މާއޯއިސްޓުން ނުވަތަ ނަކްސަލައިޓުންނާ ދެކޮޅަށް ހަނގުރާމަ ކުރަން އިންޑިއާގެ ބައެއް ހިސާބުތަކުގައި ސިފައިންނާއި ފުލުހުން އުޅެ އެވެ.
އެ ގްރޫޕްތަކުން ބުނަނީ އެ މީހުން ހަނގުރާމަ ކުރަނީ ފަގީރުންނާއި ދަނޑުވެރިކަން ކުރާ ދުރު ހިސާބުތަކުގައި އުޅޭ މީހުންގެ ހައްގުގައި ކަމަށެވެ.
އިންޑިއާގެ 10 ސްޓޭޓަށް ހަނގުރާމަވެރިން އުޅޭ ކަމަށް ބެލެވެ އެވެ. އެހެން ނަމަވެސް ގިނައިން ހަރަކާތްތެރި ވަނީ މީހުން މަދު، ފަގީރު ހިސާބުތަކުގަ އެވެ.
