ރާއްޖެއަށް އެތެރެކުރާ މުދަލުގެ އިތުރުން ބޭރުކުރާ މިންވަރު މިދިޔަ މާޗު މަހު ބޮޑުތަނުން އިތުރުވެ، އިމްޕޯޓް އެކްސްޕޯޓުން ލިބޭ އާމްދަނީ ވަރަށް ބޮޑަށް އިތުރުވެފައިވާ ކަމަށް ކަސްޓަމްސްއިން ހާމަކޮށްފި އެވެ.
އެ އިދާރާއިން ހާމަކުރި ތަފާސްހިސާބުތަކުން އެނގޭ ގޮތުގައި މާޗު މަހު އާމްދަނީގެ ގޮތުގައި ވަނީ 330 މިލިއަން ރުފިޔާ ލިބިފަ އެވެ. އެއީ, މިދިޔަ އަހަރުގެ މާޗު މަހާ އަޅާބަލާއިރު ތިން އިންސައްތައިގެ އިތުރުވުމެކެވެ. އަދި, ރޯޔަލިޓީގެ ގޮތުގައި ކަސްޓަމްސްއަށް ވަނީ 14 މިލިއަން ރުފިޔާ ލިބިފަ އެވެ.
ތަފާސްހިސާބުތަކުން އިތުރަށް ފެންނަ ގޮތުގައި މިދިޔަ މަހު އެންމެ ގިނައިން ރާއްޖެއަށް އެތެރެކޮށްފައިވަނީ ކާބޯތަކެއްޗެވެ. ރޯދަ މަހާ ދިމާކޮށް ރާއްޖެއަށް 924 މިލިއަން ރުފިޔާގެ ކާބޯތަކެތި އެތެރެކޮށްފައިވެ އެވެ.
ދެވަނައަށް އެންމެ ގިނައިން އިމްޕޯޓުކުރީ ތެލެވެ. އެއީ 706 މިލިއަން ރުފިޔާގެ ތެލެވެ. ޖުމުލަ އިމްޕޯޓުގެ އަދަދު ތެޔޮ ނުހިމަނައި ހުރީ 3.6 ބިލިއަން ރުފިޔާގަ އެވެ. އެއީ, މިދިޔަ އަހަރުގެ މާޗު މަހާ އަޅާކިޔާއިރު 14 އިންސައްތައިގެ އިތުރުވުމެކެވެ.
މިދިޔަ މަހުގެ އެކްސްޕޯޓަށް ބަލާއިރު، ލިސްޓުގެ އެންމެ ކުރީގައި އުޅެނީ ގަނޑުކުރި ކަޅުބިލަމަހެވެ. އެގޮތުން، މިދިޔަ މަހު 224 މިލިއަން ރުފިޔާގެ ކަޅުބިލަމަސް ރާއްޖޭން ވަނީ އެކްސްޕޯޓްކޮށްފަ އެވެ.
ކަސްޓަމްސްއިން ބުނި ގޮތުގައި މިދިޔަ މަހު ރާއްޖެއަށް އެންމެ ގިނައިން މުދާ އެތެރެކޮށްފައިވަނީ ޔޫއޭއީ އިންނެވެ. އެގޮތުން، އެ ގައުމުން 753 މިލިއަން ރުފިޔާގެ މުދާ އެތެރެކޮށްފައި ވެ އެވެ.
އެކްސްޕޯޓަށް ބަލާއިރު، މިދިޔަ މަހު ރާއްޖޭން ބޭރުކުރި ޖުމްލަ މުދަލުގެ 66 އިންސައްތަ ހިއްސާކުރަނީ ތައިލަންޑަށެވެ. އެ ގައުމަށް 225 މިލިއަން ރުފިޔާގެ މުދާ މިދިޔަ މަހުގެ ތެރޭގައި ވަނީ އެކްސްޕޯޓްކޮށްފަ އެވެ.
