އިންޑިއާގެ ގައުމީ ކްރިކެޓް ޓީމްގެ ތަރި ވިރާތު ކޯލީ އަކީ މި ވަގުތު ދުނިޔޭގެ އެންމެ މަގުބޫލު އެއް ކްރިކެޓް ކުޅުންތެރިޔާ އެވެ. އިންޑިއާގެ ގައުމީ ޓީމްގެ ކެޕްޓަންގެ ގޮތުގައި ގިނަ ދުވަސްތަކެއް ހުރުމަށް ފަހު އެ މަގާމުން އޭނާ ވަކިވުމާ އެކު ގިނަ ބަޔަކަށް ހައިރާންކަން ލިބުނެވެ. ކެޕްޓަން ކަމުން ވިރާތު ވަކިވުމުގައި އޭރު އިންޑިއާގެ ކްރިކެޓް ބޯޑުގެ ރައީސަކަށް ހުރި ސޯރަވް ގަންގޫލީއާ ހިތްހަމަނުޖެހުންތަކެއް ދިޔަކަމަށް މީޑިއާތަކުގައި އަޑު ފެތުރުނެވެ.
މިހާރު މި ކަންތައްތަކަށް އަހަރެއް ވެއްޖެ އެވެ. ހަގީގަތުގައި ވެސް ގަންގޫލީ އާއި ވިރާތާ ދެމެދު ދެބަސްވުންތަކެއް އުފެދުނު ކަމަށް ދެކެވުނު ވާހަކަތަކަށް ބާރު ލިބޭ ކަންތައްތަކެއް މިހާރު ކުރިއަށްދާ އިންޑިއަން ޕްރިމިއާ ލީގު (އައިޕީއެލް)ގައި ވެސް މި ވަނީ ފެނިފަ އެވެ.
އެންމެ ފަހުން އައިޕީއެލްގައި ވިރާތު ކުޅޭ ބެންގަލޫރުގެ ރޯޔަލް ޗެލެންޖާސް އާއި ޑެލީ ކެޕިޓަލްސް ކުޅުނު މެޗުގެ ތެރެއިން ގިނަ ބަޔަކަށް އަޅައިގަތީ ކޯލީ އާއި ގަންގޫލީގެ ހަރަކާތްތަކަށެވެ. މި ވަގުތު ޑެލީ ޓީމުގެ ޑިރެކްޓާ އޮފް ކްރިކެޓްގެ މަގާމުގައި ހުރި ގަންގޫލީ އާއި ވިރާތާ ދެ މީހުން މެޗު ނިންމާފައި ސަލާމްކޮށްފައި ވެސް ނުވެ އެވެ. އަނެއްކޮޅުން މެޗަށް ފަހު ދެ ޓީމުގެ ކުޅުންތެރިން ވާހަކަދައްކައި ބައްދަލުކުރިއިރު ވެސް ދެ މީހުން ތިބީ އެކަކު އަނެކަކަށް ފުރަގަސްދީގެންނެވެ. މިއީ އިންޑިއާގެ ނޫސްތަކުގެ ފަލަސުރުހީތަކުގައި މިދިޔަ ދުވަސްތަކުގައި އޮތް ވާހަަކަތަކުން ބައެކެވެ.
ޑެލީ ކެޕިޓަލްސްގެ ކޯޗު ރިކީ ޕޮންޓިން އާއި ވިރާތު ވާހަކަދައްކަން ހުރި ދަނޑިވަޅެއްގައި ގަންގޫލީ އެތަނަށް އައިސް ޕޮންޓިން ގާތު ވާހަކައެއް ބުނެފައި ދިޔައީ ވިރާތު އާ ދިމާއަށް ބަލާވެސް ނުލަ އެވެ.
މެޗުގެ ތެރެއިން ވެސް ވިރާތު ބެންޗުގައި އިން ދަނޑިވަޅެއްގައި ގަންގޫލީ އޭނާގެ ކުރިމަތިން ހުރަސްކުރި ވަގުތު ވިރާތު، ގަންގޫލީ އަށް ފޫހި ގޮތަކަށް ބަލާ ވީޑިއޯވެސް ދަނީ އާންމުވަމުންނެވެ.
މި ކަންތައްތަކުގެ ސަބަބުން ވިރާތު އަތުން އިންޑިއާގެ ކެޕްޓަންކަން ނެގުމުގައި ގަންގޫލީގެ އަތެއްވާ ކަމަށް ދެކެވޭ ވާހަކަތަކަށްވަނީ ބާރު ލިބިފަ އެވެ. މިދިޔަ އަހަރު އިންޑިއާގެ ކެޕްޓަންގެ ގޮތުގައި ހުރެފައި ވިރާތު އެ މަގާމު ދޫކޮށްލީ އެ ނިންމުމާ ގުޅޭގޮތުން ވާހަކަދައްކަން ބޭނުން ނުވާކަމަށް ބުނެފަ އެވެ.
އޭރު މީޑިއާތަކުން ރިޕޯޓްކުރި ގޮތުގައި ޓެސްޓް، އޯޑީއައި އަދި ޓީ20ގެ ކެޕްޓަންގެ ގޮތުގައިވެސް ހުރި ކޯލީ އެ މަގާމު ދޫކޮށްލީ ގަންގޫލީގެ ނުފޫޒުގެ ސަބަބުންނެވެ. ވިރާތު ސޯޝަލް މީޑިއާގައި ނުފޫޒުގަދަ ފަރާތެއްގެ ގޮތުގައި އޮތްއިރު، ސޯޝަލް މީޑިއާގެ ގިނަ އެކައުންޓްތަކުން ގަންގޫލީ އަށް ފޮލޯ ވެސް ނުކުރާތީ އެ ވެސް މީޑިއާގެ ސަމާލުކަން ލިބިފައިވާ ކަމެކެވެ.
ވިރާތު އަށް ފަހު އިންޑިއާގެ ކެޕްޓަންކަން ހަވާލުކުރީ ބެޓްސްމަން ރޯހިތު ޝަރުމާއާ އެވެ.
