ރާއްޖޭގެ ސްކޫލުތަކަށް ބޭނުންވާ ޕްރިންސިޕަލުން ތަމްރީނު ކުރުމަށް ބޭނުންވާ ހާއްސަ ސްކޮލަޝިޕުތައް ސްޕޮންސާ ކުރުމާ ބެހޭ ފަހުމުނާމާއެއްގައި އެމްޑަބްލިއުއެސްސީ އާއެކު އެޑިއުކޭޝަން މިނިސްޓަރީން ސޮއިކޮށްފި އެވެ.
އެ ފަހުމުނާމާގެ ދަށުން ޕްރިންސިޕަލުން އުފައްދާ ތަމްރީން ކުރުމަށް ހިންގާ މާސްޓާސް ޑިގްރީ ލެވެލް ކޯހުގެ 10 ސްކޮޕަލަޝިޕާއި ކުރު މުއްދަތުގެ 110 ކޯސް ސްޕޮންސަރު ކުރުމަށް އެމްޑަބްލިއުއެސްސީން ވަނީ ނިންމާފަ އެވެ.
ފަހުމުނާމާގައި އެމްޑަބްލިއުއެސްސީއާ އެކު އެޑިއުކޭޝަން މިނިސްޓަރީން ސޮއި ކުރަނީ -- ފޮޓޯ: އެމްޑައަބްލިއުއެސްސީ
ފަހުމުނާމާގައި ސޮއި ކުރީ އެޑިއުކޭޝަން މިނިސްޓަރީގައި އެކަމަށް ހާއްސަކޮށް ބޭއްވި ހާއްސަ ރަސްމިއްޔާތެއްގަ އެވެ. އެޑިއުކޭޝަން މިނިސްޓަރީގެ ފަރާތުން ފަހުމުނާމާގައި ސޮއިކުރެއްވީ ޕާމަނަންޓު ސެކެޓްރީ، އަހުމަދު އަލީ އެވެ. އެމްޑަބްލިއުއެސްސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު، ހަސަން ޝާހު އެވެ.
ދެ އަހަރު ދުވަހުގެ މުއްދަތަކަށް ބަހާލައިގެން ކުރިއަށް ގެންދިއުމަށް ނިންމާފައިވާ އެ ޕުރޮގުރާމު ހިންގާނީ އެމްޑަބްލިއުއެސްސީގެ އިޖުތިމާއީ ޒިންމާގެ ދަށުންނެވެ.
އެ ކުންފުނީގެ އޮފިޝަލް ބުނީ ދަރިވަރުންނަށް ރަނގަޅު ތައުލީމެއް ފޯރުކޮށްދިނުމާއި ސްކޫލްތަކުގައި ކިޔަވައިދިނުން ރަނގަޅު ކުރުމަށްޓަކައި ފެންވަރު ރަނގަޅު ޕްރިންސިޕަލުން ތިބުމަކީ ކޮންމެހެން މުހިނމުކަމެއް ކަމަށާއި އިލްމީ ގާބިލު ރަނގަޅު ޕްރިންސިޕަލުން ސްކޫލްތަކުގައި މަސައްކަތްކުރުމަކީ ދަރިވަރުން ރަނގަޅު ނަތީޖަ ހޯދުމަށް މެދުވެރިވާ ސަބަބެއް ކަމަށެވެ.
އެހެންކަމުން މުޖުތަމައުއަށް އެހައި ބޮޑަށް ބޭނުންޖެހިފައިވާ ރޮނގަކުން ދިވެހިން އުނގެނުމާއި ބިނާކުރުމަށް އެފަދަ ފުރުސަތެއް، އެމްޑަބްލިޔުއެސްސީގެ އިޖުތިމާއީ ޒިންމާގެ ދަށުން ފަހިކޮށްދެވުމަކީ އެ ކުންފުންޏަށް ލިބޭ ވަރަށް ބޮޑު އުފަލާކާއި ޝަރަފެއް ކަމަށް ވެސް އެމްޑަބްލިއުއެސްސީގެ އޮފިޝަލް ވިދާޅުވި އެވެ.
އެމްޑަބްލިއުއެސްސީން އަބަދުވެސް މަސައްކަތް ކުރަމުން ދަނީ މުޖުތަމައުގެ ކުރިއެރުމާއި ލާބައާއިި މަންފާއަށް އެހީތެރިކަން ފޯރުކޮށްދިނުމަށް ކަމަށް އެ ކުންފުނިން ބުނެ އެވެ.
