ރައީސް އިބްރާހިމް މުހައްމަދު ސޯލިހުގެ މޮޓޯކޭޑަށް ޕީޕީއެމްގެ މުޒާހަރާގެ ބައިވެރިން ހުރަސް އަޅައި ސެކިއުރިޓީ ބްރީޗް ވުމުގައި އިހުމާލުވި މައްސަލަ ދިރާސާ ކުރަމުން އަންނަ މަޖިލީހުގެ 241 ކޮމިޓީގެ ހުރިހާ ބައްދަލުވުމެއް ސިއްރުކޮށްފި އެވެ.
ރައީސްގެ މޮޓޯކޭޑަށް އިދިކޮޅު މުޒާހަރާގެ ބައިވެރިން ހުރަސްއެޅީ މި މަހުގެ 20 ވަނަ ދުވަހުގެ ރޭ 11:00 ހާއިރު ރައީސް ސޯލިހުގެ ދެކަނބަލުން، ބައިނަލްއަގުވާމީ އަންހެނުން ދުވަސް ފާހަގަކުރުމަށާއި ރެހެންދި އެވޯޑު ދިނުމަށް ހުޅުމާލޭގައި އޮތް ހަފުލާއަށް ފަހު މާލެ ވަޑައިގެންނެވި ވަގުތެވެ.
އެ މައްސަލައިގައި 241 ކޮމިޓީން އަންނަނީ ހާލަތު ދެނެގަނެ، ރައީސްގެ ސެކިއުރިޓީ ބްރީޗް ވުމުގައި އިހުމާލުވީ ސިފައިންތޯ ނުވަތަ ފުލުހުންތޯއާއި ރައީސްގެ މޮޓޯކޭޑުގެ ރޫޓު ސޭފްތޯ ބެލިތޯއާއި ގަސްދުގައި ބަޔަކު މޮޓޯކޭޑަށް ހުރަސް އެޅިތޯ ބަލަމުންނެވެ.
މި ދިރާސާގެ ކުރިން 241 ކޮމިޓީއިން މިއަދު އޮތީ ފުލުހުންނާއި ސިފައިންނާ ބައްދަލުކުރުމަށް ނިންމައިފަ އެވެ. އެގޮތުން 11:00 ގައި ފުލުހުންނާއެކު ބައްދަލުވުން ފަށާފައިވާއިރު، 12:00 އެމްއެންޑީއެފްއާ ބައްދަލުކުރާނެ އެވެ.
މިއަދުގެ ކޮމިޓީގެ ޖަލްސާ ފަށަމުން ވަނީ މި މައްސަލައިގައި ކުރިއަށް ގެންދާ ކޮމިޓީގެ ހުރިހާ ބައްދަލުވުމެއް ސިއްރު ކުރަން ނިންމައިފަ އެވެ.
ކޮމިޓީގެ ދިރާސާއަށް ފަހު މޭ ހަޔަކާ ގުޅިގެން 241 ކޮމިޓީން ނެރުނު އިންކުއަރީ ރިޕޯޓުގައި ދީފައިވާ ރިކޮމެންޑޭޝަންތަކުގައި ހުރި މިކަމާ ގުޅޭ ކަންކަމާމެދު އަމަލު ކުރެވެމުންދާ ގޮތް ވެސް ބަލާނެ އެވެ.
