މީޑިއާނެޓުގެ ވީޑިއޯކްލަބުން ބެލެން ހުންނަ ފިލްމުތަކާއި ސީރީޒްތައް އެ ކުންފުނީގެ އައިސް ޓީވީ މެދުވެރިކޮށް ބެލުންތެރިންނަށް ގެނެސްދިނުމަށް ނިންމައިފި އެވެ. މި ޕްރޮގްރާމް އައިސް ޓީވީން ކުރިއަށްގެންދާނީ "ރޯދަ ރީލް" ގެ ނަމުގަ އެވެ.
އެގޮތުން، ޖުމްލަ 10 ފިލްމާއި 5 ސީރީޒް ބެލުންތެރިންނަށް އައިސް ޓީވީ މެދުވެރިކޮށް ބަލާލެވޭނެ ކަމަށާއި، ފަސް ސީރީޒް އަދި ބައެއް ފިލްމުތައް އެއީ ހަމައެކަނި ވީޑިއޯކްލަބުން ބެލެން ހުންނަ، މީގެ ކުރިން ޓީވީއިން ދައްކާފައިނުވާ ފިލްމުތައް ކަމަށް ވެސް މީޑިއާނެޓުން ބުނެ އެވެ.
"ރޯދަ ރީލް" ގައި ކޮންމެ ބުރާސްފަތި އަދި ހުކުރު ދުވަހެއްގެ ރޭގަނޑު 11:00 ގައި ޖަހާއިރު ބެލުންތެރިންނަށް އާ ފިލްމެއް "ބަރާބަރު ބުރާސްފަތި"ގެ ނަމުގަ ގެނެސްދޭނެ އެވެ. އަދި، ހުކުރު ދުވަހުގެ ފިލްމުތައް ގެނެސްދެނީ "ހުކުރު ހަދިޔާ"ގެ ނަމުގަ އެވެ.
"ބަރާބާރު ބުރާސްފަތި" ގެ ފިލްމުތައް؛
- 23 މާރޗް 2023 - އިޚްތިޔާރު
- 30 މާރޗް 2023 - ވާ ލޯބި އިނގޭނަމަ ކަލާ
- 06 އޭޕްރިލް 2023 - އެދަރިފުޅު
- 13 އޭޕްރިލް 2023 - ހިތް ރޮއްވާނުލާ
- 20 އޭޕްރިލް 2023 - ހިތުގެ އެދުން
"ހުކުރު ހަދިޔާ" ގެ ފިލްމުތައް؛
- 24 މާރޗް 2023 - ހެހެސް
- 31 މާރޗް 2023 - ވެހޭ ވާރޭ ތެރެއިން
- 7 އޭޕްރިލް 2023 - އަނދިރިކަން
- 14 އޭޕްރިލް 2023 - ނިއުމާ
- 21 އޭޕްރިލް 2023 - ހައްދު
މި ފިލްމުތަކުގެ އިތުރުން ކޮންމެ ހޮނިހިރު ދުވަހަކުން ފެށިގެން ބުދައާ ހަމަށް މީޑިއާނެޓުގެ އޮރިޖިނިލް ސީރީސްތައް ވެސް ގެނެސްދޭނެ އެވެ. މިއީ ވީޑިއޯކްލަބުގެ ބެލުންތެރިން މެދުގައި މަގުބޫލުކަން ހޯދާފައިވާ ސީރީޒްތަކަކަށް ވިޔަސް، އަލަށް ޓީވީއިން ގެނެސްދޭ ސީރީޒްތަކެއް ކަމަށް އެ ކުންފުނިން ބުނެ އެވެ.
އައިސްޓީވީން ގެނެސްދޭނެ މީޑިއާނެޓުގެ އޮރިޖިނަލް ސީރީސްތައް؛
- ހޮނިހިރު - ގާލްފްރެންޑް
- އާދީއްތަ - ބަލްގިޝް
- ހޯމަ - ދޯދި
- އަންގާރަ - ލަފްޒު ސީޒަން 1
- ބުދަ - ގިރިދަ
މިއާއެކު މާޗު 29 ގައި، "ލަފްޒު" ގެ ދެވަނަ ސީޒަން އަދި މާޗް 28، ގައި މުޅިން އާ ސީރީސްއެއް ކަމަށްވާ "ހިތް ކަލާޔަށް އެދޭތީ" ރިލީސްކޮށް ސްޓްރީމިންއަށް ދޫކޮށްލާނެ އެވެ. އަދި، ފުރަތަމަ ދެ ދުވަހު މީޑިއާނެޓުގެ ވީޑިއޯކްލަބް، އެމްއެސް ޓީވީ، އެމްއެސް ލައިޓް އަދި އެމްއެސް ޑިޖިޓަލް މެދުވެރިކޮށް ދެ ސީރީޒްގެ ފުރަތަމަ އެޕިސޯޑު ހިލޭ ބަލާލެވޭނެ އެވެ.
