ކުރީގެ ރައީސް މައުމޫން އަބްދުލްގައްޔޫމްގެ ސަރުކާރުގައި ރާއްޖޭގެ ޖަލުތައް ބެލެހެއްޓެވި އިސްތަފާ އިބްރާހިމް މަނިކު މިއަދު އަވަހާރަވެއްޖެ އެވެ.
އިބްރާހިމް މަނިކު އަވަހާރަވިއިރު އުމުރަކީ 82 އަހަރެވެ.
އޭނާ ވަނީ މަހުކަމަތުލް އަމަން އާންމާއި ވުޒާރަތުލް އަމަން އާންމުގެ ވަޒީފާތައް އަދާ ކުރައްވައިފަ އެވެ. އަދި މިނިސްޓްރީ އޮފް ޕަބްލިކް ސޭފްޓީ އާއި މިނިސްޓްރީ އޮފް ޑިފެންސްގައި ވެސް މަސައްކަތް ކުރެއްވި އެވެ. އިސްތަފާ އެންމެ ފަހުން އަދާކުރެއްވީ ޑިފެންސް މިނިސްޓްރީގެ ޑިރެކްޓާ ޖެނެރަލްގެ މަގާމެވެ.
ރައީސް މައުމޫނުގެ ވެރިކަން ވެއްޓުނުފަހުން، ޖަލުތަކުގައި ހިންގި އަނިޔާވެރި އަމަލުތައް ބެލުމަށް ކުރުމަށް 2011 ވަނަ އަހަރު ސަރުކާރުން ވަނީ އިބްރާހިމް މަނިކު ހައްޔަރުކޮށް ތަހުގީގެއް ފަށައިފަ އެވެ.
އެކަމަކު، އިބްރާހިމް މަނިކު ހައްޔަރު ކުރުމަށް ކ. މާފުށީ ކޯޓުން އެއިރު ނެރުނު އަމުރު ހައި ކޯޓުން ބާތިލްކޮށްލުމުން އޭނާ ދޫކޮށްލީ އެވެ. އިސްތަފާ ހައްޔަރު ކުރީ މާލެއިންނެވެ.
އިބްރާހިމް މަނިކުގައި ބަންދުގައި ހުންނެވިއިރު، ގައިދީއެއްގެ މައުލޫމާތު ލިޔެފައި އޮތް، ގެއްލިފައިވާ ފައިލެއްގެ މައުލޫމާތު ދެއްވި ކަމަށް ޕްރޮސެކިއުޓާ ޖެނެރަލް އެއިރު ވިދާޅުވެފައިވެ އެވެ. ނަމަވެސް އެ ފައިލު ފެނިފައެއް ނުވެ އެވެ.
