ކޮންމެ އަހަރެއްގައި ވެސް ރޯދަ ޕްރޮމޯޝަން ވަކި ރަށަކަށް ހާއްސަކުރާ އުރީދޫ މޯލްޑިވްސްއިން މިއަހަރުގެ ރޯދަ ޕްރޮމޯޝަން ފުވައްމުލަކު ސިޓީއަށް ހާއްސަކޮށް، ގިނަ ހަދިޔާތަކާއި އޮފާތަކާ އެކު މިއަދު ފަށައިފި އެވެ.
އުރީދޫގެ ރޯދަ ޕްރޮމޯޝަން އިފްތިތާހު ކުރުމަށް މިއަދު ހަވީރު ހަފްލާ ބޭއްވީ ފުވައްމުލަކުގަ އެވެ. އެ ކުންފުނިން ބުނީ އެ ޕްރޮމޯޝަނުގެ ތެރެއިން ފުވައްމުލަކުގެ އާދަކާދަ އާއި ސަގާފަތާއި، ބަހުރުވަ އާއި ރަށުގެ ރީތިކަން ދައްކާލާ، ރޯދަ މަހާއި ދިވެހިންނާ ގުޅޭ މެސެޖެއް ދޭނެ ކަމަށެވެ.
"އަޅުގަނޑުމެންގެ ރަށުގެ ހިތްގައިމު މަންޒަރުތަކާއި މުއްސަދި ސަގާފަތް ކުރިއެރުވުމަށް އުރީދޫ އިން އިސްނަގައިގެން ރޯދަ މަހުގެ ކެމްޕެއިން ފުވައްމުލަކަށް ހާއްސަ ކުރުމަކީ މިރަށުގެ ހުރިހާ ރައްޔިތުންނަށް ލިބޭ އުފަލެއް،" އެ ސިޓީގެ މޭޔަރު އިސްމާއިލް ރަފީގު ވިދާޅުވި އެވެ.
މި ޕްރޮމޯޝަންގައި، އުރީދޫގެ މޮބައިލް އަދި ސުޕަނެޓް ކަސްޓަމަރުންނަށް ކޮންމެ ދުވަހަކު ހަދިޔާ ފޯށި ލިބުމުގެ ފުރުސަތު އޮންނާނެ ކަމަށް އުރީދޫ އިން ބުނެ އެވެ.
"ރަމަޟާން މަހަށް ހާއްސަކޮށް ލޯންޗި ކުރެވުނު އޮފާތަކަކީ ކަސްޓަމަރުންނަށް ހާއްސަ ހަދިޔާއެއް. މި އޮފާތައް މެދުވެރިކޮށް މޮބައިލް އަދި ސުޕަނެޓު ކަސްޓަމަރުންނަށް ކޮންމެ ދުވަހަކު ވެސް އަގުހުރި ހަދިޔާތައް ހޯދުމުގެ ފުރުސަތު ލިބިގެންދާނެ،" އެ ކުންފުނީގެ ސީސީއޯ ހުސައިން ނިޔާޒު ވިދާޅުވި އެވެ.
އެ ކުންފުނިން ބުނީ ކޮންމެ ކަސްޓަމަރަަކަށް ވެސް "އުރީދޫގެ ހަދިޔާ ފޮށި" ބަލައިގަތުމުގެ ފުރުސަތު އޮންނާނެ ކަމަށެވެ. އުރިދޫ ހަދިޔާ ފޮއްޓަކީ އުރީދޫގެ މޮބައިލް އަދި ސުޕަނެޓު ބޭނުން ކުރާ ހުރިހާ ކަސްޓަމަރުންނަށް ވެސް ކޮންމެ ދުވަހަކު ހަދިޔާއެއް ލިބޭ ޕްރޮމޯޝަނެކެވެ.
"މައި އުރީދޫ އެޕްގައިވާ ހަދިޔާ ފޮއްޓަށް ފިތާލުމުން، ފެންނަ ހަ ފޮށީގެ ތެރެއިން ކަސްޓަމަރު ބޭނުންވާ ފޮއްޓެއް ހިޔާރު ކުރުމުން ތަފާތު އިނާމުތައް ލިބޭނެ. އޭގެ ތެރޭގައި ސައިކަލު، ޓީވީ، އައިފޯނު ޕްރޯ 14، 1 ޓީބީއާ ހަމައަށް އިންޓަނެޓް ޑޭޓާ އަދި ގިފްޓު ވައުޗަރު ހިމެނޭ. ކޮންމެ ކަސްޓަމަރަކަށް ވެސް ދުވާލަކު ދެ ފަހަރު ހަދިޔާ ފޮށި ހުޅުވައިގެން ހަދިޔާ ހޯދޭނެ،" އުރީދޫ އިން ބުނެ އެވެ.
އުރީދޫ އިން ވަނީ މީގެ އިތުރުން ވެސް އައު ޑޭޓާ ޕެކުތަކެއް ވެސް ރޯދައާ ގުޅިގެން ތައާރަފުކޮށްފަ އެވެ. އޭގެ އިތުރުން އާޗާ 500ގެ ޕެކޭޖު އެކްޓިވޭޓުކޮށްގެން ކޮންމެ ދުވަހަކަށް 2 ޖީބީ ޑޭޓާ، އާޗާ 750 ގެ ޕެކޭޖު އެކްޓިވޭޓުކޮށްގެން ކޮންމެ ދުވަހަކަށް 6 ޖީބީ ޑޭޓާ އަދި އުރީދޫ ޑޭޓާގެ 500ރ. ގެ ޕެކޭޖު ނަގައިގެން ލިބޭ 35 ޖީބީ ޑޭޓާ އާއެކު ރޯދަ ހަދިޔާ އަށް ބޭނުން އެއްޗެއް ގަނެލަން 200ރ. ގެ ގިފްޓު ވައުޗަރެއް ލިބޭނެ ކަމަށް ވެސް އުރީދޫ އިން ބުނެ އެވެ.
ހަމައެހެންމެ، ރޯދަ މަހު އުމްރާއަށް ދާ ދިވެހިންނަށް ހާއްސަ ރޯމިން އަގުތަކެއް ކަނޑައަޅާފައިވާ ކަމަށް ވެސް އުރީދޫ އިން މައުލޫމާތު ދެއެވެ. އެގޮތުން، އުރީދޫގެ އެކްސްޕީރިއަންސް ސެންޓަރަކަށް ގޮސް ޕާސްޕޯޓު ސިމް އެކްޓިވޭޓު ކޮށްގެން، އެންމެ އަގުހެޔޮ ރޯމިން ރޭޓުތައް ލިބޭނެ ކަމަށް އެ ކުންފުނިން ބުނެ އެވެ.
އުރީދޫ އަކީ އަބަދުވެސް ހިދުމަތް ހޯދާ ފަރާތްތަކަށް ތަފާތު ލުއިފަސޭހަތައް ހޯދައިދިނުމަށްޓަކައި މަސައްކަތް ކުރާ ކުންފުންޏެކެވެ.
