މިލާން (މާޗް 19) - އިޓާލިއަން ލީގުގައި ރޭ ކުޅުނު މެޗުން އުދިނޭޒީ އަތުން 3-1 އިން އޭސީ މިލާން ބަލިވި މެޗުގައި ޖެހި ލަނޑާ އެކު، މިލާންގެ ފޯވަޑް ޒްލަޓާން އިބްރަހިމޮވިޗް އާ ރެކޯޑެއް ހަދަައިފި އެވެ.
ރަށުން ބޭރުގައި ކުޅުނު މެޗުގެ ފުރަތަމަ ހާފުގެ އިތުރު ވަގުތުގައި މިލާނަށް ލިބުނު ޕެނަލްޓީއަކުން އިބްރަހިމޮވިޗް ،41، ވަނީ ލަނޑު ޖަހައިފަ އެވެ. އިބްރަހިމޮވިޗް ފުރަތަމަ ޖެހި ޕެނަލްޓީ އުދިނޭޒީގެ ކީޕަރު، މާކޯ ސިލްވޭސްޓްރީ މަތަކުރި އެެވެ. އެކަމަކު، އިބްރަހިމޮވިޗް ޕެނަލްޓީ ފޮނުވާލިއިރު، އުދިނޭޒީ ކުޅުންތެރިން އޭރިއާތެރެއަށް ވަނުމުން ދެ ވަނަ ފަހަރަށް ޖަހަން ދިނުމާ އެކު އޭނާ ގޯލަށް ބޯޅަ ފޮނުވާލި އެވެ. މި ލަނޑާއެކު، އިބްރަހިމޮވިޗަކީ އިޓާލިއަން ސީރިއާގެ ތާރީހުގައި ވެސް މިހާތަނަށް ލަނޑެއް ޖެހި އެންމެ އުމުރުން ދޮށީ ކުޅުންތެރިޔާއެވެ.
މިއީ، ކަކުލަށް ލިބުނު ސީރިއަސް އަނިޔާ އަކަށް ފަހު އަލުން އިބްރަހިމޮވިޗް ކުޅެން ފެށި ފަހުން އޭނާ ޖެހި ފުރަތަމަ ލަނޑެވެ. ރޭގެ މެޗުގައި އިބްރަހިމޮވިޗަށް ފުރަތަމަ އެގާރައިން ފުރުސަތު ލިބުނީ އޮލިވިއޭ ޖިރޫ ސަސްޕެންޝަނެއްގައި ހުރުމުންނެވެ.
އިބްރަހިމޮވިޗް މިލާނަށް ލަނޑު ޖެހީ މެޗުގެ ކުރީކޮޅު އުދިނޭޒީގެ ރޮބާޓާ ޕެރޭރާ ޖެހި ލަނޑުން އެ ޓީމުން ލީޑު ހޯދާފައި ވަނިކޮށެވެ. އަދި އިބްރަހިމޮވިޗް މިލާނަށް އެއްވަރުކޮށްދިންތާ މިނިޓެއްހާއިރު ފަހުން، މެޗުގެ ފުރަތަމަ ހާފުގެ އިތުރު ވަގުތުގައި ބެޓޯ ޖެހި ލަނޑުން އުދިނޭޒީ އިން އަލުން ލީޑު ހޯދިއެވެ.
އުދިނޭޒީގެ ތިން ވަނަަ ލަނޑު މެޗުގެ 70 ވަނަ މިނިޓުގައި ޖެހީ ކިންގްސްލީ އެހިޒީބޭ އެވެ.
މި މެޗުން ބަލިވުމުން މިލާން އޮތީ ތާވަލްގެ ހަތަރު ވަނައިގަ އެވެ. މި މެޗުން މޮޅުވެ އުދިނޭޒީ ވަނީ ތާވަލްގެ އަށް ވަނަ އަށް ޖެހިލައިފަ އެވެ.
