ހައުސިން ޑިވޮލަޕްމަންޓް ކޯޕަރޭޝަން (އެޗްޑީސީ) ގެ "ސްމާޓްކޮމް" ބްރޭންޑުގެ ދަށުން ހުޅުމާލޭ ފޭސް ދޭއްގައި ކޮންޓެއިނާ ޑޭޓާ ސެންޓަރެއް ހުޅުވައިފި އެވެ.
އިއްޔެ ހަވީރު ހުޅުމާލޭ ފޭސް ދޭގައި ހުޅުވި އެ ޑޭޓާ ސެންޓަރ ބޭނުމަކީ ހުޅުމާލެ އަކީ ރާއްޖޭގެ ފުރަތަމަ ސްމާޓް ސިޓީ އަށް ހެދުމަށް ކުރާ މަސައްކަތުގެ ތެރޭއިން ހުޅުވި ތަނެއް ކަމަށް އެޗްޑީސީ އިން މައުލޫމާތުދެ އެވެ.
ހުޅުމާލޭގައި ހުޅުވި ޑޭޓާ ސެންޓަރު --- ފޮޓޯ: ހަފީޒް/އަދަދު
އެ ޑޭޓާ ސެންޓަރައަކީ ޓިއާ3ގެ ކޮންޓެއިނާ ޑޭޓާ ސެންޓަރެއް ކަމަށް އެޗްޑީސީން ބުނެ އެވެ. އަދި، އަހަރެއްގެ މައްޗަށް 99.982 އިންސަތަ އަޕްޓައިމް ހުންނާނެ ކަމަށާއި ކެޕޭސިޓީ އިތުރު ކުރުމަށް ފަސޭހަވާނެ، އެހެން ތަނަކަށް ޑޭޓާ ސެންޓަރު ބަދަލު ކުރާ ނަމަ ވެސް ފަސޭހަވާނެ ކަަމަށް އެޗްޑީސީން ބުނެ އެވެ.
ހުޅުމާލޭގެ ޓެލެކޮމް އަދި ޑިޖިޓަލް އިންފްރާސްޓަރަކްޗާ ވަރުގަދަކޮށް ސްމާޓް ސިޓީއެއްގެ ގޮތުގައި ތަރައްގީ ކުރުމަށް އަމާޒުކޮށް އެޗްޑީސީން އަންނަނީ ގިނަ މަޝްރޫއުތަކެއް ހިންގަމުންނެވެ.
އެގޮތުން، 2019 ވަނަ އަހަރުު ހުޅުމާލޭ ދެވަނަ ފިޔަވަހީގައި ތައާރަފުކުރި އޯޕަން އެކްސެސް ނެޓްވޯކުގެ 12،500 ސަބްސްކްރައިބަރުން މިހާރު އެބަތިބި ކަމަށާއި އެ ނެޓްވޯކުގެ ޒަރިއްޔާ އިން އެދެވޭ ހިދުމަތްތަކެއް ދެމުންދާ ކަމަށް އެޗްޑީސީން ބުނެެ އެވެ.
