ހުޅުމާލޭ ދެ ފިޔަވަހި ގުޅޭ ސަރަހައްދުގައިގައި ތަރައްގީކުރާ ކެފޭ އަދި ރެސްޓޯރެންޓްތައް ތަރައްގީ ކުރުމަށް ހަ ކުންފުންޏަކާއެކު ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު ސޮއިކޮށްފި އެވެ.
ހުޅުމާލޭގެ އެންމެ އަގުބޮޑު އެއް ސަރަހައްދަށް މުސްތަގުބަލުގައި ވާނެ އެ ސަރަހައްދު ތަރައްގީކުރަނީ އާބަން ބޮލެވާޑް ޗެނަލް ޕާކްގެ ނަމުގަ އެވެ. އެ ސަރަހައްދުގެ ކެފޭ، ރެސްޓޯރެންޓްތައް ތަރައްގީ ކުރަން ހަވާލުކުރި ހަ ކުންފުންޏަކީ މިދިޔަ އަހަރު ހުޅުވާލި ބީލަން ކާމިޔާބު ކުރި ކުންފުނިތަކެވެ.
އާބަން ބޮލެވާޑްގެ ރެސްޓޯރެންޓް ތަރައްގީކުރާ ކުންފުނިތައް
- ބްރަދާސް ކޭޓަރިން
- ރެފްކޫލް
- ސެލްސިއަސް ޕްރައިވެޓް ލިމިޓެޑް (އޮކްސީޖެން އާއި އޮކްސިޖެން ބްލޫ ހިންގަނީ މި ކުންފުނިން)
- މިސްރާބު ޕްރައިވެޓް ލިމިޓެޑް
- ޑައިނެމޯ ރެސްޓޯރެންޓް
- ޑްރީމްސް ޕްރައިވެޓް ލިމިޓަޑް. އެ ކުންފުނިން އާބަން ބޮލެވާޑް ގާއިމު ކުރާނީ ގްލޯބަލް ފްރެންޗައިސް އައުޓްލެޓްކަމުގައިވާ ކެނީ ރޮޖާސް ރޯސްޓަސް
މިއަދު ހަވީރު މޫނިމާގައި ބޭއްވި މި ހަފުލާގައި އެޗްޑީސީގެ ޗީފް ފައިނޭންޝަލް އޮފިސަރު އަހުމަދު ޝާމް ވިދާޅުވީ އާބަން ބޮލެވާޑް ނިމިގެން ދާއިރު، އެ ސަރަހައްދު ވެގެން ދާނީ ބަދަހިވަންތަ މުޖުތަމައު ދައްކުވައިދޭ ފުރިހަމަ ރަމްޒަކަށެވެ.
"ދުނިޔޭގެ ގިނަ ގައުމުތަކުގައި ވެސް ތަރައްގީ ކުރެވިފައި ހުންނަ ބޮލެވާޑްތަކާއި އެއްގޮތަށް ހުޅުމާލޭގެ އާބަން ބޮލެވާޑް ވެސް ވެގެން ދާނީ، ގިނަ ހިދުމަތްތަކެއް އެއްތަނަކުން ލިބިގެން ދާނެ ތަނަކަށް. އަދި ދެ ފޭސްގައި ދިރިއުޅޭ ރައްޔިތުންނާއި އެކި ބޭނުންތަކަށް ހުޅުމާލެ ޒިޔާރަތް ކުރާ ފަރާތްތައް އާއިލާ އާއި ރަހުމަތްތެރިންނާއި އެކު ވަގުތު ހޭދަކޮށްލުމަށް ބޭނުން ކުރެވޭނެ މަގުބޫލު ސަރަހައްދަކަށް މި ސަރަހައްދު ވެގެންދާނެ." ޝާމް ވިދާޅުވި އެވެ.
މީގެ ކުރިން ބާބަކިޔު ސަރަހައްދުގެ ގޮތުގައި ހުޅުމާލޭގައި ބޭނުން ކުރަމުންދިޔަ ހިސާބު ތަރައްގީކޮށް ނިމޭއިރު އެ ތަނުގައި އާއްމުން މުނިފޫހިފިލުވާ ހިތްހަމަޖެއްސުމަށް ގިނަ ހަރަކާތްތަކެއް ހިންގޭނެ ކަމަށާއި ކުޑަކުދިންގެ ޕާކް، އައުޓްޑޯ ޖިމް، ފަދަ ގިނަ ވަސީލަތްތަކެއް ގާއިމު ކުރެވިގެން ދާނެ ކަމަށް ޝާމް ވިދާޅުވިއެވެ.
މި އައުޓްލެޓްތަކުގައި ފިއުޝަން ސްޓައިލަށް ތަފާތު ގިނަ ކުޒިންތަކުގެ ކާބޯތަކެތި ލިބިގެން ދާނެއެވެ. އެ ކެފޭތައް ޑިޒައިން ކުރެވިފައި ވަނީ ތިމާވެއްޓާ ރައްޓެހި އަދި އާބަން ބޮލެވާޑްގެ ރީތި ކަމަށް ބަލާ އޭގެ އަސްލު ނުގެއްލޭ ގޮތަށް ކަމަށް އެޗްޑީސީން ބުނެއެވެ.
.
