ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ސަރުކާރު ކުންފުނިތަކާއި ޕްރައިވެޓް ކަލެކްޓަރުންގެ ކުނި އުކައިދޭން ނަގާ ފީ ބޮޑުކޮށްފި އެވެ.
ވެމްކޯއިން މީގެ ކުރިން ސަރުކާރު ކުންފުނިތަކާއި ޕްރައިވެޓް ކަލެކްޓާސްގެ އަތުން ނެގީ 212ރ. އެވެ. އެކަމަކު މިހާރު މިގެނައި ބަދަލާއެކު ދެން މިއިން ކޮންމެ ބަޔެއްގެ އަތުން ވެސް ކުނި އުކައިދޭން ޓަނަކަށް ނަގާނީ 2660ރ. އެވެ.
ވެމްކޯއިން މިއަދު ނެރުނު އިއުލާނެއްގައި ބުނެފައި މާލޭގައި ދެމުން ގެންދާ ހިދުމަތްތަކުގެ އަގުތަކަށް ބަދަލު ގެންނަން އެ ކުންފުންޏަށް ޔުޓިލިޓީ އޮތޯރިޓީން ހުއްދަ ދީފައިވާ ކަމަށެވެ.
ވެމްކޯއިން ބުނީ ކުނީގެ ހިދުމަތް ދޭނެ އަގުތަކަކީ ގޭބީސީތަކުން މަހަކު 150ރ. އަދި ވިޔަފާރުތަކަށާއި ކޮމާޝަލް ތަންތަނަށް ލީޓަރަކަށް 27 ލާރި، ކޯލް އެންޑް ޕިކަޕް ސާވިސްއަށް ޓަނަކަށް 330ރ. ކަމަށެވެ. އެއާއެކު ޓްރާންސްފާ ސްޓޭޝަނަށް ގެންނަ ކުންޏަށް ކޮންމެ ޓަނަކުން 1،060ރ. ނަގަން ވެސް ވަނީ ނިންމައިފަ އެވެ.
ދައުލަތުގެ އިދާރާތަކާއި ސަރުކާރު ހިއްސާވާ ކުންފުނިތަކަށް ޓަނަކަށް 2،660 ރުފިޔާ، ލީޓަރަކަށް 1.27 ރުފިޔާ އާއި ޕްރައިވެޓް ކޮމާޝަލް ކަލެކްޓާސްއަށް ޓަނަކަށް 2،260 ރުފިޔާ ނަގާނެ ކަމަށް ވެމްކޯއިން ބުނެއެވެ.
އަގަށް ބަދަލު ގެންނަން ނިންމީ، އެ ކުންފުނިން މާލެ ސަރަހައްދުގައި ފޯރުކޮށްދޭ ހިދުމަތް ދެމެހެއްޓެނިވި އުސޫލަކުން ކުރިއަށް ގެންދިއުމަށްޓަކައި ތިމާވެއްޓާ ބެހޭ މިނިސްޓްރީ އާއި އިކޮނޮމިކް ކައުންސިލާއެކު މަޝްވަރާތަކެއް ކުރުމަށްފަހު ކަމަށް ވެސް ވެމްކޯއިން ބުނެ އެވެ.
ކުނި މެނޭޖްކުރުމާ ބެހޭ ގަވާއިދަށް ގެނައި ފަސް ވަނަ އިސްލާހާ އެއްގޮތަށް ވަކިނުކޮށް ޓްރާންސްފާ ސްޓޭޝަނަށް ގެންނަ ކުންޏަށް ކޮންމެ ފަހަރަކު އިތުރަށް 1،000 ރުފިޔާ ނަގާނެ ކަމަށް ވެސް ވެމްކޯއިން ބުނެ އެވެ.
ވެމްކޯއިން ބުނީ އަލަށް ކަނޑައަޅާފައިވާ އަގުތަށް ތަންފީޒު ކުރަން ފަށާނީ މި މަހުގެ 20 ވަނަ ދުވަހުން ފެށިގެން ކަމަށެވެ.
