އުރީދޫއަށް މިދިޔަ އަހަރު ލިބުނު ފައިދާއިން ހިއްސާއަކަށް 3.04ރ. ބަހަން އެ ކުންފުނީގެ އަހަރީ އާންމު ޖަލްސާގައި ފާސްކޮށްފި އެވެ.
އެ ކުންފުނީގެ ހިއްސާދާރުންގެ ތެރެއިން 125 މީހުންނާއެކު ރޭ ކްރޮސްރޯޑްސްގައި ބޭއްވި ޖަލްސާގައި އެ ގޮތަށް ފާސްވީ ހިއްސާދާރުންގެ 87 ޕަސެންޓުގެ ވޯޓުންނެވެ.
އުރީދޫން މި ފަހަރު ބަހަން ނިންމީ އޭގެ ކުރީ އަހަރަށް ވުރެ 34 ލާރި އިތުރު އަދަދެކެވެ. އެ ކުންފުނިން 2021 ވަނަ އަހަރުގެ ފައިދާ އިން ހިއްސާދާރުންނަށް ބެހީ ހިއްސާއަކަށް 2.70ރ. އެވެ.
ރޭގެ ޖަލްސާގައި ވަނީ އެ ކުންފުނީގެ އޮޑިޓް ކޮށްފައިވާ މާލީ ބަޔާންތައް ވެސް ފާސްކޮށްފަ އެވެ. އެ ކުންފުނިން ވަނީ މި އަހަރުގެ އޮޑިޓަރުގެ ގޮތުގައި ޕްރައިޒް ވޯޓަ ހައުސް ކޫޕާސް ކަނޑައަޅައި، އުޖޫރައެއްގެ ގޮތުގައި 62،920 ޑޮލަރު ދިނުމަށް ވެސް ނިންމައިފަ އެވެ.
އުރީދޫގެ އޮޑިޓް ކުރި މާލީ ބަޔާންތަކުން އެނގޭ ގޮތުގައި މިދިޔަ އަހަރުގެ އާމްދަނީ ވަނީ އޭގެ ކުރީ އަހަރަށް ވުރެ ގާތްގަނޑަކަށް 200 މިލިއަން ރުފިޔާ އިތުރުވެފަ އެވެ. މިއީ އޭގެ ކުރީ އަހަރަށް ވުރެ ގާތްގަނޑަކަށް ފަސް މިލިއަން ރުފިޔާގެ އިތުރު އަދަދެކެވެ.
އެ ކުންފުންޏަށް މިދިޔަ އަހަރު 560 މިލިއަން ރުފިޔާގެ އާމްދަނީ އެއް ލިބިފައިވާއިރު، އެއީ 2021 ވަނަ އަހަރާ އަޅާބަލާއިރު 21 ޕަސެންޓުގެ ކުރިއެރުމެކެވެ. އެ ކުންފުންޏަށް މިދިޔަ އަހަރު ވަނީ 1.9 ބިލިއަން ރުފިޔާގެ އާމްދަނީއެއް ލިބިފަ އެވެ.
އުރީދޫ، ޕަބްލިކް ކުންފުންޏަކަށް ބަދަލުކޮށް، އާއްމުންނަށް ހިއްސާ ވިއްކަން ފެށީ 2016 ވަނަ އަހަރު އެވެ.
ދެހާސްނަވާރަ ވަނަ އަހަރު އެ ކުންފުންޏަށް ވަނީ ގާތްގަނޑަކަށް 600 މިލިއަން ރުފިޔާގެ ފައިދާއެއް ލިބިފަ އެވެ.
މި ޖަލްސާގައި ވާހަކަ ދައްކަވަމުން، އުރީދޫގެ ޗެއާޕާސަން ސުލްތާނާ ފާތިމާ އަލްކުވާރީ ވަނީ މިޒަމާނުގެ ޑިޖިޓަލް މުވާސަލާތުގެ ހިދުމަތްތައް އުރީދޫއިން ދެމުން ގެންދާގޮތުގެ މައްޗަށް އަލިއަޅުވައިލައްވައިފަ އެވެ.
އަދި މިހާރު ދެމުން ގެންދާ ހިދުމަތްތަކުގެ ފެންވަރު ރަނގަޅު ކުރުމުގެ ގޮތުން އިތުރު ވަސީލަތްތައް ޒަމާނީ ކޮށްފައިވާކަންވެސް އޭނާ ފާހަގަކުރެއްވި އެވެ.
އެ ގޮތުން އުރީދޫ އިން ވަނީ "މަވެސް، މަންމަވެސް އުރީދޫ" ނަމުގައި އާ ކެމްޕެއިނެއް ލޯންޗުކޮށްފަ އެވެ.
