ރާއްޖޭގެ މައި ޓެލެކޮމް ކުންފުނި ދިރާގުގެ 34 ވަނަ އަހަރީ އާންމު ޖަލްސާ މާޗު 20 ވާ ހޯމަ ދުވަހުގެ ރޭގަނޑު 8:15 ގައި ބޭއްވުމަށް ހަމަޖަސައިފި އެވެ.
މި ޖަލްސާ ބޭއްވުމަށް ހަމަޖެހިފައިވަނީ "ހައިބްރިޑް" ކޮށްކަމަށްވާތީ، ޖަލްސާގައި ހިއްސާދާރުންނަށް "ފަހިވޯޓް" މެދުވެރިކޮށް އޮންލައިންކޮށް ނުވަތަ ޖަލްސާ ބޭއްވުމަށް ހަމަޖެހިފައިވާ ކްރޮސްރޯޑް މޯލްޑިވްސްގެ ޖަލްސާކުރާ މާލަމަށް ހާޒިރުވެގެން ބައިވެރިވެވޭނެ ކަމަށް ދިރާގުން ބުނެ އެވެ.
ހިއްސާދާރުންގެ ޕްރީ-ރެޖިސްޓްރޭޝަނަށް މިމަހުގެ 19 ވަނަ ދުވަހުގެ މެންދުރު 1:00 ގެ ނިޔަލަށް ވަނީ ހުޅުވާލާފަ އެވެ. ޕްރޮކްސީންގެ ރެޖިސްޓްރޭޝަނަށް ހުޅުވާލާފައިވަނީ މި މަހުގެ 18 ވަނަ ދުވަހުގެ މެންދުރު 1:00 ގެ ނިޔަލަށެވެ.
ދިރާގުން ބުނީ މިމަހުގެ 14 ވަނަ ދުވަހުގެ ނިޔަލަށް އެ ކުންފުނީގެ ހިއްސާދާރުންގެ ރަޖިސްޓަރީގައި ހިމެނޭ ހިއްސާދާރުންނަށް އެ ޖަލްސާގައި ބައިވެރިވެވޭނެ ކަމަށެވެ.
ދިރާގުން ވަނީ ޖަލްސާ މާލަމަށް ހާރިޒުވެ ރަޖިސްޓްރީކުރެވޭ ހިއްސާދާރުންގެ އަދަދު 150 ހިއްސާދާރުންނަށް ލިމިޓްކޮށްފަ އެވެ.
ޖަލްސާކުރާ މާލަމަށް ހާޒިރުވެ ޖަލްސާގައި ބައިވެރިވުމަށް ޝައުގުވެރިކަން ފާޅުކޮށްފައިވާ ހިއްސާދާރުންގެ ތެރެއިން ޖަލްސާގައި ބައިވެރިވެވޭނީ މާލަމަށް ހާޒިރުވެގެންކަން ނުވަތަ އޮންލައިންކޮށްކަން އެ ހިއްސާދާރަކަށް މިމަހުގެ 19 ވަނަ ދުވަހުގެ ހަވީރު 4:00 ގެ ކުރިން އެންގޭނެ ކަމަށް ދިރާގުން ވަނީ ބުނެފަ އެވެ.
