ތައިލެންޑްގައި މިހާރު ކުރިއަށްދާ އޭސީސީ ޗެލެންޖާސް ކްރިކެޓް މުބާރާތުގައި ވާދަކުރާ ރާއްޖޭގެ ގައުމީ ކްރިކެޓް ޓީމު ކުޅުނު ދެ ވަނަ މެޗުން ބަހްރޭން އަތުން 292 ލަނޑުން ބަލިވެއްޖެ އެވެ.
ތައިލެންޑުގައި ކުޅޭ މި މުބާރާތުގައި ރާއްޖެ ހިމެނެނީ ބޫޓާނާއި އިރާން އަދި ބަހްރޭނާ އެއް ގްރޫޕެއްގަ އެވެ. ރާއްޖެ ވަނީ ފުރަތަމަ މެޗުގައި އިރާން އަތުން 27 ލަނޑުން މޮޅުވެފަ އެވެ.
ތައިލެންޑުގެ އޭއައިޓީ ސްޓޭޑިއަމްގައި ކުޅުނު މެޗުގައި މިއަދު ރާއްޖެ އަށް ޓޮސް ދިމާވުމުން ނިންމީ ހޮވުމަށެވެ. ބަހުރޭނުން ވަނީ ކުޅެން އަރައި 50 އޯވަރުގެ ތެރޭގައި 380 ލަނޑު ހަދައިފަ އެވެ. ޖަވާބުގައި ރާއްޖޭން ކުޅެން އަރައި 31.3 އޯވަރުގެ ތެރޭގައި ހުރިހާ ކުޅުންތެރިން ނުބައިވިއިރު، ސްކޯ ވެސް އެކަށޭނެ ވަރަށް ނުކުރެވުނެވެ. ރާއްޖެ އަށް މި މެޗުގައި ހެދުނީ އެންމެ 88 ލަނޑެވެ.
ރާއްޖޭގެ ޓީމުން އެންމެ ރަނގަޅަށް ކުޅުނު މުހައްމަދު މަހުފޫޒް ވަނީ 41 ބޯޅައިން 35 ލަނޑު ހަދައިފަ އެވެ. ކެޕްޓަން، އާދަމް ނާސިފް އުމަރު (އާދަޅޭ) އަށް އެއްކުރެވުނީ 12 ލަނޑެވެ.
ބަހްރޭން އަތުން ބަލިވި ނަމަވެސް ރާއްޖެ އަށް އަދިވެސް ސެމީ ފައިނަލްގެ ފުރުސަތު އޮތީ ފަހިކޮށެވެ. އެއީ އަންނަ އަންގާރަ ދުވަހު ބޫޓާނާ ދެކޮޅަށް ކުޅޭ މެޗުން ރަނގަޅު މޮޅެއް ހޯދައިގެންނެވެ. ބޫޓާން ވަނީ ކުޅުނު ދެ މެޗުން ވެސް ބަލިވެފަ އެވެ. ފުރަަތަމަ މެޗުގައި ބަހްރޭން އަތުން ހަތް ވިކެޓުން ބަލިވިއިރު، ދެ ވަނަ މެޗުގައި މިއަދު އިރާން އަތުން ބަލިވީ 50 ލަނޑުންނެވެ.
ސެމީ ފައިނަލަށް ދަތުރުކޮށްފިނަމަ ރާއްޖެ އަށް ކުޅެން ޖެހޭނީ އަނެއް ގްރޫޕުގައި ހިމެނޭ ތައިލެންޑާއި އިންޑޮނޭސިއާ އާއި މިޔަންމާ އަދި ސައުދީ އަރަބިއްއާ ތެރެއިން ޓީމަކާ އެވެ. ސެމީގައި ގްރޫޕް އެކެއްގެ އެއް ވަނަ ކުޅޭނީ ގްރޫޕް ދޭއްގެ ދެ ވަނަ ޓީމާ އެވެ. އަދި ގްރޫޕް ދޭއްގެ އެއް ވަނަ ކުޅޭނީ ގްރޫޕް އެކެއްގެ އެއް ވަނަ ޓީމާ އެވެ.
އޭސީސީ ޗެލެންޖާސް ކްރިކެޓް މުބާރާތުގެ ފައިނަލަށް ދަތުރުކުރާ ދެ ޓީމެއް އޭޝިއަން ކަޕް ކޮލިފައިންގެ ދެ ވަނަ މަރުހަލާ ކަމަށްވާ އޭސީސީ ޕްރިމިއާ ކަޕަށް ދާނެ އެވެ. އެ މުބާރާތް އޮންނާނީ އަންނަ އޭޕްރީލް މަހުގެ ތެރޭގަ އެވެ.
