މަޝްހޫރު ޕްރޮޑަކްޝަން ހައުސް، ޑާކްރެއިން އެންޓަޓެއިންމަންޓުގެ "ހިނދުކޮޅެއް" މީޑިއާނެޓުގެ ވީޑިއޯކުލަބުގައި ރިލީޒްކޮށް ސްޓްރީމް ކުރަން ފަށައިފި އެވެ.
އަހުމަދު ތޮލާލް ލިޔެފައިވާ ވާހަކައެއްގެ މައްޗަށް ބިނާކޮށް އުފައްދައިފައިވާ އެ ފިލްމަކީ މީހެއްދެކެ ލޯބިވާ ދަނޑިވަޅެއްގައި އަމިއްލަ ނަފުސު އިހުތިޔާރު ކުރުމުގެ މުހިންމުކަމުގެ މައްޗަށް އަލިއަޅުވައިލައި ތައްޔާރުކޮށްފައިވާ ފިލްމެކެވެ.
އެ ފިލްމުގެ މުހިންމު ރޯލުތަކުން ފިލްމީ ދާއިރާގައި މިހާރު ފިޔަ ޖަހަމުން އަންނަ އަލިގަދަ ތަރި، އާމިނަތު ރަޝްފާ (އާޝާ) އާއި ޝަރަފުއްދީން އަބްދުﷲ ގެ އިތުރުން ފިލްމީ ދާއިރާގައި ގިނަ ދުވަހު މަސައްކަތް ކޮށްފައިވާ ތަޖުރިބާކާރު އެކްޓަރު، ރަވީ ފާރޫގު ފެނިގެންދެ އެވެ. އާދަޔާހިލާފު ސިނަމެޓޯގްރަފީއެއް ފެނިގެންދާ ފިލްމުގެ ޕްރޮޑިއުސަރުންގެ ގޮތުގައި މަސައްކަތްކޮށްފައި ވަނީ މުހައްމަދު އަލީ އަދި އައިޝަތު ފުވާދު ތައުފީގު އެވެ.
"ހިނދުކޮޅެއް" މީޑިއާނެޓުގެ ވީޑިއޯކުލަބާއި އެމްއެސްޓީވީ އަދި އެމްއެސް ލައިޓަށް ރިލީޒް ކޮށްފައިވާއިރު، ސްމޯލް ސްކްރީނުން ވީޑިއޯކްލަބްގެ ހިދުމަތް ހޯއްދަވާ ފަރާތްތަކަށް މާޗު، 23 އިން ފެށިގެން ފޯނުން އެ ފިލްމު ބަލައިލެވޭނެ ކަމަށް މީޑިއާނެޓުން ބުނެ އެވެ.
ވީޑިއޯކުލަބުން "ހިނދުކޮޅެއް" ރިލީޒްކުރިއިރު، މީގެ ދުވަސްކޮޅެއް ކުރިން މީޑިއާނެޓުން ވަނީ ދިވެހި ސީރީޒް "ހައްޔަރު" ވެސް ދައްކަން ފަށައިފަ އެވެ. ޖުމްލަ 15 އެޕިސޯޑުގެ މައްޗަށް އެކުލެވިގެންވާ، އެ ސަސްޕެންސް ތްރިލާގެފަސް އެޕިސޯޑު މިހާރު ބޮޑު ސްކްރީނަށް ރިލީޒް ކޮށްފައިވާއިރު، އާ އެޕިސޯޑު ރިލީސް ކުރާނީ ކޮންމެ ހަފުތާއެއްގެ ވެސް ބުރާސްފަތި ދުވަހު އެވެ. ފޯނުން ވީޑިއޯކުލަބުގެ ހިދުމަތް ހޯއްދަވާ ފަރާތްތަކަށް އާ އެޕިސޯޑު ބަލާލެވޭނީ ބޮޑުސްކްރީނަށް އެޕިސޯޑު ނެރޭތާ އެއްހަފުތާ ފަހުންނެވެ.
އޭގެއިތުރުން ވީޑިއޯކުލަބަށް ދެ އަހަރު ފުރުމުގެ މުނާސަބަތުގައި މީޑިއާނެޓުން ދަނީ އެނިވާސަރީ ޕްރޮމޯޝަނެއްވެސް ކުރިއަށް ގެންދަމުންނެވެ. މިމަހުގެ 21 ވަނަ ދުވަހުގެ ނިޔަލަށް ކުރިއަށްދާ އެ ޕްރޮމޯޝަނުގައި ކޮންމެ ހަފުތާއަކު ނަސީބުވެރި ފަރާތެއް ހޮވާނެ އެވެ. ފަސް ހަފުތާއަށް ކުރިއަށް ގެންދާ އެ ޕުރޮމޯޝަނުގައި ވީޑިއޯކުލަބަށް ސަބްސްކުރައިބް ކޮށްގެން ބައިވެރިވެވޭނެ އެވެ. ޕްރޮމޯޝަނުގައި ހޮވޭ ނަސީބުވެރި ފަރާތްތަކަށް އިނާމެއްގެ ގޮތުން މީޑިއާނެޓުން ވަނީ އިތުރު ބައިވެރިއަކާއެކު ދެ ދުވަހަށް މާލެ އަތޮޅުގެ ގެސްޓްހައުސްއެއްގައި ހިލޭ ހުރުމާއި ކެއުން އަދި ދެކޮޅު ޓްރާސްފާ ހަމަޖައްސާފަ އެވެ.
މީޑިއާނެޓުގެ ވެބްސައިޓު މެދުވެރިކޮށް ވީޑިއޯ ކްލަބަށް ސަބްސްކުރައިބު ކޮށްލައިގެން ވީޑިއޯކުލަބު މެދުވެރިކޮށް "ހިނދުކޮޅެއް" އަދި "ހައްޔަރު" ވެސް ބަލައިލެވޭނެ އެވެ. އަދި ވީޑިއޯކުލަބުގެ އެނިވާސަރީ ޕްރޮމޯޝަނުގައި ވެސް ބައިވެރިވެވޭނެ އެވެ.
