ކަރަބާއޯ ކަޕްގެ ފައިނަލް މެޗުގައި މިރޭ މެންޗެސްޓާ ޔުނައިޓެޑާއި ނިއުކާސަލް ޔުނައިޓެޑް ބައްދަލުކުރާ ފޯރިގަދަ މެޗު މީޑިއާނެޓުގެ އައިސް ސްޕޯޓްސް ޗެނަލް މެދުވެރިކޮށް ދިވެހިންނަށް ލައިވްކޮށް ޓީވީ އަދި މީޑިއާނެޓުގެ ފޯނު އެޕްލިކޭޝަން އެމް އެސް ޑިޖިޓަލް މެދުވެރިކޮށް ބަލާލެވޭނެ އިންތިޒާމު އެ ކުންފުނިން ހަމަޖައްސައިފި އެވެ.
މީގެ ކުރިން މި މެޗު ބަލަން ސްޓްރީމް ކުރަންޖެހުނު ނަމަވެސް މިއަހަރު ސްޓްރީމްކުރާ ލިންކެއް ނުލިބިގެން އުޅޭކަށް ނުޖެހޭނެ ކަމަށް މީޑިއާނެޓުން ބުނެ އެވެ. އެ މެޗު ފަށާނީ މިރޭ 9:30 ގައެވެ.
ކަރަބާއޯ ކަޕަކީ 1960 ވަނަ އަހަރުން ފެށިގެން ކުޅެމުން އަންނަ ޒަމާންވީ ފުޓުބޯޅަ މުބާރާތެކެވެ. ޕްރިމިއާ ލީގާއި އެފްއޭ ކަޕާއެކު އިނގިރޭސި ފުޓުބޯޅައިގެ އެންމެ ބޮޑު ތިން މުބާރާތުގެ ތެރޭގައި ހިމެނޭ ކަރަބާއޯ ކަޕަކީ ޖުމްލަ 92 ޓީމު، ނޮކްއައުޓް އުސޫލުން ވާދަކުރާ މުބާރާތެކެވެ.
މި މުބާރާތުގެ އެންމެ ކާމިޔާބު ޓީމަކީ ފާއިތުވި އަހަރުގެ ޗެމްޕިއަން، ލިވަޕޫލް އެވެ. އެ ކުލަބުން ކަރަބާއޯ ކަޕު ނުވަ ފަހަރު އުފުލާލައިފައިވެ އެވެ.
އިނގިރޭސި ރަސްމީ ސްޓޭޑިއަމް ވެމްބްލީގައި ކުޅުމަށް ހަމަޖެހިފައިވާ މިއަހަރުގެ ފައިނަލް މެޗުގައި ވާދަކުރާ މެންޗެސްޓާ ޔުނައިޓެޑުން ވަނީ މުބާރާތުގެ ފައިނަލުގައި މީގެ ކުރިން 9 ފަހަރު ވާދަކޮށްފަ އެވެ. ނިއުކާސަލް ފައިނަލުގައި ކުޅެފައި ވަނީ އެއްފަހަރެވެ.
މި ފޯރިގަދަ މެޗު މީޑިއާނެޓުން ދިވެހިންނާއި ހަމައަށް ގެނެސްދޭއިރު ފުޓުބޯޅައިގެ އިތުރު މުބާރާތްތަކުގެ މުހިންމު މެޗުތައް ވެސް އައިސްގެ ޗެނަލްތައް މެދުވެރިކޮށް ފެނިގެންދާނެ އެވެ. އެގޮތުން ސްޕެނިޝް ކޮޕަ ޑެލްރޭ ސެމީ ފައިނަލް އަދި ފައިނަލް މެޗުވެސް މިފަހަރު މީޑިއާނެޓު ކަސްޓަމަރުންނަށް ލައިވްކޮށް ޓީވީ އަދި ފޯނުން އެމް އެސް ޑިޖިޓަލް އެޕްލިކޭޝަން މެދުވެރިކޮށް ބަލާލެވޭނެ އެވެ.
މީޑިއާ ރިޕޯޓުތައް ބުނާގޮތުން ދެޓީމުން ވެސް ދަނީ މެޗަށް ނުކުތުމަށް ވަރަށް ވަރުގަދައަށް ތައްޔާރުވަމުންނެވެ.
މެންޗެސްޓާ ޔުނައިޓެޑް
މިވަގުތު އިނގިރޭސި ފުޓުބޯޅައިގެ އެންމެ ފޯމުގައި އޮތް ޓީމަކީ ކޮބައިތޯ ސުވާލުކޮށްފިނަމަ ޖަވާބަކަށް ވާނީ ޔަގީނުންވެސް މެންޗެސްޓާ ޔުނައިޓެޑެވެ. މިވަގުތު ޕްރިމިއާ ލީގު ޓޭބަލްގެ ތިން ވަނައިގައި ޔުނައިޓެޑް އޮތްއިރު، ޔޫރޮޕާ ލީގުގެ ނޮކްއައުޓް މެޗުގައި ސްޕެއިންގެ ވަރުގަދަ ބާސެލޯނާގެ މައްޗަށް ވެސް ޔުނައިޓެޑުން ވަނީ ކުރިހޯދައިފަ އެވެ.
ދުނިޔޭގެ އެންމެ މޮޅު އެއްކުޅުންތެރިޔާ ކްރިސްޓިއާނޯ ރޮނާލްޑޯ ޓީމު ދޫކޮށް ދިޔަފަހުން، މި ޓީމު ފެންނަނީ އިތުރަށް ވަރުގަދަކޮށްނެވެ. އެގޮތުން ލީގުގައި މިހާތަނަށް 14 ގޯލު ޖަހާދީފައިވާ އިނގިރޭސި ފޯވަޑް މާކަސް ރަޝްފޯޑާއި މެދުތެރޭގައި މުހިންމު ދައުރެއް އަދާކުރަމުން ދާ ބްރޫނޯ ފެނާންޑޭޒް ފާހަގަކޮށްލެވެ އެވެ.
މެންޗެސްޓާ ޔުނައިޓެޑު ފައިނަލަށް ދަތުރުކުރީ ސެމީގައި ނޮޓިންގްހަމް ފޮރެސްޓް 2-0 ގެ ނަތީޖާއަކުން ބަލިކުރުމަށްފަހު އެވެ. މެންޗެސްޓާ ޔުނައިޓެޑުން ވަނީ މީގެ ކުރިން ފަސް ފަހަރު މިމުބާރާތް ކާމިޔާބުކޮށްފަ އެވެ.
ނިއުކާސަލް ޔުނައިޓެޑް
ނިއުކާސަލްއިން އަންނަނީ މި ސީޒަނުގައި އާދަޔާ ހިލާފު މޮޅު ކުޅުމެއް ދައްކަމުންނެވެ. މިފަހުގެ ތާރީހުގައި ވެސް މިއީ ނިއުކާސަލް ދުށް އެންމެ ކާމިޔާބު ސީޒަންކަން ޔަގީނެވެ. 2021 ވަނަ އަހަރުގެ އޮކްޓޫބަރު މަހު ސައޫދީ ވިޔަފާރިއަކުން ކުލަބު ގަތުމަށްފަހު، މުހިންމު ކުޅުންތެރިންތަކެއް ވަނީ އެޓީމަށް ގެނެސްފަ އެވެ. މީގެއިތުރުން އެ ކުލަބުގެ ކޯޗު، އެޑީ ހަވީ ފާހަގަކޮށްލެވެނީ މިވަގުތު ތިބި ޒުވާން ކޯޗުންގެ ތެރެއިން އެންމެ ހުނަރުވެރި އެއް ކޯޗުގެ ގޮތުގަ އެވެ.
ޓީމުގެ މުހިންމު ކުޅުންތެރިންނަށް ބަލާއިރު، ގޯލް ކީޕަރު، ނިކް ޕޯޕްއާއި ޑިފެންސްގައި ކުޅެމުން އެޓޭކްތަކުގައި ވެސް ނުރައްކާ ކުރަމުންއަންނަ ޓީމުގެ ކެޕްޓަން، ކެއިރަން ޓްރިޕިއާ އަދި ގޯލާއި ރައްޓެހި ފޯވަޑް މިގުއެލް އަލްމިރޮން ފާހަގަކޮށްލެވެ އެވެ. ނިއުކާސަލް މީގެކުރިން މި މުބާރާތުގެ ފައިނަލަށް ދަތުރުކޮށްފައިވަނީ ހަމައެކަނި 1976 ވަނަ އަހަރުއެވެ. އެފަހަރު އެޓީމު ވަނީ ފައިނަލުގައި ބަލިވެފަ އެވެ.
މީޑިއާނެޓުގެ އެންމެ ބޮޑު އަމާޒަކީ ކުރިއަށް އޮތް ތަނުގައިވެސް ދިވެހިން ޝައުގުވެރިވާ އަދި ބޭނުންވާ މިފަދަ ފޯރިގަދަ މުބާރާތްތަކާއި އެހެނިން ކޮންޓެންޓުތައް ދިވެހިންނާ ހަމައަށް ފޯރުކޮށްދިނުން ކަމަށް އެ ކުންފުނިން ބުނެ އެވެ.
