ތައިލެންޑްގައި މިއަދު ފެށި އޭސީސީ ޗެލެންޖާސް ކްރިކެޓް މުބާރާތުގައި ކުޅުނު ފުރަތަމަ މެޗުން ރާއްޖޭން އީރާން އަތުން 27 ލަނޑުން މޮޅުވެއްޖެ އެވެ.
އަށް ގައުމަކުން ވާދަކުރާ މި މުބާރާތް 50 އޯވަރުގެ ފޯމެޓަށް ކުޅޭއިރު، ރާއްޖެ ހިމެނެނީ އިރާނާއި ބޫޓާންގެ އިތުރުން ބަހްރޭނާ އެއް ގްރޫޕެއްގަ އެވެ. ރާއްޖޭން ފުރަތަމަ މެޗުގައި އިރާން އަތުން މޮޅުވިއިރު، މިއީ މި މުބާރާތުގައި ކުރިއަށްދާން ބަލާއިރު ދިވެހި ޓީމުން ކުރިއަށް އެޅި ރަނގަޅު ފިޔަވަޅެކެވެ. ރާއްޖެ ގްރޫޕްގެ އަނެއް މެޗުން ބަހްރޭނުން ވަނީ ހަތް ވިކެޓުން ބޫޓާން ބަލިކޮށްފަ އެވެ.
ޓެރްދްތާއީ ކްރިކެޓް ސްޓޭޑިއަމްގައި މިއަދު ކުޅުނު މެޗު ފަށަން ނެގި ޓޮސް ދިމާވީ ރާއްޖެ އަށް ރާއްޖޭން ނިންމީ ބެޓް ކުރުމަށެވެ.
ރާއްޖޭން ކުޅެން އަރައި، 31.2 އޯވަރުގެ ތެރޭގައި ވަނީ 157 ލަނޑު ހަދައިފަ އެވެ. ރާއްޖެ އަށް އެންމެ ރަނގަޅު ކުުޅުމެއް ދެއްކީ 40 ބޯޅައިން 58 ލަނޑު ހެދި ޓީމުގެ ކެޕްޓަން، އާދަމް ނާސިފް އުމަރު (އާދަޅޭ) އެވެ. ދެން، ރާއްޖެ ޓީމަށް ބެޓިންގައި އެންމެ ރަނގަޅު ކުޅުމެއް ދެއްކީ 14 ލަނޑު އެއްކުރި އިބްރާހިމް ރިޒާން އާއި ނުބައިނުވެ، 17 ލަނޑު ހެދި ޝުނާން އަލީ އެވެ.
ޖަވާބުގައި އިރާނުން ކުޅެން އަރައި، 42.3 އޯވަރުގައި ހުރިހާ ކުޅުންތެރިން ނުބައިވެގެން ހެދުނީ 130 ލަނޑެވެ. ބޯލިން އަށް ބަލާއިރު، އާދަޅޭ އާއި ހަަސަން އިބްރާހިމް ކޮންމެ ކުޅުންތެރިއަކު ވަނީ ހަތަރު ވިކެޓް ނަގައިފަ އެވެ.
އޭސީސީ ޗެލެންޖާސް ކަޕްގައި ޓީމްތައް ދެ ގްރޫޕަށް ބަހާލައިގެން މެޗުތައް ކުޅޭއިރު، ގްރޫޕުގެ ގަދަ ދެ ޓީމް ސެމީ ފައިނަލަށް ކޮލިފައިވާނެ އެވެ. އަދި ފައިނަލަށް ހޮވޭ ދެ ޓީމް ކޮލިފައިވާނީ އޭޝިއަން ކަޕް ކޮލިފައިންގެ ދެ ވަނަ މަރުހަލާ ކަމަށްވާ އޭސީސީ ޕްރިމިއާ ކަޕަށެވެ. މި މުބާރާތް އޮންނާނީ އަންނަ އޭޕްރީލް މަހުގެ ތެރޭގަ އެވެ.
ރާއްޖޭން ކުޅޭ ދެ ވަނަ މެޗުގައި އާދިއްތަ ދުވަހު ބައްދަލުކުރާނީ ބަހްރޭނާ އެވެ.
