ވަޒީފާ އަދާކުރާ މީހުންގެ ހައްގުތަކާ ގުޅޭ "އޮކިއުޕޭޝަނަލް ސޭފްޓީ އެންޑް ހެލްތު ބިލް" ރައްޔިތުންގެ މަޖިލީހަށް ހުށަހެޅުމާ ގުޅިގެން މަސައްކަތެރިންނާ ގުޅޭ ޖަމިއްޔާ, ޖަމާއަތްތައް ތަމްސީލުކުރާ މޯލްޑިވްސް ޓްރޭޑް ޔޫނިއަން ކޮންގްރެސް (އެމްޓީޔޫސީ) އިން މަރުހަބާ ކިޔައިފި އެވެ.
މަސައްކަތްތެރިން މަސައްކަތްކުރާ މާހައުލުގެ ސަލާމަތްތެރިކަމާއި މަސައްކަތްތެރިންގެ ސިއްހީ ރައްކާތެރިކަން ކަށަވަރުކޮށް ދިނުމަށް ބޭނުންވާ އޮނިގަނޑު އެކުލެވޭ ބިލް މަޖިލީހަށް ހުށަހަޅައި ބަހުސް ވަނީ ފަށައިފަ އެވެ.
އެމްޓީޔޫސީއިން ނެރުނު ބަޔާނެއްގައި ބުނީ މަސައްކަތުގެ މާހައުލުގެ ސަލާމަތާއި ރައްކާތެރިކަމަކީ ކޮންމެ މަސައްކަތްތެރިއަކަށް ވެސް މުހިންމު އަދި އަސާސީ ހައްގެއް ކަމަށެވެ.
"ރާއްޖޭގެ ގާނޫނީ އޮނިގަނޑުގައި އެކަށީގެންވާ މިންވަރަށް ބަޔާންވެފައި ނެތުމާއި ތަންފީޒުވަމުން ނުދިއުމުގެ ސަބަބުން މަސައްކަތުގެ މާހައުލުގެ ރައްކާތެރިކަން ކަށަވަރު ނުވެ އެތައް ހިތާމަވެރި ހާދިސާތަކެއް ހިނގާ، މަސައްކަތްތެރިންގެ ފުރާނަ ގެއްލި، މިފަދަ ހާދިސާތަކުން ލިބިފައިވާ ގެއްލުމުގެ ބަދަލު މަސައްކަތްތެރިންނާއި އާއިލާއަށް ލިބިފައި ނުވޭ،" ބަޔާނުގައިވެ އެވެ.
މި ފަދަ ބިލެއް ފާސްކުރުމަށް ފާއިތުވީ 10 އަހަރު ތެރޭގައި އެކި ސަރުކާރުތަކަށް ގޮވާލައިފައިވާ ކަން ފާހަގަކުރައްވައި ބަޔާނުގައި އިތުރަށް ބުނީ މަސައްކަތްތެރިންނަށް ގާނޫނީ ރައްކާތެރިކަން ލިބުމަކީ މުހިންމު ބޭނުންތެރިކަމެއް ކަމަށް ދެކޭ ކަމަށެވެ.
މި ބިލު މިހާރު އޮތް ގޮތަށް މާ ބޮޑު ބަދަލެއް ނުގެނެސް، ޓްރޭޑް ޔޫނިއަންގެ މަޝްވަރާއާއެކު ވީ އެންމެ އަވަހަށް ފާސް ކޮށް ދިނުމަށް ވެސް އެދިފައިވެ އެވެ.
މި ބިލަކީ ސަރުކާރުގެ ސްޓްރެޓިކް އެކްޝަން ޕްލޭނުގައި ހިމަނާފައިވާ އަދި މި ސަރުކާރުން ވައުދުވެފައިވާ ސިޔާސަތުތަކާ ގުޅޭ ބިލެކެވެ. ބިލުގެ މަސައްކަތް ނިމި ގާނޫނަކަށް ބަދަލުވުމުން، ތަރައްގީވެފައިވާ ގައުމުތަކުން ވަޒީފާ އަދާކުރާ މީހުންނަށް ލިބޭ ގާނޫނީ ރައްކާތެރިކަން ލިބޭނެ މަގުފަހި ވެގެން ދާނެ އެވެެ.
މި ބިލުގެ އިތުރުން ވަޒީފާ އަދާކުރާ މީހުންނަށް ގާނޫނު އަސާސީން ކަށަވަރުކޮށްދޭ މުހިންމު ހައްގުތައް ކަށަވަރުކޮށްދޭނެ ގާނޫނީ އޮނިގަނޑު އެކުލަވާލަން ފަހިކޮށްދޭ އިންޑަސްޓްރިއަލް ރިލޭޝަންސް ބިލް އެކުލަވާލުމުގެ މަސައްކަތް ވެސް ސަރުކާރުން އަންނަނީ ކުރަމުންނެވެ.
