އިންޑިއާގެ ޓެކްސް އިދާރާތަކުން ބީބީސީގެ އޮފީސްތައް ބަލައި ފާސްކުރުމަކީ ބިރުދެއްކުމުގެ އަމަލެއްގެ ގޮތުގައި އިނގިރޭސިވިލާތުގެ ޕާލަމެންޓް މެމްބަރުން ސިފަކޮށްފި އެވެ.
މިދިޔަ ހަފުތާގައި މުމްބާއީ އާއި ނިއު ދިއްލީގައި ހުންނަ ބީބީސީގެ އޮފީސް ފާސްކުރީ ތިން ދުވަހުގެ އޮޕަރޭޝަނެއްގަ އެވެ. ބައެއް މުވައްޒަފުން ރޭގަނޑު ގެޔަށް ދިޔަ ނުދީ ހިފަހައްޓައި ސުވާލުކުރި ކަމަށް ބީބީސީއިން ބުންޏެވެ.
ބީބީސީއިން އެ އޮޕަރޭޝަނަށް އެއްބާރުލުންދެމުންދާ އިރު، ދާދި ފަހުން ވަނީ އިންޑިއާގެ ބޮޑު ވަޒީރު ނަރެންދްރަ މޯދީއަށް ފާޑުކިޔާ ޑޮކިޔުމެންޓްރީއެއް ދައްކައިފަ އެވެ.
އިނގިރޭސި ފޮރިން އޮފީހުގެ މިނިސްޓަރު ޑޭވިޑް ރަޓްލީ ވިދާޅުވީ އެ މައްސަލަ ވަރަށް ގާތުން ބަލަމުންދާ ކަމަށެވެ.
ލޭބާ ޕާޓީގެ ޕާލަމެންޓް މެމްބަރު ފެބިއަން ހެމިލްޓަން ވިދާޅުވީ "އެއްވެސް ސަބަބެއް ނެތި ފާޑުކިޔުން ނުހުއްޓުވޭނެ" ކަމަށާއި އިންޑިއާގައި ހިންގި އޮޕަރޭޝަނާ މެދު ކަންބޮޑުވާ ކަމަށެވެ.
ޕާލަމެންޓް މެމްބަރު ޖިމް ޝެނަން ވިދާޅުވީ އެއީ އިންޑިއާއިން ހިންގި ގަސްދުގައި ބިރުދެއްކުމުގެ އަމަލެއް ކަމަށެވެ. އިންޑިއާގެ ސަފީރު ފޮރިން މިނިސްޓްރީއަށް ހާޒިރުކޮށް ސުވާލުކުރުމަށް އޭނާ ގޮވާލެއްވި އެވެ.
ބީބީސީއިން ނެރުނު "އިންޑިއާ: ދަ މޯދީ ކުއެސްޝަން" އާއްމުކޮށް ޓީވީއިން ދެއްކީ އިނގިރޭސިވިލާތުގައި އެކަންޏެވެ. އެހެން ނަމަވެސް ބީބީސީގެ ވެބްސައިޓާއި ޔޫޓިއުބުން އެހެން ގައުމުތަކުގައި ތިބެގެން ވެސް އެ ޑޮކިޔުމެންޓްރީ ބެލެނޭ އެވެ.
އިންޑިއާގެ ސަރުކާރުން އެ ޑޮކިޔުމެންޓްރީ މަނާކޮށް، އެ ގައުމުގައި އޭގެ ވީޑިއޯތައް ދައުރު ކުރުން ހުއްޓުވަން ފިޔަވަޅު އެޅި އެވެ. އެއީ 2002 ވަނަ އަހަރު މުސްލިމުންނާ ދެކޮޅަށް ހިންދޫން ހިންގި ގަތުލުއާއްމުގައި މޯދީގެ ދައުރު ތަހުގީގު ކުރި ޑޮކިޔުމެންޓްރީއެކެވެ.
