އިނގިރޭސިވިލާތުގެ ރަސްގެފާނު ޗާލްސްގެ "ކޮރޮނޭޝަން" ނުވަތަ ތާޖުކޮޅު އެޅުއްވުމުގެ ރަސްމިއްޔާތަށް ފަހު ލަވަކިޔުމުގެ ފުރުސަތު ދިނުމުން، އެޑޭލް އާއި އެޑް ޝީރަން އެ ހުށަހެޅުން ބަލައިނުގަތް ކަމަށް ރިޕޯޓުތައް ބުނެފި އެވެ.
ރަސްގެފާނު ޗާލްސްގެ ކޮރޮނޭޝަން ރަސްމިއްޔާތު އޮންނާނީ މޭ ހަތް ވަނަ ދުވަހު އެވެ. އެ ރަސްމިއްޔާތަށް ފަހު ބާއްވާ ކޮންސެޓުގައި އެޑޭލް އާއި އެޑް ޝީރަންގެ ހުށަހެޅުން ހިމެނުމަށް ރަސްގެފާނު ވަރަށް ބޭނުންފުޅުވި ކަމަށް އޯކޭ! މެގެޒިންގައިވެ އެވެ.
ރިޕޯޓުތައް ބުނާ ގޮތުން އުމުރުން 32 އަހަރުގެ އެޑް ޝީރަން ހުށަހަޅުން ބަލައިނުގަތީ އޭނާގެ ޝެޑިއުލް ޖާގަ ނުދޭތީ އެވެ. ކޮރޮނޭޝަން އޮންނަ ދުވަސްވަރަކީ އޭނާ އެމެރިކާގައި ޝޯތަކެއް ދޭން ރާވަފައިވާ ދުވަސްވަރެވެ.
މިދިޔަ ޖޫން މަހު އެޑް ޝީރަން ވަނީ އަވަހާރަވި ރާނީ އެލިޒަބަތުގެ ޕްލެޓިނަމް ޖުބިލީ ފާހަގަކުރަން ބޭއްވި ހަފްލާގައި އޭނާގެ ލަވަ "ޕާފެކްޓް" ހުށަހަޅައިދީފަ އެވެ.
ރިޕޯޓުތައް ބުނާ ގޮތުން ޝާހީ ގަނޑުވަރުގެ ހުށަހެޅުމަށް އެޑޭލް ވެސް ނޫނެކޭ ބުނެފައިވާ އިރު، ވަކި ސަބަބެއް އަންގާފައެއް ނުވެ އެވެ. އެހެންވެ، އެއީ ޝާހީ ކަމެއްގައި ބައިވެރިވާން ބޭނުން ނުވާތީ ނިންމި ނިންމުމެއްގެ ގޮތުގައި ބައެއް މީހުން ދަނީ ސިފަކުރަމުންނެވެ.
ޑެއިލީ މެއިލް ނޫހުން ރިޕޯޓުކުރާ ގޮތުގައި އެމެރިކާގެ ޕޮޕް އަދި ސޯލް ލަވަތަކުގެ ލެޖެންޑް ލަޔަނެލް ރިޗީ ދަނީ ކޮންސެޓުގައި ހުށަހެޅުމާ މެދު ވިސްނަމުންނެވެ. އޭގެ އިތުރުން 1990 ގެ އަހަރުތަކުގައި މަގްބޫލުވި އިނގިރޭސި ޕޮޕް ބޭންޑް ސްޕައިސް ގާލްސްގެ ހުށަހެޅުން ފެންނާނެ ކަމަށް ބެލެވެ އެވެ.
