ފުރަތަމަ ބޮޑު ހަނގުރާމައިގެ މައްޗަށް އުފެއްފި ފިލްމު "އޯލް ކުޔައެޓް އޮން ދަ ވެސްޓަން ފްރަންޓް" އަަށް މި އަހަރުގެ ބަފްތާޒްގައި ހަތް އެވޯޑު ލިބިއްޖެ އެވެ.
އެންމެ މޮޅު ފިލްމުގެ އިތުރުން އެންމެ މޮޅު އެޑެޕްޓެޑް ސްކްރީންޕްލޭ އަދި އިނގިރޭސި ނޫން ބަހަކު އުފެއްދި އެންމެ މޮޅު ފިލްމާއި އެންމެ މޮޅު ޑިރެކްޓަރުގެ އެވޯޑް ވެސް ލިބުނީ އެ ފިލްމަށެވެ.
އިނގިރޭސި ފިލްމު އެކެޑެމީއިން ދޭ އެންމެ ޝަރަރުވެރި އެވޯޑްތައް ދެން އެންމެ ގިނައިން ލިބުނީ "ދަ ބެންޝީޒް އޮފް އިނިޝެރިން" އާއި "އެލްވިސް" އަށެވެ. އެ ދެ ފިލްމަށް ހަތަރު އެވޯޑް ލިބުނެވެ.
"އޯލް ކުޔައެޓް އޮން ދަ ވެސްޓަން ފްރަންޓް" އަކީ 1928 ވަނަ އަހަރު އެރިކް މާރިއާ ރެމާކް ލިޔުނު ވާހަކައެއްގެ މައްޗަށް ހެދި ފިލްމެކެވެ. އެންމެ މޮޅު ޑިރެކްޓަރުގެ އެވޯޑު ލިބުނީ އެ ފިލްމުން އެޑްވާޑް ބާގާ އަށެވެ.
އެންމެ މޮޅު ސަޕޯޓިން އެކްޓަރު އަދި އެކްޓްރެސްގެ އެވޯޑް ލިބުނީ "ދަ ބެންޝީޒް އޮފް އިނިޝެރިން" އިން ކެރީ ކޮންޑޯން އާއި ބެރީ ކިއޯގަން އަށެވެ.
ފިލްމު "އެލްވިސް" އަށް ލިބުނީ އެންމެ މޮޅު ކާސްޓިން އެންމެ މޮޅު ކޮސްޓިޔުމް ޑިޒައިން އަދި އެންމެ މޮޅު ލީޑިން އެކްޓަރުގެ އެވޯޑެވެ. އެ ފިލްމުގައި ލެޖެންޑަރީ ލަވަކިޔުންތެރިޔާ އެލްވިސްގެ ރޯލުން ފެނިގެން ދިޔައީ އޯސްޓިން ބަޓްލާ އެވެ.
އެންމެ މޮޅު އެކްޓްރެސްގެ އެވޯޑް ލިބުނީ ފިލްމް "ޓާ" އިން ކޭޓް ބްލެންޗެޓް އަށެވެ.
