އިންޑިއާގައި ހުންނަ ބީބީސީގެ އޮފީސްތައް ބަލައި ފާސްކުރުމަށް ފަހު އެ ކުންފުނިން ޓެކްސްއަށް މަކަރު ހަދަމުންދާ ކަމަށް އިދާރާތަކުން ތުހުމަތުކޮށްފި އެވެ.
އިންޑިއާގެ ޓެކްސް އިދާރާއިން ނެރުނު ބަޔާނުގައި ސީދާ ބީބީސީގެ ނަން ފާހަގަކޮށްފައެއް ނުވެ އެވެ. އެހެން ނަމަވެސް މި ހަފުތާގައި ދިއްލީ އަދި މުމްބާއީގައި ބީބީސީގެ އޮފީސްތައް ބަލައި ފާސްކުރި އެވެ.
ބީބީސީއިން ބުނީ ޓެކްސް އިދާރާގެ ތަހުގީގަށް އެއްބާރުލުން ދޭނެ ކަމަށާއި ޓެކްސް އޮފިޝަލުން ކުންފުންޏާ ސީދާ މުއާމަލާތްކޮށްފި ނަމަ ޖަވާބު ދޭނެ ކަމަށެވެ.
އިންޑިއާގައި ބީބީސީގެ އޮފީސްތައް ބަލައި ފާސްކުރަން ތިން ދުވަހުގެ އޮޕަރޭޝަނެއް ހިންގި އިރު، ބޮޑު ވަޒީރު ނަރެންދްރަ މޯދީއަށް ފާޑުކިޔާ ޑޮކިޔުމެންޓްރީއެއް ނެރުނު މައްސަލައިގައި އިންޑިއާ ސަރުކާރުން ދާދި ފަހުން ނުރުހުން ފާޅުކުރި އެވެ.
ހުކުރު ދުވަހު ނެރުނު ބަޔާނުގައި އިންޑިއާގެ އިންކަމް ޓެކްސް ޑިޕާޓްމަންޓުން ބުނީ ބީބީސީގެ ޔުނިޓުތަކުން އިދާރާތަކަށް ރަސްމީކޮށް ރިޕޯޓުކުރާ އާމްދަނީ އާއި ފައިދާގެ އަދަދުތަކަކީ އެ ގައުމުގައި ހިންގާ އޮޕަރޭޝަންތަކާ އަޅާ ބަލާއިރު މާ ކުޑަ އަދަދުތަކެއް ކަމަށެވެ.
"ހޯދުންތަކުން އެނގޭ ގޮތުގައި ބައެއް އާމްދަނީއަށް ދައްކަން ޖެހޭ ޓެކްސް ދައްކާފައެއް ނުވޭ."
ބީބީސީއިން ނެރުނު "އިންޑިއާ: ދަ މޯދީ ކުއެސްޝަން" އާއްމުކޮށް ޓީވީއިން ދެއްކީ އިނގިރޭސިވިލާތުގައި އެކަންޏެވެ. އެހެން ނަމަވެސް ބީބީސީގެ ވެބްސައިޓާއި ޔޫޓިއުބުން އެހެން ގައުމުތަކުގައި ތިބެގެން ވެސް އެ ޑޮކިޔުމެންޓްރީ ބެލެނޭ އެވެ.
އިންޑިއާގެ ސަރުކާރުން އެ ޑޮކިޔުމެންޓްރީ މަނާކޮށް، އެ ގައުމުގައި އޭގެ ވީޑިއޯތައް ދައުރު ކުރުން ހުއްޓުވަން ފިޔަވަޅު އެޅި އެވެ. އެއީ 2002 ވަނަ އަހަރު މުސްލިމުންނާ ދެކޮޅަށް ހިންދޫން ހިންގި ގަތުލުއާއްމުގައި މޯދީގެ ދައުރު ތަހުގީގު ކުރި ޑޮކިޔުމެންޓްރީއެކެވެ.
