އޭޝިއަން ކްރިކެޓް ކައުންސިލް (އޭސީސީ) އޭޝިއަން ކަޕް 2023 ގެ ކޮލިފައިން ފުރަތަމަ ބުރުގައި ކުޅޭ އޭސީސީ ޗެލެންޖާސް ކަޕްގައި ވާދަކުރާ ރާއްޖޭގެ ގައުމީ ފިރިހެން ކްރިކެޓް ޓީމު އެކުލަވާލައިފި އެވެ.
ތައިލެންޑުގެ ވެރިރަށް ބެންކޮކްގައި އަންނަ މަހުގެ 24 އިން މާޗް ހަތަކަށް ބޭއްވުމަށް ހަމަޖެހިފައިވާ ޗެލެންޖާސް ކަޕްގައި އަށް ގައުމަކުން ވާދަކުރާނެ އެވެ.
އޯޑީއައި ފޯމެޓަށް ކުޅެ މި މުބާރާތުގައި ރާއްޖެ ހިމެނުނީ ބަހްރެއިން، ބޫޓާން އަދި އީރާން އާއިއެކު ގްރޫޕް އޭގަ އެވެ. ގްރޫޕް ބީގައި ހިމެނެނީ ސައުދިއަރަބިއްޔާ، އިންޑޮނޭޝިއާ، ތައިލެންޑް އަދި މިޔަންމާ އެވެ.
އޭސީސީ ޗެލެންޖުކަޕަށް ގައުމީ ޓީމް މިހާރު އެކުލަވާލާފައިވާއިރު، މުބާރާތުގައި ޓީމްގެ ކެޕްޓަންގެ ޒިންމާ އަދާކުރާނީ އާދަމް ނަސީފް އުމަރު އެވެ.
ގައުމީ ޓީމްގެ ކެޕްޓަނަކަށް މިދިޔަ އަހަރު ހަމަޖެއްސި އަޒްޔާން ފަރުހަތު ޖަލީލް ހުރީ އަނިޔާގަ އެވެ. މި މުބާރާތުގައި ޓީމްގެ ވައިސް ކެޕްޓަންކަން ހަވާލްކޮށްފައިވަނީ އަހުމަދު އަމީލްއާ އެވެ.
މިފަހަރުގެ ޓީމްގައި ޒުވާން ވިކެޓްކީޕަރު ޝިއުސް ފަރީދު ހިމަނާފައިވާއިރު، ތަޖުރިބާކާރު ސްޕިން ބޯލަރު މުހައްމަދު މަހްފޫޒު ވެސް ޓީމްގައި ހިމެނެ އެވެ. މީގެ އިތުރުން އޮސްޓްރޭލިއާގެ ކުލަބަކަށް ކުޅެމުން އައި ބާރު އުކުންތެރިޔާ ހަސަން އިބްރާހިމްވެސް ޓީމްގައި ހިމެނެ އެވެ.
ގައުމީ ޓީމްގެ ކޯޗަކަށް މި މުބާރާތުގައިވެސް ހަރަކާތްތެރިވާނީ އަހުމަދު ނީޝާމް އެވެ. އޭނާގެ އެހީތެރިއަކީ އިމާދު އިސްމާއިލް އެވެ. މެނޭޖަރަކަށް ހަމަޖައްސާފައިވަނީ އިބްރާހިމް ޝާޒު އެވެ.
މިމަހުގެ ފަހުކޮޅު އޮންނަ މުބާރާތަށް ގައުމީ ޓީމްގެ ޕްރެކްޓިސްތައް ފަށާފައިވަނީ މިދިޔަ ޖެނުއަރީ މަހުގަ އެވެ.
އޭސީސީ ޗެލެންޖާސް ކަޕްގައި ޓީމްތައް ދެ ގްރޫޕަށް ބަހާލައިގެން މެޗުތައް ކުޅޭއިރު، ގްރޫޕުގެ ގަދަ ދެ ޓީމް ސެމީ ފައިނަލަށް ކޮލިފައިވާނެ އެވެ. އަދި ފައިނަލަށް ހޮވޭ ދެ ޓީމް ކޮލިފައިވާނީ އޭޝިއަން ކަޕް ކޮލިފައިންގެ ދެ ވަނަ މަރުހަލާ ކަމަށްވާ އޭސީސީ ޕްރިމިއާ ކަޕަށެވެ. މި މުބާރާތް އޮންނާނީ އަންނަ އޭޕްރީލް މަހުގެ ތެރޭގަ އެވެ.
އޭސީސީ ޗެލެންޖާސް ކަޕްގައި ވާދަކުރާ ގައުމީ ޓީމް:
އާދަމް ނާސިފް - ބެޓްސްމަން (ކެޕްޓަން)
އަހުމަދު އަމީލް - އޯލް ރައުންޑަރ (ވައިސް ކެޕްޓަން)
މުހައްމަދު ރިޝްވާން - ބެޓްސްމަން
ހަސަން ހާޒިގް - ވިކެޓް ކީޕަރު/ބެޓްސްމަން
އިބްރާހިމް ނަޝާތު - އޯލް އިރައުންޑަރ
މުހައްމަދު އައްޒާމް - ވިކެޓްކީޕަރު/ބެޓްސްމަން
އިބްރާހިމް ނަޒްވާން - އޯލް ރައުންޑަރ
އިސްމާއިލް އަލީ - ބެޓްސްމަން
ޝިއުޒް ފަރީދު - ބެޓްސްމަން
ލީމް ޝަފީގް - ބޯލަރ
ހަސަން އިބްރާހިމް - ބޯލަރ
އިބްރާހިމް ރިޒާން - ބޯލަރ
އަލީ ޝުނާން - ބޯލަރ
މުހައްމަދު މަހުފޫޒު - ބޯލަރ
ކޯޗު : އަހުމަދު ނީޝަމް
ކޯޗު: އިމާދު އިސްމާއިލް
މެނޭޖަރު: އިބްރާހިމް ޝާޒް
