ދިވެހި ދައުލަތަށް ހިދުމަތް ކުރުމުގެ ގައުމީ އިނާމު ފުރަތަމަ ފަހަރަށް ބިދޭސީއަކަށް ދީފި އެވެ.
މި އިނާމަކީ ދިވެހި ދައުލަތަށް 35 އަހަރަށްވުރެ ދިގު މުއްދަތަކަށް ހިދުމަތް ކޮށްފައިވާ މުވައްޒަފުންގެ ތެރެއިން މަގާމުގެ މަސްއޫލިއްޔަތު އަދާކުރުމުގައި ގާބިލުކަމާއި އިހްލާސްތެރިކަމާއެކު ކޮށްފައިވާ ހިދުމަތްތަކަށާއި، އެ މުއައްސަސާއެއްގެ ކުރިއެރުމަށް ކޮށްދީފައިވާ ހިދުމަތްތަކުގެ އަގު ވަޒަން ކުރުމަށް 2021 ވަނަ އަހަރު ދޭން ފެށި އިނާމެކެވެ.
މިރޭގެ ޖަލްސާގައި މި އިނާމު އެރުވި 86 ބޭފުޅުންގެ ތެރޭގައި ސްރީލަންކާގެ ރައްޔިތެއް ކަމަށްވާ ތިލަކަރަތުނަ ހިމެނެ އެވެ.
ތިލަކަ މިހާރު ހުންނަވަނީ ސްރީލަންކާގައި ހުންނަ ދިވެހި ހައިކޮމިޝަނުގެ ސީނިއާ ޕްރޮޓޮކޯލް އޮފިސަރުގެ މަގާމުގަ އެވެ. އޭނާ ހައިކޮމިޝަންގައި ހިދުމަތް ކުރައްވާތާ މިހާރު 37 އަހަރަށް ވުރެ ގިނަ ދުވަސް ވަނީ ވެފަ އެވެ.
އެ ތަނުގައި އޭނާ އެންމެ ފުރަތަމަ އަދާ ކުރެއްވީ ވެލްފެއާ އެސިސްޓެންޓެއްގެ ވަޒީފާ އެވެ. އޭގެ ފަހުން ވެލްފެއާ އޮފިސަރުކަމާއި ޕްރޮޓޮކޯލް އެސިސްޓެންޓް ކަން ވެސް ވަނީ ކުރައްވައިފަ އެވެ.
އޭނާއަށް 2010 ވަނަ އަހަރު ފޮރިން މިނިސްޓްރީން ވަނީ "ލޯންގް ސާވިސް" އެވޯޑު ވެސް ދީފަ އެވެ.
ދިވެހި ރައްޔިތަކަށް ނުވި ނަމަވެސް، އޭނާއަކީ ދިވެހި ބަހުން ލިޔަން ކިޔަން ދަންނަ ބޭފުޅެކެވެ.
