ރާއްޖޭން ބޭރުގައި ދިރިއުޅޭ ދިވެހީންނާއި ބޭރު ގައުމުތަކަށް ދަތުރުކުރާ ދިވެހިންނަށް ރައްކާތެރިކަން ކަށަވަރުކޮށްދިނުމަށް ގޮވާލައި، ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް މަޖިލީހަށް ކުއްލި މައްސަލައެއް ހުށަހަޅުއްވައިފި އެވެ.
ޝިޔާމް ހުށަހެޅުއްވި ކުއްލި މައްސަލާގައި ވަނީ ގާނޫނު އަސާސީން ދިވެހީންނަށް ލިބިދީފައިވާ ހިޔާލު ފާޅުކުރުމުގެ މިނިވަންކަމުގެ ބޭނުންކޮށް، ރާއްޖޭގެ ސިޔާދަތު އޮންނަ ސަރަހައްދެއްގައި ފާޅުކުރާ ހިޔާލަކާ ގުޅިގެން، ބައެއް ގައުމުތަކުން އެ މީހުންނާ މެދު ޒާތީ ގޮތެއްގައި ފިޔަވަޅު އަޅަމުންދާ ކަމަށެވެ.
ބެލެވޭ ގޮތުގައި ޝިޔާމް އެ އިޝާރާތް ކުރައްވަނީ، އިންޑިއާއަށް ގޮސް އުޅެނިކޮށް ޕީޕީއެމްގެ ހުޅުމާލޭ ދާއިރާގެ ރައީސް އަބްދުއްސަމަދު އެ ގައުމުގެ އިމިގްރޭޝަންގެ ދަށަށް ގެންގޮސް ފަހުން އެ ގައުމުން އިއްޔެ ޑީޕޯޓްކޮށްލި މައްސަލައަށެވެ.
އަބްދުއްސަމަދަކީ އިދިކޮޅު ޕީޕީއެމް/ޕީއެންސީ ކޯލިޝަނުން ހިންގާ އިންޑިއާ އައުޓް ކެމްޕޭނުގައި ބައިވެރިވެ އަދި އިންޑިއާއާ ދެކޮޅަށް އަޑު އުފުލަން ބާއްވާ މުޒާހަރާތަކުގައި ވެސް އިސްކޮށް އުޅޭ މީހެކެވެ. ބައެއް މުޒާހަރާތަކުން އޭނާ ހައްޔަރުކޮށްފައިވެސްވެ އެވެ.
ޝިޔާމް ހުށަހެޅުއްވި މައްސަލާގައި ވަނީ، މިފަދަ ކަންކަމުގައި ދިވެހީންގެ ރައްކާތެރިކަން ކަށަވަރުކުރަން ފިޔަވަޅު ނޭޅި ގޮސްފިނަމަ، އޭގެ ރައްދުގައި ރާއްޖޭގައި އެ ގައުމެއްގެ ރައްޔިތުންނާ މެދު ނަފުރަތު އުފެދި އޭގެ ޖަޒުބާތުގައި ހިނގައިގެން ނުވާނެ ނުރަނގަޅު ކަމެއް ހިނގައިދިއުމުގެ އިހުތިމާލެއް އެބަ އޮތް ކަމަށެވެ.
މިއަދުގެ ޖަލްސާއަށް ދެ ކުއްލި މައްސަލައެއް ހުށަހެޅިފައިވެ އެވެ. އެއީ ޝިޔާމް ހުށަހެޅުއްވި މައްސަލައިގެ އިތުރަށް މަސްތުވާތަކެތި އެތެރެކުރާ ބައެއް މީހުން ރާއްޖޭން ވަގުތުން ބޭރަށް ޑީޕޯޓްކޮށްލުމުގެ އުސޫލާ ގުޅޭ ގޮތުން ހެންވޭރު ހުޅަނގު ދާއިރާގެ މެންބަރު ހަސަން ލަތީފް ހުށަހެޅުއްވި ކުއްލި މައްސަލަ އެވެ.
މިއަދުގެ ޖަލްސާގައި ކުރިއަށް ދާނީ އެއިން އެއް މައްސަލަ އެވެ. ކުރިއަށް ދާނެ މައްސަލައެއް ނިންމާނީ ގުރުލައިގެންނެވެ. ގުރުލައިގެން ހޮވޭ މައްސަލައެއް މިއަދު ކުރިއަށް ގެންދާއިރު، އަނެއް މައްސަލަ ކުރިއަށް ގެންދާނީ ދެން އޮތް ދުވަހަކުންނެވެ.
ޕީޕީއެމްއިން ގެންދަނީ "އިންޑިއާ އައުޓް"ގެ ނަމުގައި ސިޔާސީ ކެމްޕެއިނެއް ކުރަމުންނެވެ. އެ ކެމްޕެއިން ކުރަނީ އިންޑިއާގެ ނުފޫޒު ރާއްޖޭގެ މައްޗަށް ގަދަކުރަމުންދާ ކަމަށް ބުނެ, އެކަމާ ދެކޮޅަށް އަޑު އުފުލުމުގެ ގޮތުންނެވެ.
މީގެ ކުރިން ވެސް ޕީޕީއެމްއަށް ނިސްބަތްވާ ބައެއް މީހުން އިންޑިއާގައި ހުއްޓުވައި ސުވާލުކޮށްފައިވެ އެވެ.
ރައީސް އިބްރާހީމް މުހައްމަދު ސޯލިހުގެ ސަރުކާރުން ދަނީ އިންޑިއާގެ އަސްކަރިއްޔާގެ އެހީތެރިކަން ހޯދަމުންނެވެ. އޭގެ ބޭނުމަކީ ރާއްޖެއަށް ޓްރެފިކް ކުރާ މަސްތުވާތަކެތި ހުއްޓުވުމާއި، ޓެރަރިޒަމްގެ އަމަލެއް ހިނގައިފިނަމަ އެފަދަ ކަމެއް ހުއްޓުވާނެ އަސްކަރީ ގާބިލްކަން އިތުރުކުރުން ކަމަށް ދިވެހި ސަރުކާރުން ބުނެ އެވެ.
