ތިލަފުށިން ބިދޭސީންނަށް ބިން ގަނެވޭ ގޮތަށް ކުރި އިއުލާނާ ދެކޮޅަށް، މާލޭގައި އިދިކޮޅު ފަރާތްތަކުން ބޮޑު އިހުތިޖާޖެއް ކުރުމަށް ނިންމައި އެ ކަމުގެ ތައްޔާރީތައް ފަށައިފި އެވެ.
ތިލަފުށީގެ ބިމުގެ ދަތިކަން ހައްލު ކުރުމަށް 150 ހެކްޓަރުގެ ބިން ތިލަފުށިން ހިއްކަން ހަމަޖެހިފައިވެ އެވެ. އެ ބިން މިލްކު ކުރެވޭ ގޮތަށް 90 އިންސައްތަ ބިން ދިވެހިންނަށް ވިއްކަން ނިންމާފައިވެ އެވެ. ދިހަ އިންސައްތަ ބިންތަކަށް ބިދޭސީންނަށް ކުރިމަތިލެވޭއިރު، ބިދޭސީންނަށް އެ ތަން ދޫކުރާނީ 99 އަހަރުގެ މުއްދަތަކަށެވެ.
މި ގޮތަށް ބިދޭސީންނަށް ދޫކުރެވޭ ބިމާއި 'ގަވާއިދާ ހިލާފަށް' ބިދޭސީންނަށް ދޫކުރާ ބިންތައް އިދިކޮޅު ޕީޕީއެމްގެ ސަރުކާރެއްގައި އަތުލުމުގެ ވައުދާ އެކު، މި މަހުގެ 17 ވަނަ ދުވަހު މާލޭގައި ބޮޑު އިހުތިޖާޖެއް ކުރުމަށް ރާވާފައިވާ ކަމަށް ޕީޕީއެމްގެ ތަރުޖަމާނު ހީނާ ވަލީދު "އަދަދު" ނޫހަށް ވިދާޅުވި އެވެ.
"ހިނގައިލުމެއް ގޮތަށް މި އިހުތިޖާޖު ކުރިއަށް ދާނީ މާލޭގައި،" ހީނާ ވިދާޅުވި އެވެ.
ބިދޭސީންނަށް ބިން ގަނެވޭގޮތަށް މި އުސޫލު އޮތުމާއެކު ކަންބޮޑުވުން ފާޅުކުރުމަށް، އިދިކޮޅު ކޯލިޝަންގައި ހިމެނޭ ޕީއެންސީގެ ޕާލިމެންޓްރީ ގްރޫޕްގެ ލީޑަރު އަދި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފް މަޖިލީހަށް ކުއްލި މައްސަލައެއް ވެސް ހުށަހެޅި އެވެ. އެކަމަކު، ވެރިކަންކުރާ އެމްޑީޕީގެ ސުޕަ މެޖޯރިޓީ އޮތް މަޖިލީހުގައި އެ މައްސަލައަށް ބަހުސް ކުރުމަށް ފާހެއް ނުވެ އެވެ.
އެ މައްސަލައިގައި ބުނެފައިވަނީ މިއީ ކުދި އަދި މެދު ފަންތީގެ ވިޔަފާރިވެރިންނަށް ވިޔަފާރީގެ ފުރުސަތުތައް ހަނިވެ، ވިޔަފާރިތައް ބޭރު މީހުންގެ އަތްމައްޗަށް ދިއުމުގެ ފުރުސަތު އޮތް ކަމެއް ކަމަށެވެ.
ދިވެހި ދައުލަތުގެ ހަރަދުގައި ތަރައްގީ ކުރާ، "ދިވެހި ވިޔަފާރިވެރިންނަށް" މުހިންމު ތަނެއް ކަމަށާއި މިހާރު ވެސް މާލޭ ސަރަހައްދުގައި ބިމުގެ ދަތިކަން ހުރިއިރު ބިދޭސީންނަށް ތިލަފުށިން ބިން ވިއްކުމަކީ ނޭދެވޭ އަސަރު ކުރާނެ ކަމަށް ވެސް އެ މައްސަލާގައި ބުނެފައިވެ އެވެ.
އަލަށް ހިއްކަން ނިންމާފައިވާ، ތިލަފުށީ ދެވަނަ ފިޔަވަހި ހާއްސަ ކުރާނީ މައިގަނޑު ހަ ކަމަކަށް ކަމަށް ޕްލޭނުގައިވެ އެވެ.
އެއީ ޕަވާ ޕްލާންޓަކާއި، ތެޔޮ ރައްކާކުރާ ސްޓޯރޭޖުތަކާއި، އޮފީސް ހިންގުމަށް ދޫކުރާ ބިންތަކާއި، ތަނަވަސް ވިޔަފާރި ބަނދަރަކާއި، ރެކްރިއޭޝަން އަށް ހާއްސަ ބިންތަކުގެ އިތުރުން ސިނާއީ މަސައްކަތްތައް ކުރުމަށް ދޫކުރާ ބިންތަކެވެ.
ޒަމާނާ އެއްގޮތަށް ތިލަފުށި ތަރައްގީވެގެން ދާއިރު، އެތަނުގައި މީހުންނަށް ދިރިއުޅެވޭނެ ފަދަ މާހައުލެއް ގާއިމުކޮށް މާލެ ސަރަހައްދަށް ކުރިމަތިވެފައި އޮތް ބޯހިޔާވަކިކަމުގެ މައްސަލައަށް ވެސް ހައްލު ހޯދައިދިނުމަށް ޕްލޭނުގައި ލިޔެފައިވެ އެވެ.
