ރާއްޖެ އަންނަ ފަތުރުވެރިންނާ މެދު ރަނގަޅަށް އަމަލުކުރުމަކީ ރާއްޖޭގެ އިގުތިސޯދަށްޓަކައި ކުރަން ޖެހޭ ކަމެއް ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެ އެވެ.
މޯލްޑިވްސް ޓޫރިޒަމް ޑިވެލޮޕްމެންޓް ކޯޕަރޭޝަން (އެމްޓީޑީސީ) ގެ 15 ވަނަ އަހަރީ ދުވަސް ފާހަގަކުރުމަށް ކުރުނބާ މޯލްޑިވްސްގައި ރޭ ބޭއްވި ޖަލްސާގައި ވާހަކަ ދައްކަވަމުން މިނިސްޓަރު ޝާހިދު ވިދާޅުވީ ފަތުރުވެރިކަމަކީ ރާއްޖޭގެ އިގްތިސާދުގެ އެންމެ ވަރުގަދަ އެއް ސިނާއަތް ކަމަށާއި ގައުމުތަކާއި ދެމެދު އޮންނަ ގުޅުމާއި ގައުމުތަކުން ރާއްޖެ އަންނަ މީހުންނާ މެދު އަހުލާގީ މިންގަނޑު ވަކި ގޮތަކަށް ބަހައްޓަންޖެހޭ ކަމަށެވެ.
"އަޅުގަނޑުމެންގެ ރާއްޖެ ފަތުރުވެރިކަމަށް އިގުތިސޯދު ބިނާވެގެން ތިބެ، އަޅުގަނޑުމެންނަކަށް ދުނިޔޭގެ ގައުމުތަކާ ދިމާއަށް ހިތުހުރި އެއްޗެއް ކިޔައި، ހިތުހުރި ގޮތަކަށް ހަދައިގެން ކަމަކު ނުދާނެ," މިނިސްޓަރު ޝާހިދު ވިދާޅުވި އެވެ.
މިނިސްޓަރު ޝާހިދު ވިދާޅުވީ ރާއްޖެ ވާންޖެހޭނީ ބޭރުގެ ފަތުރުވެރިންނަށް އަބަދުވެސް މަރުހަބާ ކިޔައި، އެމީހުންނާ ދޭތެރޭގައި އޯގާތެރިކަމާ އެކު ހިތްތައް ހުޅުވާލައިގެން ތިބި ބަޔަކަށް ކަމަށެވެ.
ރާއްޖެއަކީ ވަކި ބަޔަކާ ދިމާކޮށްލައިގެން، ވަކި ނަސްލަކާ ދިމާކޮށްލައިގެން، ވަކި ގޮތަކަށް އުޅޭ ބައެއް ކަމަށް ހަދަން ފަށައިފިނަމަ ފަތުރުވެރިކަމަށް މިދިޔަ 50 އަހަރު ލިބުނު ރީތި ނަން ހަރާބުވެގެން ހިނގައިދާނެ ކަމަށް މިނިސްޓަރު ވިދާޅުވި އެވެ.
އެމްޓީޑީސީގެ 47 ޕަސެންޓް ހިއްސާ ސަރުކާރަށް އޮތްއިރު، 53 ޕަސެންޓް އޮތީ އާންމުންނަށެވެ.
