ރާއްޖޭގައި ތިމާވެށީގެ ރަށްވެހިކަން ކުރިއެރުވުމާއި ތިމާވެއްޓާއި މޫސުމަށް އަންނަ ބަދަލުތަކުން ރައްކާތެރިވުމަށް އަމަލުކުރާނެ ގޮތްތައް ހިނެމޭ ގޮތަށް ރައްޔިތުންގެ ގައުމީ މެނިފެސްޓޯއެއް އެކުލަވާލަން ނިންމައިފި އެވެ.
މި މެނިފެސްޓޯގެ މައިގަނޑު އަމާޒަކީ ރާއްޖޭގައި ރައްޔިތުންގެ ކްލައިމެޓް އެސެމްބްލީތަކެއް މެދުވެރިކޮށް ތަފާތު ގިންތީގެ މީހުން އެއްތަނަކަށް އެއްވެ ތިމާވެއްޓާއި މޫސުމަށް އަންނަ ބަދަލުތަކާ ބެހޭ ގޮތުން މަޝްވަރާކޮށް އަމިއްލަ ނިންމުންތަކެއް ނިންމުން ކަމަށް މިކަމުގައި އިސްކޮށް އުޅުނު އިކޯކެއާ މޯލްޑިވްސް އިން ބުނެ އެވެ.
އިކޯކެއާ މޯލްޑިވްސް ބުނި ގޮތުގައި މޫސުމަށް އަންނަ ބަދަލުތަކުން ތިމާވެއްޓަށާއި މުޖުތަމައުއަށް ކުރާނެ އަސަރާއި ގެއްލުމަށް ހޯދިދާނެ ހައްލުތައް ދެނެގަނެ، އެ ނިންމާ ނިންމުންތަކުގެ އަލީގައި މަދަނީ ޖަމްއިއްޔާތަކާއި، އާންމު ފަރުދުންނާއި ކަމުގެ މާހިރުންގެ އެހީއާ އެކު ތިމާވެއްޓާއި، މޫސުމަށް އަމަލުކުރުމަށް ރައްޔިތުންގެ ގައުމީ މެނިފެސްޓޯއެއް އެކުލަވާލާނެ އެވެ.
އީކޯކެއާ އިން އިންތިޒާމުކުރަން ހަމަޖެހިފައިވާ ތިމާވެއްޓާއި މޫސުމުގެ ސިޓިޒަންސް އެސެމްބްލީ ކުރިއަށް ގެންދިއުމަށް ހަމަޖެހިފައިވަނީ ތިން ދުވަހުގެ މުއްދަތަކަށެވެ. މި އެއްވުމުގެ ބައިވެރިން ގްރޫޕުތަކަށް ބެހި ތަޖުރިބާތައް ހިއްސާކޮށް ހިޔާލާއި ފިކުރުތައް ފާޅުކޮށް އެކަކު އަނެކަކުގެ ފަރާތުން އުނގެނުމަށްފަހު ރައްޔިތުންގެ ނިންމުންތަކުގެ ކަރުދާހެއް އެކުލަވާލާނެ އެވެ.
މި އެސެމްބްލީ އިންތިޒާމުކުރަނީ ތިން ދުވަހުގެ ކޮންވެންޝަނެއްގެ ގޮތުގައި އެކްސްޕަޓް ޕެނަލާއި ޕްލެނަރީ ސެޝަންތަކާއި އަދި ބްރޭކް އައުޓް ގްރޫޕް ވެސް އެކުލެވޭ އިވެންޓެއްގެ ގޮތުގަ އެވެ.
