ބިދޭސީންނަށް ތިލަފުށިން ބިން ގަނެވޭ ގޮތަށް ހައުސިން ޑިވެލޮޕްމެންޓް ކޯޕަރޭޝަނުން ހެދި އުސޫލާ ގުޅޭ ގޮތުން ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ ބޭރުކޮށްލައިފި އެވެ.
ތިލަފުށީ ޒޯން އޭގައި ހުރި ބިންތައް ވިއްކަން އެޗްޑީސީން ހެދި އުސޫލުގައި ދިވެއްސެއް ނުވަތަ ދިވެހި ކުންފުންޏަކުން ބީލަން ކާމިޔާބުކޮށްފި ނަމަ ބިން މިލްކު ކުރެވޭނެ އެވެ. ނަމަވެސް ބޭރު މީހެއް ނުވަތަ ބޭރު ކުންފުންޏަކުން ބީލަން ކާމިޔާބުކޮށްފި ނަމަ ބިން ކުއްޔަށް ދޫކުރާނީ 99 އަހަރަށެވެ.
ބިދޭސީންނަށް ތިލަފުށިން ބިން ވިއްކާތީވެ މަޖިލީހުގައި ކަންބޮޑުވުން ފާޅުކުރުމަށް ރައްޔިތުންގެ މަޖިލީހަށް ކުއްލި މައްސަލަ ހުށަހެޅުއްވީ ކުރީގެ ޑިފެންސް މިނިސްޓަރު އަދި މިހާރު މަޑުއްވަރީ ދާއިރާގެ މެންބަރު އާދަމް ޝަރީފު އެވެ.
އެ ކުއްލި މައްސަލައިގައި ބުނެފައި ވަނީ ތިލަފުއްޓަކީ ދިވެހި ބައިތުލްމާލުން ހަރަދުކޮށްގެން ތަރައްގީ ކުރަމުން އަންނަ "ދިވެހި ވިޔަފާރިވެރިންނަށް" މުހިންމު ތަނެއް ކަމަށާއި މިހާރު ވެސް މާލޭ ސަރަހައްދުގައި ބިމުގެ ދަތިކަން ހުރިއިރު ބިދޭސީންނަށް ތިލަފުށިން ބިން ވިއްކުމަކީ ނޭދެވޭ އަސަރު ކުރާނެ ކަމެއް ކަމަށެވެ.
"ބިމުގެ ދަތިކަން ދިވެހި ވިޔަފާރިވެރިންނަށް މިހާރު ވެސް ކުރިމަތިވެފައިވާއިރު، ބީލަމުގެ އުސޫލުން 99 އަހަރަށް ނުއަގުގައި ވިއްކުމަކީ އެކަމުގެ ނޭދެވޭ އަސަރު ދިވެހި ވިޔަފާރިންނަށާއި ރާއްޖެގެ އިގްތިސޯދަށް ވަރަށް ބޮޑަށް ކުރާނެ ކަމަކަށް ވާތީ،" ކުއްލި މައްސަލައިގައިވެ އެވެ.
މިއީ ކުދި އަދި މެދު ފަންތީގެ ވިޔަފާރިވެރިންނަށް ވިޔަފާރީގެ ފުރުސަތުތައް ހަނިވެ، ވިޔަފާރިތައް ބޭރު މީހުންގެ އަތްމައްޗަށް ދިއުމުގެ ފުރުސަތު އޮތް ކަމަކަށް ވާތީ މި އުސޫލު ބަދަލު ކުރަން ވަނީ ގޮވާލައިފަ އެވެ.
ސަރުކާރު ހިންގާ މައި ޕާޓީ، އެމްޑީޕީގެ ސުޕަ މެޖޯރިޓީ އޮތް މަޖިލީހުގައި، އާދަމް ޝަރީފުގެ ކުއްލި މައްސަލަ ބަލައިގަތުމާމެދު ނެގި ވޯޓުގައި ފެންނަ ކަމަށް ވޯޓު ދެއްވީނުވަ މެންބަރުންނެވެ. ވޯޓުގައި ބައިވެރިވި ބާކީ 36 މެންބަރުން ވޯޓު ދެއްވީ ކުއްލި މައްސަލަ ބަލައިގަންނަން ފެނިވަޑައިނުގަންނަވާ ކަމަށެވެ.
ތިލަފުށިން ބޭރު މީހުންނަށް ބިން ވިއްކާ މައްސަލައިގައި މޯލްޑިވްސް ނެޝަނަލް ޕާޓީ (އެމްއެންޕީ)އިން ވެސް ވަނީ ކަންބޮޑުވުން ފާޅުކޮށްފަ އެވެ.
ތިލަފުށިން ބިން ގަތުމަށް ބީލަން ހުށަހެޅޭނެ އެންމެ ދަށް އަގަކީ އަކަފޫޓަކަށް 1700 ރުފިޔާ ކަމަށެވެ.
