މާލޭގެ މަގުމަތިން ދިޔަ މީހަކަށް ވަޅިއަކުން ހަމަލާ ދިން ކަމުގެ ކުށުގައި ދެ މީހަކު 10 އަހަރުގެ މުއްދަތަކަށް ޖަލަށް ލުމަށް ކްރިމިނަލް ކޯޓުން ހުކުމްކޮށްފި އެވެ.
ކްރިމިނަލް ކޯޓުން ހުކުމް އިއްވި ދެ މީހުންނަކީ ގދ. ފަރެސްމާތޮޑާ، މަންޒިލް، މުހައްމަދު ނިޝާހް އަދި ކ. މާލެ، ހ. ރޯޒަންޑޭލް ޝައިބާން ޒުފުރަތު އިސްމާއީލެވެ.
އެ ދެ މީހުންގެ މައްޗަށް ދައުލަތުން ދެ ދައުވާއެއް އުފުލި އެވެ. އެއީ ތޫނު އެއްޗެއް ބޭނުންކޮށްގެން މާރާމާރީ ހިންގުމުގެ ދައުވާ އަދި މަގުބޫލު ސަބަބެއް ނެތި ތޫނު އެއްޗެއް އާންމު ތަނެއްގައި ގެންގުޅުމުގެ ދައުވާ އެވެ.
ދައުލަތުން ކޯޓަށް ހުށަހެޅި ލިޔެކިއުންތަކުގައިވާ ގޮތުން، އެ ހާދިސާއެއް ހިނގީ އޮކްޓޯބަރު 8، 2018 ގެ ރޭގަނޑު 10:45 ހާއިރު މާލެ މަޖީދީ މަގު އޮލިމްޕަސް ކައިރިންނެވެ.
ދެ މީހުން ވެސް އެ ދެ ދައުވާއަށް އިންކާރު ކުރި ނަމަވެސް، ދައުލަތުގެ ފަރާތުން ޝަރީއަތަށް ހެކިބަސް ދިން މީހުންގެ ހެކިބަހުންނާއި، ފުލުހުން ތައްޔާރުކުރި ވީޑިއޯ ފޮޓޯ އެނަލިސިސް ރިޕޯޓުން ކުށް ސާބިތުވާ ކަމަށް މައްސަލަ ބެއްލެވި ގާޒީ އަލީ އާދަމް ކަނޑައަޅުއްވާފައިވެ އެވެ.
މާރާމާރީ ހިންގުމުގެ ދައުވާ ސާބިތުވުމުން، އެ ދައުވާއަށް އިއްވީ 10 އަހަރުގެ ޖަލު ހުކުމެކެވެ. އަދި، ތޫނު އެއްޗެއް ގެންގުޅުމުގެ ދައުވާއަށް އިއްވީ ހަ މަސް ދުވަހުގެ ޖަލު ހުކުމެކެވެ.
މި މައްސަލައާ ގުޅިގެން ދެ މީހުން ވެސް ހަތަރު އަހަރާއި ތިން މަހާއި 19 ދުވަސް ޖަލުގައި ހޭދަކޮށްފައިވާތީ، ޖަލު ހުކުމުން ތަންފީޒުކުރަން ޖެހޭނީ އެ މުއްދަތު އުނިކުރުމަށް ފަހު ދެން އޮންނަ މުއްދަތަށެވެ.
