ގައުމީ ވޮލީ މުބާރާތުގެ އަންހެން ޑިވިޝަން މިއަދު ފަށާއިރު، މުބާރާތުގައި ވާދަކުރާ ޓީމުތަކުން ވަނީ ރަނގަޅު ލޯކަލް ކުޅުންތެރިންނާއި ޓީމަށް ބޭނުންވާނެ ފެންވަރު ރަނގަޅު ބިދޭސީ ކުޅުންތެރިން ހިމަނައިގެން ޓީމު ވަރުގަދަކޮށްފަ އެވެ.
ވޮލީބޯޅަ ސީޒަން އާންމު އުސޫލުން ކުރިއަށްދާ ގޮތަށް ބަލާއިރު، ގައުމީ މުބާރާތް ބާއްވަނީ ގައުމީ ލީގަށް ފަހު، ލީގުގެ ގަދަ ހަތަރު ޓީމު، ގައުމީ މުބާރާތަށް ކޮލިފައިވާ ގޮތަށެވެ. އެކަމަކު، މި ފަހަރު ގައުމީ ލީގު ނުބާއްވައި، ގައުމީ މުބާރާތް ފަށާއިރު، މިއީ މިދިޔަ އަހަރުގެ ޖޫން މަހަށް ފަހު، ބާއްވާ ފުރަތަމަ އަންހެން ލޯކަލް އަންހެން މުބާރާތެވެ.
މިއަދު ފަށާ އަންހެން ގައުމީ މުބާރާތަކީ އެންމެ ފުރަތަމަ މިދިޔަ އަހަރު ފަހުކޮޅު ބާއްވަން ނިންމި މުބާރާތެއް ނަމަވެސް އެކި ސަބަބުތަކާ ހުރެ ލަސްވީ އެވެ. މި ފަހަރުގެ ގައުމީ މުބާރާތުގައި ވާދަކުރާ ހަތަރު ޓީމަކީ، އެސޯސިއޭޝަން ކަޕްގެ ޗެމްޕިއަން، ކްލަބް ވެމްކޯ އާއި އެ މުބާރާތުގެ ރަނަރަޕް، ޕޮލިސް ކްލަބްގެ އިތުރުން އެސޯސިއޭޝަން ކަޕްގެ ތިން ވަނަ ހޯދި، ކްލަބް އީގަލްސް އާއި ކްލަބް ވޮލީބޯލް އެވެ.
ކުޅުންތެރިންނަށް ބަލާއިރު، ގައުމީ ޓީމުގެ ޝަހާ ޝާމީން ވަނީ ޕޮލިސް ދޫކޮށް، ވެމްކޯ އަށް ބަދަލުވެފަ އެވެ. ވެމްކޯގެ ކޯޗަކީ، އިބްރާހިމް ނިޒާރު (ބޮޑޭ) އެވެ. ކްލަބް އީގަލްސް އިން ވެސް ކުރިއަށް ވުރެ ވަރުގަދަކޮށްފައިވާއިރު، މަރިޔަމް އަޒީފާ (އައްޒަ) އާއި ޝައުފާ އާދަމް ވެސް ވަނީ އެ ޓީމާ ގުޅިފަ އެވެ.
ބިދޭސީ ކުޅުންތެރިންނަށް ބަލާއިރު، ޓީމުތަކުން ވަނީ ރަނގަޅު ކުޅުންތެރިން ހޯދައިފަ އެވެ. އެކަމަކު، ބޭރު ގައުމުތަކުގެ މުބާރާތްތައް ކުރިއަށްދާ ދުވަސްވަރެއް ކަމަށްވާތީ، ބައެއް ޓީމުތަކުން ގެންނަން އެންމެ ބޭނުންވި ކުޅުންތެރިން ނުލިބުނެވެ.
މި ފަހަރުގެ އަންހެން ގައުމީ މުބާރާތް ފަށާނީ، މިއަދު ހަވީރު، 16:15 ގައި ކްލަބް ވޮލީބޯލް އާއި ކްލަބް އީގަލްސް ކުޅޭ މެޗުންނެވެ. މުބާރާތުގައި މިރޭ، 20:15 ގައި ކުޅޭ މެޗުގައި ބައްދަލުކުރާނީ ކްލަބް ވެމްކޯ އާއި ޕޮލިސް ކްލަބް އެވެ.
މުބާރާތުގެ ފޯމެޓް ރޭވިފައި އޮތީ ހަތަރު ޓީމުގެ މެދުގައި ލީގު ބުރެއް ކުޅުމަށް ފަހު، އެއް ވަނަ ޓީމަށް ފައިނަލުގެ ސީދާ ޖާގައެއް ލިބޭއިރު، ދެ ވަނަ އާއި ތިން ވަނަ ޓީމުގެ މެދުގައި ސެމީ ފައިނަލެއް ކުޅުމަށް ފަހު ފައނަލްގެ ފަހު ޖާގަ ލިބޭ ޓީމެއް ކަނޑައަޅާ ގޮތަށެވެ.
މިއީ 2019 ވަނަ އަހަރުގެ ފަހުން، ގައުމީ ވޮލީބޯޅައިގެ އަންހެން މުބާރާތެއް ކުޅޭ ފުރަތަމަ ފަހަރެވެ. އެ ފަހަރު ގައުމީ ތަށި އުފުލާލީ ވެމްކޯ އަތުން ސީދާ ތިން ސެޓުން މޮޅުވެގެން ޕޮލިހެވެ. އޭރު ޕޮލިހަށް ކުޅުނު ކުޅުންތެރިން މި ވަގުތު އީގަލްސް އާއި ވެމްކޯ ޓީމުގައި ހިމެނެ އެވެ.
