ކުޑަކުއްޖަކު ރޭޕްކޮށް އެކުއްޖާގެ ބަރަހަނާ ފޮޓޯ ނަގައި އޮރިޔާންކާޑު އުފެއްދި މީހާގެ މައްޗަށް މިދިޔަ ބުދަ ދުވަހު އިއްވި 40 އަހަަރުގެ ޖަލު ހުކުމާއި ގުޅިގެން ކޮމިޝަނަރ އޮފް ޕޮލިސް މުހައްމަދު ހަމީދު މި މައްސަލަ ތަަހުގީގުކުރި ފުލުހުންގެ ޓީމަށް ތައުރީފް ކުރައްވައިފި އެވެ.
މި މައްސަލާގައި ހުކުމްކޮށްފައި ވަނީ ލ. ކަލައިދޫ، މާކަރީލައިޓް، މުހައްމަދު ޝަޒްލީފް ނަމަކަށް ކިޔާ މީހެއްގެ މައްޗަށެވެ.
ހަމީދު ކުރެއްވި ޓްވީޓެއްގައި ވިދާޅުވެފައި ވަނީ، މި މައްސަލަ ބެލުމުގައި އިސްކޮށް ހަރަކާތްތެރިވި ލ. ގަމު ޕޮލިސް ސްޓޭޝަނުގެ ސީނިއަރ ސާޖެންޓު ހުސެއިން އާދިލްގެ މި ތަހުގީގުގައި ކުރި މަސައްކަތް ފާހަގަކުރައްވާފަ އެވެ.
އަދި, އެ ކުއްޖާއަށް ލިބުނު އަނިޔާގެ ހައްގު އަދަބު ދެވުމުން ދޭހަވަނީ އަންހެނުންނާއި ކުޑަކުދިންނަށް ކުރާ މިފަދަ އަނިޔާތަކާ ދެކޮޅަށް ފުލުހުން މަސައްކަތް ކުރާ މިންވަރުކަން ވެސް ސީޕީ ފާހަގަ ކުރެއްވި އެވެ.
ލ. ކަލައިދޫ ދަނޑުބިން ސަރަހައްދު ވަލުތެރެއަށް 2018 ވަނަ އަހަރުގެ ޖެނުއަރީ ހަވަނަ ދުވަހުގެ މެންދަމުގެ ވަގުތެއްގައި އެ ކުއްޖާ ގެންގޮސް، ގަދަކަމުން ޖިންސީ ގުޅުން ހިންގައި، ބަރަހަނާ ފޮޓޯ އާއި ވީޑިއޯ ނެގިކަން ޝަޒްލީފްގެ މައްޗަށް ސާބިތުވި އެވެ.
މި މައްސަލާގައި އޭނާގެ މައްޗަށް ހުކުމްކުރީ ރޭޕްކުރުމުގެ ކުށަށް 20 އަހަރަށް ޖަލަށް ލުމަށް އަދި ކުޑަކުއްޖަކު މެދުވެރިކޮށް އޮރިޔާންކާޑު އުފެއްދުމުގެ ކުށް ސާބިތުވެފައިވާތީ، އިތުރު 20 އަހަރަށް ޖަލަށް ލުމަށެވެ.
