ރިޔާދު، ސައުދީ އަރަބިއްޔާ (ޖެނުއަރީ 19) - އޭސީ މިލާންގެ މައްޗަށް 3-0 އިން ކުރިހޯދައި އިންޓަ މިލާނުން އިޓާލިއަން ސުޕަ ކަޕްގެ ޗެމްޕިއަންކަން ހޯދައިފި އެވެ.
އިންޓަ އިން މި ވަނީ ޖެހިޖެހިގެން ދެ އަހަރު ސުޕަ ކަޕްގެ ތަށި އުފުލާލައިފަ އެވެ. މިދިޔަ އަހަރުގެ ސުޕަ ކަޕް ފައިނަލުގައި އިތުރު ވަގުތުގެ ދެ ހާފް ކުޅެގެން އިންޓަ އިން ވަނީ ޔުވެންޓަސް ބަލިކޮށްފަ އެވެ. މި ފަހަރު މިލާން އަތުން އިންޓަ ވަނީ ފުރިހަމަ ވަގުތުގައި މޮޅުވެ، ހަތް ވަނަ ފަހަރަށް އިޓާލިއަން ސުޕަ ކަޕް ކާމިޔާބުކޮށްފަ އެވެ.
މިއީ، އިންޓަގެ ތާރީހުގައި އެ ޓީމުން ސުޕަ ކަޕްގެ ތަށި ދިފާއުކުރި ދެ ވަނަ ފަހަރެވެ.
ރިޔާދުގެ ކިންގް ފަހުދު އިންޓަނޭޝަނަލް ސްޓޭޑިއަމްގައި މިރޭ ކުޅުނު މެޗުގެ ފުރަތަމަ 21 މިނިޓް ތެރޭ އިންޓަ އިން ވަނީ މިލާން ކޮޅަށް ދެ ގޯލު ޖަހައިފަ އެވެ. އެ ގޮތުން މެޗުގެ 10 ވަނަ މިނިޓްގައި މިލާންގެ އޭރިއާތެރެއިން އިންޓަގެ ނިކޯލޯ ބަރޭލާ ދިން ބޯޅަ އަށް އަރައި، ފެޑެރީކޯ ޑިމާކޯ ވަނީ ގޯލަށް ބޯޅަ ފޮނުވާލައިފަ އެވެ.
އިންޓަގެ ޖެކޯ (މ) މިލާންގެ އޭރިއާތެރެއިން ގޯލުގެ ދުރު ކަނަށް ބޯޅަ ފޮނުވާލަނީ.
އިންޓަ އަށް ލީޑުފުޅާކޮށްދިނީ މެޗުގެ 21 ވަނަ މިނިޓްގައި އެޑިން ޖެކޯ ޖެހި ގޯލުންނެވެ. އޭރިއާ އަރިމަތިން ޖެކޯ އަށް ލިބުނު ބޯޅަ ހިފައިގެން އޭރިއާތެރެއަށް ވަދެ، މިލާންގެ ސަންޑްރޯ ޓޮނާލީ ކައިރިން ނައްޓާލުމަށް ފަހު ވަނީ ގޯލުގެ ދުރު ކަނަށް އަމާޒުކޮށްލައިފަ އެވެ.
ދެ ވަނަ ހާފުގެ ކުޅުން ފަށައިގެން ތިން މިނިޓް ތެރޭ މިލާންގެ ރަފައެލް ލެއާއޯ އަށް ލިބުނު ފުރުސަތަކުން ޖެހި ބޯޅަ ދިޔައީ ހުރަސްދަނޑިމަތިންނެވެ.
މިލާނުން ގޯލެއް ޖެހޭތޯ ގިނަ މަސައްކަތްތަކެއް ކުރި ނަމަވެސް ދެ ވަނަ ހާފުގައި ވެސް ލަނޑެއް ޖެހީ އިންޓަ އިންނެވެ، މި ގޯލު މެޗުގެ 77 ވަނަ މިނިޓްގައި ކާމިޔާބުކުރީ ލަޓާރޯ މާޓީނޭޒް އެވެ. އިންޓަގެ ޑިފެންޑަރު، މިލާން ސްކްރީނާ މަތިން ފޮނުވާލި ބޯޅައެއް ފެނުގައި ޖެހިފައި މިލާން ޑިފެންސް ފަހަތަށް ދިޔަ ވަގުތު އޭރިއާތެރެއިން އެ ބޯޅަ ހޯދައި، ލަޓާރޯ ވަނީ ގޯލުގެ ދުރު ކަނަށް ފޮނުވާލައިފަ އެވެ.
