މިދިޔަ ޑިސެމްބަރު މަހު ލަންޑަންގެ ހީތުރޯ އެއާޕޯޓުން ޔުރޭނިއަމްގެ އަސަރު ފެނުމުން ޓެރަރިޒަމްގެ ތުހުމަތުގައި އުމުރުން 60 އަހަރުން މަތީގެ ފިރިހެނަކު ހައްޔަރުކޮށްފި އެވެ.
އެ މައްސަލައާ ގުޅުން ހުރި ކަމަށް ބެލެވޭ ގެޔެއް ކައުންޓާ ޓެރަރިޒަމް ފުލުހުން މިދިޔަ ހުކުރު ދުވަހު ބަލައި ފާސްކުރި އެވެ. އެއީ ޗެޝަޔާ ސަރަހައްދުގައި ހުންނަ ގެޔެކެވެ.
ތުހުމަތު ކުރެވޭ މީހާ ހައްޔަރު ކުރީ އިނގިރޭސި ޓެރަރިޒަމް މަަނާކުރުމުގެ ގާނޫނުގެ ނުވަ ވަނަ ސެކްޝަންގެ ދަށުންނެވެ. އެއީ ރޭޑިއޯއެކްޓިވް ޑިވައިސް އަދި ތަކެތި އުފެއްދުމާއި ގެންގުޅުމާ ގުޅުން ހުރި ސެކްޝަނެވެ.
ރިޕޯޓުތައް ބުނާ ގޮތުން ހައްޔަރު ކުރުމަށް ފަހު ކަފާލާތުގެ ދަށުން އަންނަ އެޕްރީލް މަހާ ހަމައަށް ތުހުމަތު ކުރެވޭ މީހާ ވަނީ ދޫކޮށްލައިފަ އެވެ.
ފުލުހުން ބުނީ މިހާތަނަށް ލިބިފައި ހުރި މައުލޫމާތަށް ބަލާ އިރު، މިއީ އާއްމުންނަށް ސީދާ ނުރައްކަލެއް ވެދާނެ ފަދަ ކަމެއްގެ ގޮތުގައި ފާހަގަނުވާ ކަމަށެވެ. އެކަން ޔަގީންކުރުމުގެ ތަހުގީގު ދަނީ ކުރިއަށެވެ.
އިނގިރޭސި ބޯޑާ ފައުޖުގެ އޮފިސަރުންނަށް ރޭޑިއޯއެކްޓިވް ތަކެތި ފެނުނީ ޑިސެމްބަރު 29 ވަނަ ދުވަހު ދަގަނޑުގެ ޝިޕްމަންޓެއް ސްކްރީން ކުރަމުން ދަނިކޮށެވެ.
ޔުރޭނިއަމްއަކީ ގުދުރަތީ ގޮތުން އުފެދޭ މާއްދާއެކެވެ. ޔުރޭނިއަމް މުއްސަނދި ކުރުމުން ނިޔުކްލިއާއާ ގުޅުން ހުރި ކަންކަމަށް ބޭނުންކުރެވޭނެ އެވެ.
ޔުރޭނިއަމް މުއްސަނދި ކުރަނީ ސެންޓްރިފިއުޖް މެޝިނުގެ އެހީގަ އެވެ. އެއީ އާދަޔާ ހިލާފު ބާރުމިނެއްގައި އެނބުރުމުގެ ގާބިލްކަން ލިބިފައިވާ މެޝިނެކެވެ.
ތަންކޮޅެއް ކުޑަކޮށް މުއްސަނދިކޮށްފައި ހުންނަ ޔުރޭނިއަމް ބޭނުންކުރަނީ ނިޔުކްލިއާއިން ހަކަތަ އުފައްދާ ޕްލާންޓްތަކުގައި ތެލުގެ ބަދަލުގަ އެވެ.
ވިހި ޕަސެންޓަށް ވުރެ މައްޗަށް މުއްސަނދިކޮށްފައި ހުންނަ ޔުރޭނިއަމް ބޭނުންކުރަނީ ދިރާސާކުރަން ހާއްސަ ރިއެކްޓަރުތަކުގަ އެވެ. ހަތިޔާރުގެ ގޮތުގައި ބޭނުން ކުރާ ޔުރޭނިއަމް ހުންނަނީ 90 ޕަސެންޓަށް ވުރެ މައްޗަށް މުއްސަނދިކޮށްފަ އެވެ.
