އިނގިރޭސިވިލާތުގެ ޝާހީ އާއިލާއާ ގުޅޭ ހުރިހާ ކަމެއް ބޭޒާރުކޮށްފި ނަމަ، އާއިލާއިން ދުވަހަކު ވެސް މައާފު ނުކުރާނެ ކަމަށް އަމީރު ހެރީ ވިދާޅުވެއްޖެ އެވެ.
ޑެއިލީ ޓެލެގްރާފަށް ދެއްވި އިންޓަވިއުގައި ހެރީ ވިދާޅުވީ ދެ ފޮތް ލިޔެވޭހާ ވާހަކަ އެބަހުރި ކަމަށާއި ބައެއް ކަންކަން ފޮތުގައި ނުހިމަނަން ނިންމީ ބައްޕާފުޅާއި ބޭބޭފުޅު ދުވަހަކު ވެސް މައާފު ނުކުރާނެތީ ކަމަށެވެ.
ހެރީގެ ހަޔާތުގެ މައްޗަށް ލިޔުއްވި އޮޓޯބަޔޮގްރަފީ "ސްޕެއާ" ވިއްކަން ފެށީ މިދިޔަ ހަފުތާގަ އެވެ. އެ ފޮތުގައި ވަނީ ހެރީގެ ޒާތީ ކަންކަމާއި ޝާހީ އާއިލާގެ މެމްބަރުންނާ އޮތް ގުޅުން ކިޔައިދީފަ އެވެ.
ހެރީ ވިދާޅުވީ "ދުނިޔެއަށް އެނގެން ބޭނުން ނުވާ ގިނަ ކަންތައްތަކެއް އެބަ ހުރި" ކަމަށާއި ޝާހީ އާއިލާއިން އަނބިކަނބަލުން މޭގަންގެ ކިބައިން މައާފަށް އެދެން ޖެހޭ ކަމަށެވެ.
"ސްޕެއާ" އާ ގުޅޭ ގޮތުން ވަކި އެއްޗެއް ބުނަން ބޭނުން ނުވާ ކަމަށް އިނގިރޭސި ޝާހީ އާއިލާއިން ވަނީ ބުނެފަ އެވެ.
އަންގާރަ ދުވަހު އިނގިރޭސިވިލާތުގައި ނެރުނު "ސްޕެއާ"އަކީ މިހާތަނަށް އެ ގައުމުގެ ތާރީހުގައި އެންމެ އަވަހަށް ވިކި ހުސްވަމުންދާ "ނަން ފިކްޝަން" ފޮތެވެ.
ފޮތް ވިއްކަން ފެށުމުގެ ކުރިން ގިނަ ތަފުސީލްތަކެއް މީޑިއާއިން އާއްމުކުރި ނަމަވެސް، މިހާތަނަށް އޭގެ 400،000 އަށް ވުރެ ގިނަ ކޮޕީ ވަނީ ވިކިފަ އެވެ.
