ބްރެޒިލްގެ ވެރިރަށް ބްރެސިލިއާގައި ސަރުކާރުގެ އިމާރާތްތަކުގެ ތެރެއަށް ބަޔަކު ވަދެ ހިންގި ހަމަނުޖެހުމުގައި ކުރީގެ ރައީސް ޖެއާ ބޮލްސޮނާރޯގެ ބައިވެރިވުމެއް އޮތްތޯ ތަހުގީގު ކުރަން ސުޕްރީމް ކޯޓުން ފުރުސަތު ދީފި އެވެ.
ޖެނުއަރީ އަށް ވަނަ ދުވަހު ހިންގި ހަމަނުޖެހުމަށް ޒިންމާވާން ޖެހޭ ކަމަށް ބެލެވޭ މީހުންގެ ލިސްޓުގައި ބޮލްސޮނާރޯގެ ނަން މިހާރު ވަނީ ހިމެނިފަ އެވެ. އެ ދުވަހު ހަމަނުޖެހުން ހިންގީ ބޮލްސޮނާރޯގެ ސަޕޯޓަރުންނެވެ.
ބޮލްސޮނާރޯ ވަނީ މިދިޔަ އޮކްޓޯބަރު މަހު އޮތް ރިޔާސީ އިންތިހާބުގެ ސައްހަކަމާ މެދު ސުވާލު އުފައްދައި ވީޑިއޯއެއް އާއްމު ކުރައްވައިފަ އެވެ. ޕްރޮސެކިއުޓަރުން ބުނީ ބޮލްސޮނާރޯގެ އެ ތުހުމަތާ ހެދި ހަމަނުޖެހުމަށް މަގުފަހިވެފައިވުން އެކަށީގެންވާ ކަމަށެވެ.
އެ ވީޑިއޯގައި ބޮލްސޮނާރޯ ވިދާޅުވީ މިހާރުގެ ރައީސް ލުއިޒް އިނާޗިއޯ ލޫލާ ޑަ ސިލްވާ އެ މަގާމަށް ވަޑައިގެންނެވީ ރައްޔިތުންގެ ވޯޓުން ނޫން ކަމަށާއި އެމަނިކުފާނަކީ ސުޕްރީމް ކޯޓާއި އިލެކްޝަން ކޮމިޝަންގެ "ހޮވުމެއް" ކަމަށެވެ.
ވީޑިއޯ އާއްމުކުރީ ހަމަނުޖެހުން ހިންގި ފަހުންނެވެ. އާއްމުކުރިތާ އިރުކޮޅެއް ފަހު ވީޑިއޯ ޑިލީޓްކުރި އެވެ. ޕްރޮސެކިއުޓަރުން ބުނީ ހަމަނުޖެހުމުގެ ފަހުން ވީޑިއޯ އާއްމުކުރި ނަމަވެސް، އޭގެ ކުރިން ބޮލްސޮނާރޯގެ ވާހަކަތަކާއި އިރުޝާދުތަކުން ހަމަނުޖެހުމަށް މަގުފަހިވެފައިވުން އެކަށީގެންވާ ކަމަށެވެ.
ބޮލްސޮނާރޯގެ ސަޕޯޓަރުން މިދިޔަ އާދީއްތަ ދުވަހު ކޮންގްރެސް އަދި ސުޕްރީމް ކޯޓުގެ ތެރެއަށް ވަދެ ގެއްލުންތަކެއް ދިނެވެ. އޭގެ އިތުރުން ރިޔާސީ ގަނޑުވަރު ވަށާލައި އެ ތަނަށް ވަނުމަށް ވެސް މަސައްކަތް ކުރި އެވެ.
އޭގެ ކުރިން އެ މީހުން ތިބީ ބްރެސިލިއާގެ އެކި ހިސާބުތަކުގައި ޓެންޓު ޖަހައިގެން މުޒާހަރާ ކުރުމަށެވެ. އެ މީހުން ގޮވަމުން ދިޔައީ އަސްކަރީ ބަގާވާތެއް ހިންގުމަށެވެ. ހަމަނުޖެހުން ހިންގީ އާ ރައީސް ލޫލާ މަގާމުގެ ހުވާ ކުރެއްވިތާ ހަފުތާއެއް ފަހުންނެވެ.
ހުވާ ކުރެއްވުމުގެ ރަސްމިއްޔާތަށް ވަޑައިނުގެން ބޮލްސޮނާރޯ ހުންނެވީ އެމެރިކާގެ ފްލޮރިޑާގަ އެވެ. އުމުރުން 67 އަހަރުގެ ބޮލްސޮނާރޯ ވިދާޅުވީ ހަމަނުޖެހުން ހިންގުމާ އެމަނިކުފާނާ އެއްވެސް ގުޅުމެއް ނެތް ކަމަށާއި އެ ހާދިސާ ކުށްވެރި ކުރާ ކަމަށެވެ.
ހޯމަ ދުވަހު ސިއްހީ މަައްސަލައެއް ދިމާވެ، ބޮލްސޮނާރޯ ހޮސްޕިޓަލުގައި އެޑްމިޓު ކުރެއްވި އެވެ. ހަމަނުޖެހުން ކުށްވެރިކޮށް ބްރެޒިލްގެ އެކި ހިސާބުތަކުގައި މިހާރު ދަނީ ބޮޑެތި އެއްވުންތައް ބާއްވަމުންނެވެ.
