އިނގިރޭސި ވިލާތުގެ އަމީރު ހެރީ ލިޔުއްވި އޮޓޯބަޔޮގްރަފީ "ސްޕެއާ" އެ ގައުމުގެ ބުކްޝޮޕްތަކުގައި ރަސްމީކޮށް ވިއްކަން ފަށައިފި އެވެ.
ލަންޑަންގެ ބައެއް ބުކްޝޮޕްތަކުގައި މީހުން ވަނީ ފޮތް ގަންނަން ކިޔު ހަދައިފަ އެވެ. އިނގިރޭސި ވިލާތުގައި އެ ފޮތް ވިއްކަން ފެށުމުގެ ކުރިން، އޭގެ ސްޕެއިން ބަހުގެ ތަރުޖަމާ މިދިޔަ ހަފުތާގައި ވިއްކަން ފެށި އެވެ.
އެހެންވެ, ފޮތުގެ ގިނަ ވާހަކަތަކެއް ވަނީ އާއްމުންނާ ހަމައަަށް ފޯރައިފަ އެވެ. ފޮތް ޝާއިއުކުރި ވޯޓާސްޓޯންސްއިން ބުނީ ހެރީގެ ފޮތަކީ ފާއިތުވި 10 އަހަރުގެ ތެރޭގައި އެންމެ ބޮޑު ޕްރީއޯޑާ ލިބުނު އެއް ފޮތް ކަމަށެވެ.
"ސްޕެއާ" ނެރިފައި ވަނީ 16 ބަހަކުންނެވެ. އިނގިރޭސިވިލާތުގެ އިތުރުން އެހެން ގައުމުތަކުގައި ވެސް ވަނީ އެ ފޮތް ވިއްކަން ފަށައިފަ އެވެ.
އޮންލައިންކޮށް ފޮތް ވިއްކާ އެމޭޒަންގެ ޑޭޓާއިން ދައްކާ ގޮތުގައި މިހާރު އިނގިރޭސިވިލާތުގެ އެންމެ ހަލުވިކޮށް ވިކެމުންދަނީ "ސްޕެއާ" އެވެ.
ޖުމްލަ 410 ސަފުހާގެ ފޮތުގައި ހެރީގެ ޒާތީ ހަޔާތުގެ ގިނަ ކަންކަމާއި ބައްޕާފުޅު އަދި ބޭބޭފުޅާ ދެމެދު ގުޅުން ގޯސްވެ ދިމާވި ހާދިސާތައް ހިއްސާކޮށްފައިވެ އެވެ.
އެ ފޮތުގައިވާ ވާހަކަތަކާ ގުޅިގެން އިނގިރޭސި ޝާހީ ގަނޑުވަރުން މިހާތަނަށް އެއްވެސް އެއްޗެއް ނުބުނެ އެވެ.
